Хуссарирыстойнаг нывæфтыд документалон киноныв «Ирон Вандея» — фæуæлахиз IX æфсæддон-патриотикон фильмты æмæ алæвæрдты дунеон фестиваль «Вечный огонь»-ы. Фæуæлахиз дзы ис «Хуыздæр сценарион куыст»-ы номинацийы.

Ацы кинонывы режиссер Мамиты Григорийы ныхæстæм гæсгæ, фестивалы æвдыст æрцыдис 200 проектæй фылдæр, уыдонæй финалмæ ахызтис æрмæстдæр цыппар.

Документалон киноныв «Ирон Вандея»-йы сюжеты æвдыст æрцыд 1920 азты ирон адæмы геноцид.

Киноныв «Ирон Вандея»-йæ сæрмагонд призтæ ма ноджы райста æппæтуæрæсейон медиафестиваль «Восхождение»-йы.

Мамиты Григори ма куыд загъта, уымæ гæсгæ ацы кинонывыл чи куыста, уыцы командæйæн сæ зæрды ис ноджы бирæ цымыдисон проекттыл бакусын, цыран æвдыст æрцæудзысты нæ адæмы историйы нысаниуæгджын цаутæ.

«Ирон Вандея» ист æрцыд нæ республикæйы Паддзахадон телерадиокомпани «Ир»-ы. Бакуыстой йыл Мамиты Григори, сценарийы продюсер æмæ автор Бестауты Юля, режиссеры æххуысгæнæг Цхуырбаты Сергей, оператор-монтажгæнæг Хаситы Михаил æмæ бирæ æндæртæ.

Comments are closed, but trackbacks and pingbacks are open.