Хъырымы, г. Симферополы 22 июлы байгом хуссарирыстойнаг нывгæнджыты куыстыты равдыст «Хуссар Ирыстон – Хъырым». Равдыст уагъд цæуы фыццаг хатт. Симферополы аивæдты музейы залты фенæн ис 80 куыстæй фылдæр. Культурæйы министры ныхæстæм гæсгæ, республикæ дарддæр дæр архайдзæн культурон бастдзинæдтæ фидар кæныныл.

Республикæ Хуссар Ирыстоны Культурæйы министр Остъаты Мадинæ раарфæ кодта равдыстмæ æрбацæуæг уазджытæн æмæ банысан кодта ацы мадзалы æнæ-мæнгхъæуындзинад ирыстойнаг æмæ хъырымаг нывгæнджыты иумиаг сфæлдыстадон проектты реализаци кæныны хъуыддаджы.

«Ацы программæ куыстгонд æрцыд Æмцæдисад æмæ интеграцийы фæдыл бадзырды фæлгæтты, кæцыйыл сæ къухтæ бафыстой Уæрæсейы президент Владимир Путин æмæ Хуссар Ирыстоны Президент Тыбылты Леонид», – фехъусын кодта Остъаты Мадинæ.

«Программæ у фондз азы æмгъуыдмæ, алы аз дæр мах райсæм мадзæлтты план. Мах æмгуыстад кæнæм Уæрæсейы Федерацийы, фæлæ фылдæр Цæгат-Кав-казаг субъекттимæ. Махæн хорз ахастытæ ис УФ-йы Нывгæнджыты цæдисимæ, Мæскуыйаг нывгæнджыты цæдисимæ. Махæн ис Хуссар Ирыстоны адæмон нывгæнæг, сгуыхт нывгæнæг Козаты Ушанг. Нæ плæнттыл куы дзырдтам, уæд нын бауынаффæ кодтой, цæмæй нæ равдыст байгом кодтаиккам Хъырымы. Ацы фарстыл мах бакуыстам Хъырымы Культурæйы министрад æмæ Симферополы аивæдты музеимæ иумæ», – загъта Культурæйы министр.

Дарддæр Хуссар Ирыстон æмæ Хъырым план кæнынц, цæмæй фидардæр кæной культурон бастдзинæдтæ, профилон министрадты ‘хсæн къухтæ æрфыссой æмбæлон бадзырдтæ. «Мах бахатыдыстæм Республикæ Хъырымы Культурæйы министрадмæ, цæмæй къухтæ æрфыссæм æмгуыстады тыххæй бадзырдыл æрмæст хуызфыссынады аивады фæлгæтты нæ, фæлæ ма хореографион æмæ театралон аивады фæлгæтты бадзырдыл дæр. Ацы бадзырды фæлгæтты бакусдзыстæм конкретон мадзæлттыл 2017 азмæ. Уырны мæ, не сфæлдыстадон коллективтæ кæй æрцæудзысты ардæм, хъырымæгтæ та – махмæ», – банысан кодта Остъаты Мадинæ.

Йæхи рады, Республикæ Хъырымы сæргълæууæг Сергей Аксёновы номæй Остъаты Мадинæйæн, равдысты хайадисджытæн æмæ организатортæн раарфæ кодта Хъырымы Культурæйы министр Арина Новосельская ахæм цымыдисон равдысты тыххæй.

Равдыст адарддæр уыдзæн 5 августмæ.

Comments are closed, but trackbacks and pingbacks are open.