Дзæуджыхъæуы уагъд æрцыд диссаджы концерт, кæцыйы хайад райстой хуссарирыстойнаг хореографион ансамбль «Ирон», цæгатирыстойнаг ансамбль «Фидæн» æмæ ансамбль «Алан»-ы ветерантæ. Ацы концерт æвдыст хъуамæ æрцыдаид 30 июны, фæлæ Транскамы фæндагыл зæйтæ кæй рацыд æмæ бæлццæттæн тæссаг кæй уыд, уый тыххæй йæ аргъæвтой фæстæдæрмæ.

Ансамбль «Ирон» фæсхохмæ равдисынмæ ахаста 7 кафты æмæ сæ иууылдæр иттæг хорз сæххæст кодтой – фесты цæстæвæрæн. Сæ аивадон къухдариуæггæнæг Хуыгаты Дианæ куыд банысан кодта, афтæмæй концертмæ кæсджытæ райстой стыр æхцондзинад, концертон программæ сыл ныууагъта æнæссæугæ тæлмæнтæ.

«Тынг хорз ныл сæмбæлдысты нæ цæгаттаг æфсымæртæ – ирон æгъдау куыд домы, растдæр афтæ. Фæхуыдтой нæ фынгмæ, балæвар нын кодтой Дзæуджыхъæуы национ уæлæдарæсы салон «Изольда»-йы сертификат 30 мин сомимæ. Нæ фæсивæдæн ахæм фембæлд тынг фæахъаз уыдзæнис сæ дарддæры профессионалон архайды», – загъта Хуыгаты Дианæ.

Фæстæдæр нæм Хуссар Ирыстонмæ уазæгуаты хъуамæ æрцæуа ансамбль «Фидæн», цæмæй ам дæр ауадзой концерт æмæ барухс кæной нæ республикæйы цæрджыты зæрдæтæ. Уæд та ансамбль «Ирон»-ы бахъæудзæн фысымиуæг кæныны сæр.

ДЖИОТЫ Алыксандр

Comments are closed, but trackbacks and pingbacks are open.