«Алеш… Ирон фыссæг… Ирыстоны хæстон… Цыбыр уыд дæ цардвæндаг — æрмæстдæр дыу-уиссæдз азы… Дæ уарзон адæмæн дæхи бауарзын кæн фыссæгæй, стæй уæд Райгуырæны сæрвæлтау дæ уд нывондæн æрхæсс хæстонау…»

Ацы рæнхъытæ ирон литературæйы пехуымпар, зынгхуыст фыссæг Гуыцмæзты Алешы чиныг «Азарут иронау, лæппутæ»-йы разныхасæй ист сты.

Ног æмæ ног раздæхæм Алешы коймæ. Алы æфсæнттæй. Уымæн æмæ нын йе сфæлдыстадыл дзурын æхсызгон у, йæ уацмыстæй йын адæймаджы цæст æмæ уд не фсæдынц. Йæхи уындæй та йын бынтон нæ бафсæстыстæм, ацыд æнæрæстæджы, йæ мæрдæй сидзæр баззад ирон литературæ. Куыд дзырдта, афтæ йæ риуы æмбæрц бахъахъхъæдта йæ зæхх.

Ууыл ныр 25 азы рацыд, æмæ та йын ног ссардтам йæ рухс ном. Ивгъуыд майрæмбоны йæ мысæн изæрмæ Дзæуджыхъæуы республикон библиотекæмæ æрбацыд бирæ адæм. Уыдонимæ фысджытæ, ахуыргæндтæ, æхсæнадон архайджытæ, ахуыргæнджытæ æмæ скъоладзаутæ, фылдæр та йе сфæлдыстадæн табугæнджытæ.

Ирыстоны Фысджыты цæдисы æмсæрдар Ходы Камал куыд загъта, афтæмæй нæ бафсæст Алешимæ бадын æмæ ныхас кæнынæй, удæгас цыртдзæвæнау ын баззадысты йæ уацмыстæ, стæй бакаст йæхи фыст æмдзæвгæ. Ирыстоны Фысджыты цæдисы иннæ æмсæрдар Хъазиты Мелитон дæр радзырдта йæ мысинæгтæ:

— Ныртæккæ адæмæн сæ фылдæр сты, кæцæй цы ратоной, ууыл. Фæлæ уыд ахæм лæппутæ, йæ цард Ирыстонæн чи нывонд кодта. Уыдонæй уыд Алеш дæр. Уый ирон адæмы фарнæн цард. Фыццаг дæр ын йе ’мдзæвгæтæ газет «Советон Ирыстон»-ы федтон, уый фæстæ нæ базонгæ кодта Гафез. Уыд тынг уæздан адæймаг. Хæсты рæстæджы йæ бинонтæ Цæгат Ирыстонмæ рацыдысты æмæ-иу йæ сывæллæтты арæх мысыд, иу уынд ма сæ куы фæкæнин, кæнæ ма иу хатт мæ фыссæнгæрзтæм куы баирвæзин, зæгъгæ. Мах ын дзырдтам, чысыл сывæллæттæ дын ис æмæ дæхиуыл бацауæрд, зæгъгæ, фæлæ никуы бакоммæ каст. Нал федта йæ сывæллæтты дæр æмæ йæ фыссæн сис дæр. Йæ фæтæн риуæй цы фыдызæхх хъахъхъæдта, уый йын знаджы нæмыг фæхаста.

Мелитон ма радзырдта Алешы уацмысты ахадындзинадыл, стæй йæ мæлæты рæстæджы дудгæбонтыл æмæ бакаст Алешыл фыст йæхи æмдзæвгæ.

Ахуыргонд Къусраты Анатоли куыд бафиппайдта, афтæмæй Алешы роман «Дæ уды фарн»-ы абарæн ис дунейы классикты уацмыстимæ. Йæ къухмæ йæ чи райса, уый дзы йæхи атонын нал бафæраздзæн.

Поэт Кокайты Тотрадз радзырдта, Алешимæ куыд базонгæ сты, уый: «Æвдайæм азты райдайæны нæ дыууæ дæр ахуыр кодтам Мæскуыйы, Горькийы номыл литературон институты. Уым базонгæ стæм. Æз-иу бадис кодтон, æдзух дунеон классикты литературæ кæй каст, ууыл. Фæстæдæр ын йæхи сфæлдыстадимæ куы базонгæ дæн, уæд бамбæрстон, Алешмæ Хуыцауы комы тæф кæй хæццæ кæны, стыр курдиаты хицау кæй у. Рауагъдады кусгæйæ йын йæ чингуытæ бацæттæ кодтон æз æмæ йын йæ уацмыстæ кæсынæй нæ фæлладтæн, ахæм æхцондзинад сæ истон».

Поэт Къадзаты Станислав радзырдта, Алешы зианмæ уыцы фыдрæстæг Цхинвалмæ куыд ацыдысты, уыцы зæрдæуынгæггæнæг мысинæгтæ æмæ бакаст, уæд кæй ныффыста «Цы ма ис Чъребайæ Цхинвалы», зæгъгæ, уыцы æм-дзæвгæ æмæ «Урс фынтæй» скъуыддзæгтæ.

Библиотекæйы разамынд Дзапарты Зарæйы хъæппæрисæй тынг бацархайдта, цæмæй Алешы мысæн изæр мидисджын рауайа. Дзанайты Ольгæйы зарæггæнджыты къорд азарыдысты «Мæ Ирыстон» æмæ Нартыхты Сосойы зарæг. Дзæуджыхъæуы 13-æм скъолайы аивадон къорд «Талатæ» бакастысты Кокайты Тотрадзы фыст «Номарæн»-æй скъуыддзæгтæ. Ирон театры артисткæ Бекъойты Зæлинæ та бакаст Алешы уацмыстæй цалдæр хайы.

Æвæдза, иу ссæдз азы ма нын уæддæр куы рацардаид Гуыцмæзты Алеш, уæд ма цас литературон бынтæ скодтаид. Сбуц нæ кодта йе ’нæмæлгæ уацмыстæй æмæ нæ фæуагъта. Æрмæст «Дæ уды фарн» æмæ «Урс фынтæ» куы ныффыстаид, уæддæр ирон литературæйы баззадаит классикæй. Адон кæсгæйæ, адæймаг дисы бацæуы. Ахæм арф хъуыдытæ кæцæй цыдысты, нырма азтæ бирæ кæуыл нæ рацыд, уыцы фыссæджы сæрмæ. Уый стыр курдиат у.

Кæронбæттæны та мæ æрхæс-сын фæнды, йæ чиныг «Кæмдæр ирон лæппутæ зарынц»-ы разныхасæн йæ кæрон:

«О, Алеш… Алеш… Ды нæ ныфс уыдтæ, нæ номы кæстæр. Ды хъуамæ басгуыхтаис нæ литературæйы фарнæн, уыдаис нæ цæугæ мæсыг, нæ лæугæ хох… Фæлæ абон Чъребайы 5-æм скъолайы кæрты дæ тохвæллад æмгæртты астæу сыстад дæ лæугæ цырт…

Ирон дзырды фарн макуы рафтæд, дæ туг цы зæххыл ныккалд, уым. О, Алеш…»

Джусойты Нинæ

Comments are closed, but trackbacks and pingbacks are open.