Ацы бонты Мæскуыйы аивæдты галереяйы цытджын æгъдауæй аншлагимæ байгом ирон нывгæнджыты равдыст «Наив простой. Наив сложный». Равдыст байгом æрвылазон фестиваль «Хуссар Ирыстон»-ы фæлгæтты.
Проекты куратор Гасситы Цопан куыд фехъусын кодта, уæмæ гæсгæ равдыст байгом кæныны церемонимæ æрбацыдысты бирæ уазджытæ æмæ журналисттæ. «Ирон нывгæнджыты æнæхин сфæлдыстад стыр цымыдис æвзæрын кæны аивадæн аргъгæнджытæм æмæ арт-критиктæм», — банысан кодта уый.
Равдыстмæ æрбавдыст æрцы-дысты Ирыстоны хуссар æмæ цæгат хайы нывгæнджыты куыстытæ. Уым сты куыд профессионалон дæснытæ Гасситы Хсар, Бежанты Вадим, Малтызова Ольга, Гасситы Сергей, Томайты Димитры куыстытæ, афтæ ма «æцæг æнæхин нывгæнджыты» куыстытæ дæр«.
Равдысты сæйраг нысаниуæг у адæмон скульптор Кæркуысты Сикойы сфæлдыстадон бынтæм хъусдард аздахын.
Банысан кæнын хъæуы уый дæр, æмæ фестиваль «Хуссар Ирыстон» мæскуыйаг кæсæджы ирон культурæимæ кæй зонгæ кæны æрвылаз дæр. Равдыст кусдзæн 14 августмæ.
***
Ирон нывгæнджыты равдыст «Отражение Европы» байгом Майкопы. Равдысты организатортæй иу — ирон нывгæнæг, Республикæ Цæгат Ирыстон-Аланийы аивæдты сгуыхт архайæг, аивæдты Уæрæсейы академийы премийы лауреат Пухаты Вадим куыд фехъусын кодта, уымæ гæсгæ равдыст цытджын æгъдауæй байгом 22-æм июлы Скæсæн музейы æмæ аххæсдзæн 12 августы онг.
Пухаты Вадимы ныхæстæм гæсгæ, равдыст «Отражение Европы»-мæ æрбацыдысты Адыгеяйы сæйраг горæт Майкопы сæдæгай цæрджытæ æмæ уазджытæ. «Равдыстмæ æрбавдыст æрцыдысты ирон нывгæнджыты нывтæ, кæцытæ хайад райстой „Европæйы ирон культурæйы бонты“. Уым сты ахæм куыстытæ, кæцыты эскизтæ фыст æрцыдысты Европæйы пленэрты æмæ мастер-къласты, æмæ сæ уый фæстæ та равдыстой кæттагыл», — радзырдта Пухаты Вадим.
Уый ма банысан кодта, зæгъгæ, ассоциаци «Renaissance Sandidzan»-ы къухдариуæггæнæг Пухаты Радионы руаджы æхсæз азы размæ ирон нывгæнджытæн фадат фæзынд сæ нывтæ нырма Бельгийы, æмæ уый фæстæ та Европæйы æндæр бæстæты равдисынæн.
«Ирон нывгæнджытæн фадат фæци музейтæ, нывты галереятæм бацæуынæн æмæ æппæт рæстæ-джыты стыр нывгæнджыты уацмысты коллекцитимæ базонгæ кæнынæн. Æмæ абон та мах уадзæм ирон нывгæнджыты равдыстыты сери «Отражение Европы» Уæрæсейы, — загъта уый.
Пухаты Радионы ныхæстæм гæсгæ, Майкопы равдыстмæ æрбавдыст æрцыдысты Бедойты Шалва, Чилæхсаты Магрез, Кæсойты Лаврент, Гæбæраты Барис, Къодоты-Пироты Софья, Абысалты Юри, Ахполты Æхсар, Басаты Олег, Кæркуысты Роберт, Чилæхсаты Эммæ, Айларты Владимир, Куымæридтаты Аркади, Цæллæгаты Виктор, Къацты Вадим æмæ Пухаты Вадимы куыстытæ. Уый ма куыд загъта, афтæмæй ирон нывгæнджыты иннæ равдыст «Отражение Европы» та план кæнынц Хъырымы сорганизаци кæнын.
Банысан кæнын хъæуы уый дæр, æмæ равдысты организатортæ кæй сты Республикæ Цæгат Ирыстон-Аланийы аивæдты сгуыхт архайæг, аивæдты Уæрæсейы академийы премийы лауреат Пухаты Вадим æмæ дунеон æнæкоммерцион ассоциаци «Renaissance Sandidzan»-ы къухдариуæггæнæг Пухаты Радион.
Comments are closed, but trackbacks and pingbacks are open.