Нæ республикæйы Уæрæсеимæ цы иунæг фæндаг бæтты, уый къуырийы бæрц митуарды æмæ митзæй-ты фæстиуæгæн æхгæд кæй у, уый, кæй зæгъын æй хъæуы, бандæвта горæт æмæ районты хæлцадон дуканиты товарæрзылдыл. Горæты фылдæр адæм кæм цæрынц, уыцы микрорайонты ахæм дуканиты тæрхджытæ æмæ уазалгæнæнтæ ныртæккæ сты бæрæг афтид, уæлдайдæр, æхсыр æмæ æхсыры продукттæй. Цы хæлцадон дуканитыл азылдыстæм, уыдоны уæйгæнджытимæ аныхасгæнгæйæ, бæрæг уыд, æхсыры продукттæ тагъд кæй æвзæр кæнынц, уымæ гæсгæ дзы фæсауæрцгæнæн нæй, цъус партитæй цæуынц ласт Хуссар Ирыстонмæ æмæ тагъд раафтид вæййынц дуканиты уазалгæнæнты тæрхджытæ. Уый æмрæнхъ ма бæрæг у уый дæр, æмæ бирæ æмбæстæгты сæ дзыппытæ кæй нæ фæамонынц, уыцы аххосагмæ гæсгæ арæх кæй нæ цæуынц хæлцадон продукттæ уæйгæнæн дуканитæм.

Бирæ фæлхасгæнджыты ныхæстæм гæсгæ, хæлцадон продукттæ самал кæнынмæ арæх цы дуканитæм цæуынц, уыдон тæрхджытæ афтид кæй сты, уый бандæвта се ‘рвылбонон хæрды рационыл. Бирæ продукттæ нал сты сæ уазалгæнæнты, дуканиты куыд атæнæг сты, афтæ. Уыцы-иу рæстæг мах фарст уыд ахæм, ома, уыцы продукттæ æндæр дуканиты самалгæнæн нæй? Уымæн та ахæм дзуапп райстам, зæгъгæ, мах хæлцадон продукттæ æлхæнæм æрмæстдæр бæрæг дуканиты. Уæдæ, æнæрхъæцæй æнхъæлмæ кæсæм, зæйтæй сыгъдæг кæд æрцæудзæн Транскавказы автомагистрал æмæ та магазинты сæ бынат кæй ссардзысты хæлцадон товартæ.

Иуæй-иу куыстуæттыл дæр бандæвта, фæндаг арæх æхгæд кæй вæййы фæстаг рæстæджы, уыцы хъуыддаг. Чи – кусæн æрмæгæй, чи хомысæй æййафы хъуагдзинад. Цæрынæн сæйраг фæрæз кæрдзын у – ссадæй дзулфыцæн комбинат куыд ифтонг у, уый тыххæй нын комбинаты директор Цхуырбаты Вадим афтæ радзырдта, зæгъгæ, фæсауæрцтæ ‘ркæнынц рагацау, зымæг æрлæууыны агъоммæ. Уымæ гæсгæ дзулфыцæн комбинат ифтонг у ссад, цæхх, æнхъизæн æмæ æндæр æнæмæнгхъæуæг фæрæзтæй.

Ныфс нæ ис, æмæ цалынмæ нæ газет йæ кæсджытæм хæццæ кæна, уæдмæ фæндаг сæрибар æрцæудзæн митзæйтæй æмæ йыл фæрнæй дыууæрдæм кæй цæудзысты æмбæстæгтæ сæ хъуыддæгты фæдыл, уыдоны нымæцы – нæ амалиуæггæнджытæ дæр. Хæлцадон кризис ис æви нæ Хуссар Ирыстоны – уый нырма зын зæгъæн у… æмæ уæдмæ фæндаг дæр гом кæндзæн.

Къæбулты Маринæ

Comments are closed, but trackbacks and pingbacks are open.