22-æм декабры киноконцертон зал «Чермен»-ы уагъд æрцыд ирон зард æмæ кафты æцæг бæрæгбон. Концерт сорганизаци кодта горæт Цхинвалы администрацийы культурæ, фæсивæд æмæ спорты управлени.

Хыгъдон концертмæ æрбацыдысты РХИ-йы Хицауады Сæрдар Пухаты Эрик, горæт Цхинвалы администрацийы сæргълæууæг Коцты Алан, РХИ-йы культурæйы министрады минæвæрттæ æмæ æндæр бæрнон адæймæгтæ.

Уыцы бон ма киноконцертон зал «Чермен»-мæ цы бирæ адæм æрбацыд, уыдон се ‘рбацыдыл фæсмон нæ фæкодтой, уымæн æмæ стыр æхцондзинад райстой мадзалы сæххæстгонд номыртæй. Мадзал амыдтой РХИ-йы паддзахадон телеуынынад «Ир»-ы диктортæ  Дыгъуызты Сабинæ æмæ Хуриты Батрадз. Уыдон раарфæ кодтой æрæмбырдуæвджытæн æрбалæугæ Ног азы сæраппонд. Загътой, зæгъгæ, ног азы къæсæрыл стæм æмæ йыл алчи дæр хъæлдзæг зæрдæйы равгимæ сæмбæлæд,  алкæмæн дæр, зæгъ, уæ хорздзинæдтæ æрхæссæд. Концерты хайад райстой куыд сфæлдыстадон коллективтæ, афтæ хицæн æххæстгæнджытæ дæр. Мадзаламонджытæ фыццаг сценæмæ фæхуыдтой æмæ æрæмбырдуæвджыты раз сæ арæхстдзинад равдыстой горæт Цхинвалы администрацийы культурæйы управленийы цур паддзахадон адæмон инструменталон оркестр «Айзæлд», йæ аивадон къухдариуæггæнæг æмæ дирижер у РХИ-йы сгуыхт артисткæ Уалыты Нинæ. «Айзæлд»-ы коллектив у куыд Хуссар Ирыстоны, афтæ Цæгат Ирыстоны уагъдцæуæг мадзæлтты хайадисæг. 2017 азы РХИ-йы Культурæйы министрады æххуысæй адæмон инструменталон оркестр хайад райста  Санкт-Петербурджы 8-æм дунеон фестивалы  æмæ дзы ссис 1-аг къæпхæны дипломант.

Залмæ æрбацæуджыты зæрдæтæ сæ рæсугъд зардæй бахъæлдзæг кодтой РХИ-йы сгуыхт артист Хаситы Сослан, РХИ-йы адæмон артист Æлборты Инал, Дыгъуызты Маринæ æмæ ирон эстрадæйы æндæр стъалытæ. Концерты хайад райстой æмæ цалдæр кафты сæххæст кодтой адæмон кафты хореографион ансамбль «Ирон»-ы æххæстгæнджытæ, сæ аивадон къухдариуæг-гæнæг у  РХИ-йы сгуыхт артисткæ Хуыгаты Дианæ. Ацы ансамбль  дæр бирæ хæттыты ссис фестивалты æмæ конкурсты уæлахиздзау æмæ лауреат куыд Хуссар Ирыстоны, афтæ республикæйæн æддейæ дæр. Кæй зæгъын æй хъæуы, концерты сæххæст кодтой ирон массон кафт «Симд» дæр, солисттæ — Бестауты Заринæ æмæ Бекъойты Артур. Мадзалы сæ арæхстдзинад равдыстой куыд, Тедеты Георгийы номыл горæт Цхинвалы 1-æм музыкалон скъолайы хъомылгæнинæгтæ, афтæ Битеты Павелы номыл 2-æм музыкалон скъолайы ахуыргæнинæгтæ æмæ ахуыргæнджытæ дæр. Мецакоппо «Тарантелла» сæххæст кодта РХИ-йы сгуыхт артисткæ Куыдзеты Агуындæ.

Банысан кæнын хъæуы уый дæр, æмæ номырæй номыры ‘хсæн  æнæхъæн концерты дæргъы йæ арæхстдзинад кæй æвдыста адæмон инструменталон оркестр «Айзæлд». Мадзал уагъд æрцыд куыд ног азы цытæн, афтæ ма хыгъдон концерты хуызы дæр. Сценæмæкæсджытæ райгондæй кæй баззадысты концерты сæххæстгонд номыртæй, уый дзурæг у,  æнæхъæн азы дæргъы сфæлдыстадон коллективтæ сæхиуыл хорз кæй бакуыстой, ууыл.

Джиоты Е.

Comments are closed, but trackbacks and pingbacks are open.