Цæгат Ирыстоны исынц фильм «Прямой эфир». Сæйраг ролы дзы ахъаздзæн Кирилл Кяро. Кинонывы режиссер у Карен Оганесян, кæцы ма систа ахæм зынгæ кинонывтæ куыд «Пассажиры», «Игра на выживание», «Медное солнце», «Жизнь впереди» æмæ æндæрты. Фильм ист цæуы Дæргъæвсы хъæуы «Мæрдты горæты», афтæ ма сценæтæ ист æрцыдысты Хъæрмæдоны комы æмæ Беслæны. Фильмы идеяйы автор, продюсертæй иу Беник Аракелян жур-налисттæн куыд радзырдта, афтæмæй бынат æнæнхъæлæджы æвзæрст не ‘рцыд. Цæгат Ирыстоны Дæргъæвс у республикæйы популярондæр хъæутæй иу. Номхуындæй уым ис легендарон «Мæрдты горæт», кæцыйæн ис хъæздыгдæр истори.
«Цæгат Ирыстоны равзæрстон уымæн, æмæ мын ирон адæммæ, ирон менталитетмæ ис стыр уарзондзинад. Раджы мын радзырдтой ацы бынаты историйы тыххæй æмæ мæ дисы баппæрста, адæм куыд цыдысты æмæ зæппадзтæ куыд арæзтой, æндæрты хæрзиуæгæн сæ цард нывондæн куыд хастой, уый. Растдæр уымæ гæсгæ фильм ист цæуы «Мæрдты горæты». Киноныв куы рацæуа, уæд сценæмæкæсджытæ банкъардзысты, иу адæймаг йæ цард нывондæн куыд хæссы æндæр адæймаджы тыххæй, уый аивадон мидисы», – загъта Беник Аракелян.
Исæн процессы рæстæджы командæ сæмбæлд æвзæр боныгъæдты зындзинæдтимæ. «Тымыгъ, тыхдымгæ, мит, хур, къæвда æмæ уый иу боны дæргъы. Æппæт уыцы вазыгджындзинæдтæ федтам ам. Мах уал ныридæгæн иу хатт æрцыдыстæм ардæм, уарыд тыхджын мит, фильм исынæн уыд вазыгджын уавæртæ, фæлæ æппæт уыдæтты сæрты ахизын нæ бон ссис», – банысан кодта уый.
Кинонывы ист цæуынц зынгæ уæрæсейаг актертæ Кирилл Кяро, Павел Чернышев, Ангелина Стречина, Анастасия Тодореску, Ирина Воронова, Фидараты Сослан, Ульяна Пилипенко.
Театр æмæ кинойы ирон актер Фидараты Сослан фильм «Прямой эфир»-ы хъазы Уæлвæткон уавæрты министрады кусæджы ролы. Уый йæ комментариты банысан кодта, зæгъгæ, йæ рагæй фæндыд режиссер Карэн Оганесяны кинолентæйы ахъазын æмæ йæм Беник Аракелянæй фæндон куы æрбацыд, уæд уайтагъд сразы ис йæ фæндыл æмæ райста роль. «Фильмы ис Гæбысты Аланы персонаж, уый у уæлвæткон уавæрты министрады кусæг, кæцы фæзынд фильмы кæрон æмæ алцы дæр сæвæрдта йæ бынаты. Гæбысты Аланы ролы ахъазын зын нæ уыд. Æз алкæмæн дæр дзурын, цæмæй бакæсой киномæ æмæ саразой хатдзæгтæ», – загъта Фидараты Сослан.
Актер бузныджы ныхæстæ загъта Цæгат Ирыстоны къухдариуæгадæн, уæлвæткон уавæрты министрадæн, афтæ ма Дæргъæвсы хъæуы цæрджытæн, кæцытæ хайад райстой исæн процесс среализаци кæныны. Фильм психологон драмæйы жанры сценæмæкæсджытæн радзурдзæн блогеры царды тыххæй, кæцы æрцыд Ирыстонмæ æмæ сæмбæлд алыгъуызон зындзинæдтыл æмæ бахаудта экстремалон уавæрты, æрдзимæ иунæгæй баззайгæйæ. «Прямой эфир» ист цæудзæн апрелы кæронмæ. Ирыстонæй дарддæр ма цалдæр боны фильм ист цæудзæн Мæскуыйы. План цæуы, зæгъгæ, киноныв экраныл æвдыст æрцæудзæн 2021 азы кæрон.
Comments are closed, but trackbacks and pingbacks are open.