Куыддæр мæ уацхъуыд — «Нырыккон зарæг æвзаг бахъахъхъæныны фæрæз у æви — йæ сафæг» — газет «Рæстдзинад»-ы фæрстыл фæзынд, афтæ мæм мæ зонгæтæ — газеткæсджытæ иу иннæйы фæдыл дзурын райдыдтой. Цæуыл дзырдтон (дзургæ та кодтон, зарджыты ны-хæсты мидисыл, сæ хæрзхъæддзинадыл), уый сæ зæрдæмæ фæцыд. Чидæртæ уый фæстæ сæ хъуыдытæ дæр рахастой газеткæсджыты размæ. Раст зæгъгæйæ, уый æнхъæл нæ уыд-тæн! Афтæ мæм каст, цыма нæ ирон газет кæсæг нал ис, цыма йæ йæ къухмæ исгæ дæр ничи-уал ракæны мæ хистæр хойæ фæстæмæ. Фæлæ рæдыдтæн. Ис ирон газет, ис ын æцæг кæс-джытæ дæр, ирон дзырдæн зæрдæйæ аргъгæнджытæ. Бузныг сын зæгъын. Фæлæ уæддæр æмæ уæддæр… Ныхас кæмæ хауди, уыцы зарæггæнджытæ æмæ «ног форматы поэттæй», цæмæдæр гæсгæ, нæдæр хорз дзырд райхъуыст, нæдæр — æвзæр. Уымæ гæсгæ мæ бафæндыд мæ ныхас адарддæр кæнын. Æппынфæстаг æз газеткæсджытæн фыссын æмæ, уырыссагау куыд фæзæгъынц: «Вызываю огонь на себя».

Иу хатт ма зарджыты ныхæсты тыххæй

Загътон æй, мах диссаджы адæм стæм! Гиннесы чиныгмæ нæ ныронг куыд нæ бахастой, ууыл мæхимид æдзухæй дис кæнын. Æмæ куыннæ! Не ‘взаг кæд сæвæрдтам хæзнайы бынаты. Хæзна хæзна у! Иугæр дæм хæзна куы уа, уæд зæххыл дæуæй амондджындæр нæй! Аргъæутты иугай лæгтæм уыд хæзна. Махмæ та алкæмæ дæр ис! Æмæ нæхицæй ныббуц вæййæм! Æмæ куыннæ! Мах йеддæмæ уыцы хъуыдымæ ничи ма æрцыд! Мах æрдзæй афтæ зондджын рахастам, æмæ нын æмбал нæй зæххы къорийыл! Уæдæ! Иннæ адæмтæй йе ‘взаг хæзна ничи ма схуыдта. Зæгъæм, уырысæн се ‘взаг сæ хъæздыгдзинад у (Язык — наше богатство!) Махæн та не ‘взаг нæ хæзна у (Язык наше сокровище!) Æмæ æфсæрмы дæр нæ кæнæм! Æмæ цæмæн кæнæм æфсæрмы: хæзнайæ хуыздæр цы ис! Ницы! Мæнæ аргъæутты дæр йæ кой иуæйиу хатт скæнынц. Хæзна хъуамæ æмбæхст уа! Иугæр æй иууылдæр куы уыной æмæ куы зоной, уæд ма цæй хæзна у дæ хæзна! Цæвиттон, аргъæутты иу хъæздыг лæг цард, уыд диссаджы хæзнайы хицау. Йæ хæзна уыдис арф æмбæхст. Æрмæстдæр æй зыдта хъæздыг лæг йæхæдæг. Йæ бинонтæ-иу куы бафынæй сты, уæд-иу лæг бавдæлд, йæ хæзна-иу йе ‘мбæхсæнæй систа, фæцинтæ-иу ыл кодта сусæгæй æмæ та-иу æй арф бамбæхста!

Махæн дæр не ‘взаг нæ хæзна у! Искуыиу хатт ыл адзубанды кæнæм æфсæрмытæгæнгæ, куыд ничи нæ фехъуса, куыд ничи йæ бамбара, æвзаг нын ис, уый, æмæ та йæ аныхъуырæм æндæр хаттмæ! Исчи нæ куы базона, ирæттæ стæм, иронау дзурæм, уæд куыд уыдзæн, не ‘взаг нæ хæзна у, æмæ хæзнайæн та давынæй тæссаг у. Куы нын æй адавой, уæд ма нын кæм уыдзæн æндæр æвзаг? О! О! Æмæ ма æрмæст худæм! Кæл-кæл худтæй!.. Сыгъдæг иронау худæм! Æмæ кæуыл худæм? Нæхиуыл! Де ‘взаг афтæ ферох кæн, æмæ дын æндæр адæмыхатты минæвæрттæ ахуыргæнæн чингуытæ аразæнт! Уæвгæ мах иууылдæр æндæр адæмыхæттытæй стæм! Ирон æвзагæн йæхи ратæдзæнтæ æмæ кæлæнтæ кæй ис, уый нæ ферох æмæ æндæр æвзæгтæй къуымых тæлмац кæнæм цыдæр хъуыдыйæдтæ. Уый уæлдай тынгдæр рабæрæг, радиойæ цы зарджытæ фехъусæм, уыдоны. Лæмбынæг сæм куы хъусай, уæд уырдыгæй бонæн диссæгтæ разарынц.

Æнæзæххон уарзтæй дæ уарзын… Куыд бамбарæн ис ахæм уарзтæн? О, уырыссагау фæзæгъынц: “Неземная любовь!” Фæлæ уый ирон æвзагмæ цы бар дары? Мур дæр ницы! Диссагæн ма йæ фæстæмæ уырыссаг æвзагмæ ратæлмац кæнæм: “Безземельной любовью люблю тебя”. Афтæмæй та иронау ахæм уарзт хуыдтой “Уæларвон уарзт” æмæ зæгъын хъуыд: Уæларвон уарзтæй дæ уарзын…” Фæлæ иу уæнг хъуаг у ацы дзырд æмæ музыкæимæ не сбадтысты æмæ уæд музыкалон ритм баххæст кæныны тыххæй ирон æвзаджы фæзынд ног дзырд! Ныридæгæн уал цалдæр зарæджы пайда кæнынц ацы комкоммæ тæлмацгонд дзырдæй! Ритмикæйы тыххæй та æвзагæн тыхми кæнын нæ хъæуы, фæлæ агурын хъæуы æндæр æмæ æндæр ирон дзырдтæ.

Ирон æмæ уырыссаг менталитеттæ кæрæдзийæ цæмæйдæр хицæн кодтой æмæ ныр дæр хъуамæ кæной. Зæгъæм, уырыс зарынц: черноокий, чернобровый, æмæ æмбæрстгонд у, фæлæ ирон лæппуйæ куы фæзæгъынц саулагъз, сауæрфыг, уæд уый ирон лæгæн зын бамбарæн у. Сау лæппу дзырдтой. Æрфгуытæм не ‘внæлдтой.

Фæлæ абон разарынц: Сауцæст, сауæрфыг лæппу…

кæнæ:

Дыууæ бæлонау тæхæм мах дардмæ…

Тæхут! Рæствæндаг ут! Фæлæ ирон адæммæ лæппу кæд сбæлон? Чызгæй-иу загътой: «Мæ бæлон!» Лæппуйæ та — «Мæ цæргæс!» Ацы зарæгмæ хъусгæйæ, лæг хъуыдыты ацæуы, кæд уый нырыккон, «однополитæ» кæй хонынц, уыдоны зарæг у? Æмæ нæм ахæмтæ дæр фæзынд? Уæвгæ ирон дзырдæн куы нал аргъ кæнæм, уæд ма нæм бирæ диссæгтæ фæзындзæн.

Дзырдæн уырыссагау фæзæгъынц: “Чаша любви”, æмæ æмбæрстгонд у, зæрдæйы кой кæй кæнынц. Иронау куы разарынц: “Дзаг уæд æнустæм уарзты мигæнæн”, уæд лæг, фæнда йæ нæ фæнда, йæхи бафæрсы: цымæ цавæр ахæм мигæнæны кой кæны ацы зарæггæнæг? Кæд зæрдæйы хоны мигæнæн? Æмæ зæрдæ мигæнæн нæу! Ис арахъуадзæн мигæнæнтæ, цуаноны хъыримаг дæр хуыдтой мигæнæн. Зæрдæйæ мигæнæн никуы ничи загъта ныронг, уымæн æмæ уый йæхæдæг ми кæны, кусы, гуыпп-гуыпп кæны, цæрæг уды цард дарддæр хæццæ кæны! Уарзы! Уарзæн та æрмæст зæрдæйæ ис! О, о, зæрдæйæ! Фæлæ йын фæстаг рæстæджыты кæд зонд йæ бартæ исын райдыдта, æмæ уæд ныззарæм: “Уарзын зæрдæ æмæ зондæй!” Иугæр зонд дæр уарзтмæ бар дары, уæд диссаг нæу мæнæ ацы фарста дæр: «Зæгъ-ма, кæд дын нæ барывтон дæ цæхæрадон?» Ам нын зарæг дæр æмæ зарæггæнæг дæр, æвæццæгæн, зæгъынмæ хъавынц: «Кæд дæ сæры иу чысыл зонды мур ис, уæд уал дæ уарзонæн йæ цæхæрадон барув, цæмæй дæ уарзты пиллон арт ныггуыпп ласа рувгæ-рувын!» Иугæр зонд куы скæрда, уæд ма зæрдæйæн цы гæнæн уыдзæн!

Иннæ ахæм:

Байрай, Ирыстон…

Æмæ чи цы кусгæ уыны Ирыстоны? Мах Ирыстоны риуыл цæрæм æмæ кусæм, æмæ фæндагыл цæугæйæ искæй кусгæ куы фенæм, уæд ын фæзæгъæм: байрай, ома, дæ куыстæй барай (æрмæст афтæ æцæг хъобайнаг лæгæн ма зæгъай, туджджыны цæстæй дæм акæсдзæн). Æнæуи та хорз ирон дзырд у, æмæ алчидæр райгонд уæд йæ цардæй, йæ куыстæй, æмæ уæд Ирыстон дæр райгонд уыдзæн йæ зæнæгæй. Афтæмæй, зарæгмæ бар чи дары, уыдонæй алчидæр йæ куыстæй барайæд: зарæггæнæг йæ зардæй, ныхæстæ фыссæг йæ дзырдтæй, музыкæйы зæлтæ фыссæг йæ музыкæйæ, цæмæй, уыдон куы баиу уой, уæд зарæгмæ хъусджытæ райой æмæ цинæй райгæйæ цæрой Ирыстоны риуыл. Алцыдæр йæ гаччы куы уаид, уæд-иу зарæггæнæг сылгоймаг нæ зарид:

Рауадзут, хистæртæ, арфæйы рæгъ…

Уæвгæ нæ зарджыты рæнхъыты, уыимæ не ‘взаджы, бонæн диссæгтæ кæй цæуы, уый нæм уадиссаг нал кæсы. Æндæр диссаг куыд нæ у адæмæн арфæтæ кæныны æфсон адæмы æлгъит!

Уастырджи уе ‘мбал,

Уæхи фæндиаг ут:

Абоны боны

Хуыцауæй фæдзæхст ут!

Адæм дæр хъусынц æмæ фæзæгъынц: иугæр афтæ зарынц, уæд уый раст у. Æмæ цыфыддæр æлгъыстмæ хъусæм арфæйы хуызы!

Фыццаджыдæр, ирон бардуæгты ранымады Хуыцауæй уæлдæр ничи лæууы æмæ йын зарæджы дæр фыццаг бынат радтын хъæуы! Æмæ ма уый о, фæлæ, «Хуыцауæй фæдзæхст ут» цы амоны, уый зарæгфыссæг дæр æмæ зарæггæнæг дæр зонынц? Уæвгæ йæ адæммæ чи радæтты, уыдон ын йæ мидис сæхæдæг æмбарынц? Гормæттæ! Цæмæн æлгъитут адæмы?! Гъа, иуы ралгъит, дыууæйы ралгъит, фæлæ дын æппæт ирон адæм цы кодтой?! Цы зæгъынмæ хъавын, уый, æвæццæгæн, чидæр бамбæрста, чидæр та — нæ! Нæй гæнæн! Не ‘взаг нæ хæзна у, æмæ йæм искуы-иу хатт фæкомкоммæ вæййæм. Уæдæ ма не ‘рвылбоны хотых уаид, уæдæ ма дзы алы бон дæр пайда кæниккам, кæддæра йæ уыцы иуæй нæ бамбæрстаиккат.

О! О! «Хуыцауæй фæдзæхст ут» уый цыфыддæр æлгъыст у ирон адæммæ. Ома уын Хуыцау мацы дæттæд! Æмæ æз зæгъын: Тобæ, Хуыцау! Иууылдæр Хуыцауæй арфæгонд ут, хорз адæм! Фæдзæхсгæ та кодтой кæмæй?… Алардыйæ! Уымæн æмæ Аларды низты бардуаг у, æмæ-иу кувæг загъта: «Алардыйæ фæдзæхст ут». Ома, низæй хызт ут, уæлдай тынгдæр сывæллæтты фæдзæхстой Алардыйæ. Уæдæ нæ Хуыцауæй чи фæдзæхсы, уый кæцон ирон у? Уыцы ирон æвзаг кæцы скъолайы ахуыр кодта? Йæ адæмы цæмæн æлгъиты? Цæй, Хуыцау ын æй ныббарæд. Æз та, алы хатт дæр уыцы зарæг куы фехъусын, уæд фæзæгъын «Тобæ, Хуыцау, мах — Де уазæг! Мах — Дæ фæдзæхст!»

Ам бафæрсын аипп ма уæд, фæлæ кæдмæ зыгъуыммæ кæндзыстæм нæ ирон уæздан ныхасы уаг, æмæ не ‘взаг кæй нæ зонæм, уый музыкæйы аууон кæдмæ æмбæхсдзыстæм?

Алы зарæджы дæр мацы аирвæза, уымæн уæвæн нæй. Суанг ма Къостайы рæнхъытæ дæр фендæрхуызон кодтой. Æмæ йæ радæттынц радиойæ. Уæд зæгъут, гормæттæ, зарæггæнæгæн, æмæ сраст кæна уæд та ма Къостайы рæнхъытæ. Иугæр ын кæд зæгъæг нæй, уæд, æцæгæйдæр, зарæджы ныхæстæм дæр ничи хъусы. Æмæ, гъа, мæ ныхæстæм ма хъусæнт, фæлæ Къостайы ныхæстæм ма хъусæм, уый бынтон аив нæу! Къостайы ныхæсты цыфæнды музыкæйы зæлтæ дæр хъуамæ ма æмбæрзой. Æви нæ мадæлон æвзаг афтæ ныллæг æрхауд, æмæ ирон дзырдæн аргъ кæнын нал зонæм æмæ нæ адæмон зарджытæ халынмæ дæр уæд бавналæм?

Фыдæй-фыртмæ адæм кæй фæлæгъз кодтой, уыдон дæр рацаразæм, абоны форматы сæ рауадзæм! Фыдæлтæ кæд зарыдысты:

Дæлæ машинæ зæгæлтыл лæууы…

Мæнæн мæ уарзон мæ зæрдыл лæууы.

Хъусут: «зæгæлтыл лæууы» — «мæ зæрдыл лæууы».

Абон та йæ зарæм: Далæ машинæ зæгæлтæ ласы, Мæнæн мæ уарзон мæ зæрдыл лæууы. «Зæгæлтæ ласы» — «мæ зæрдыл лæууы». Нал дæр дзы зæлланг ис, нал дæр æмзæлланг. Æмæ цæмæн хъæуынц зæллангон æмæ æмзæллангон дзырдтæ? Цæуыл сæхи хурхæй мардтой нæ фыдæлтæ? Æнæ æмзæл рæнхъытæй дæр æй куы ис зарæн, уæд! 30-æм азты машинæтæн велосипеды цæлхыты хуызæн цæлхытæ кæй уыд, ома спицæджынтæ, уый ма ныр кæй хъæуы! Уæды æнахуыргонд адæм уыцы спицæты федтой зæгæлты сурæт æмæ уый абоны форматмæ цы бар дары? Абон мах хæдзардзинтæ стæм: машинæ зæгæлтыл дзæгъæлы лæууыны бæсты зæгæлтæ куы ласа, уæд хуыздæр нæу? Искуыдæр ма нæу! Рæнхъыты æмзæлæй та ма цы кæнæм! Рæстæг аивта! Абон ахæм цæлхытæн сæ кой дæр нал ис, æмæ ма уæд зарæджы рæнхъыты чердæм хъæуынц!

Иннæ рæнхъытæ дæр ныззыгъуыммæ кодтам. Адæмон ныхæстæ сты:

Горæты сæрмæ хъæдуры гага,

— Æппынæдзухдæр йæ зæнгыл лæууы

Мæнæн мæ уарзон мæ уды гага, —

Æппынæдзухдæр мæ зæрдыл лæууы.

Куыд аив æмæ куыд лæгъз сты ацы рæнхъытæ дæр «хъæдуры гага» — «мæ уды гага», «йæ зæнгыл лæууы» — «мæ зæрдыл лæууы». Къух бакæнæн дæр сæм нæй, фæлæ, дам, æгæр лæгъз дæр хорз нæу, æмæ йæ зарын райдыдтам:

Горæты сæрмæ хъæдуры гага, —

Æппынæдзухæй йæ хъæдыл лæууы.

Мæнæн мæ уарзон мæ уды гага, —

Æппынæдзухæй мæ зæрдыл лæууы.

Хъæдурæн хъæд кæй нæй, уый нæ фыдæлтæ хорз зыдтой, уымæн æмæ хилгæ æмæ зайгæ цы кæны, уымæн зæнг ис. Уæлдайдæр хъæдурæн, хуымæллæгæн, кæрдæгæн… Суанг ма бæласæн дæр зæнг ис! Хъæд та ис дзæбугæн, фæрæтæн, халамæрзæнæн, белæн, цæвæгæн… Хъæдур кæуыл схилы, уый та иронау хуыйны хъил. Хъæдуры хъилтæ дæр ма сæ хонынц. Уæдæ уæд хъæдур цавæр хъæдыл лæууы? Уæлдайдæр ацы зарæг райгуырд 30-æм азты, æмæ уæд хъилхъæдурæн йæ кой дæр нæма уыд Ирыстоны. Уыдис æрмæстдæр зæххы хъæдур, фæрсыл хъæдур дæр ма йæ хуыдтой. Æппынфæстаг, йæ хъæдыл куы лæууид, абоны зарæггæнджытæм гæсгæ, уæд ын адæм ахæм рифмæ — æмзæл дзырд — ссардтаиккой, æмæ абон мах дисæй мæликкам! Рох кæнын нæ хъæуы, адæмон зарджытæ хъуыдыгæнджытæ æмзæл дзырдтæн, ома рифмæтæн тынг аргъ кæй кодтой!

Суанг-иу æнæхъæн рæнхъытæ æмзæл кодтой.

Дзауы уæрдæттæ тулгæ нал кæнынц,

Махæн не ‘лдæрттæ худгæ нал кæнынц.

Хъуды фæндæгтæ коммæ лæбырынц.

Махæн не ‘лдæрттæ уæрммæ фæбырынц.

Абон сæ ивын райдыдтой. Зæгъæм, ирон адæм зарыдысты:

Тæхуды уымæн йæ къона,

Йæ кæрты суадон кæмæн ис.

Тæхуды уымæн йæ къона,

Йæ фарсмæ уарзон кæмæн ис.

Нæ фыдæлтæ æнахуыргондæй дæр уыдысты уæздандæр æмæ зарыдысты: Тæхуды уымæн йæ къона

Йæ хъæуы уарзон кæмæн ис.

Аив æмæ уæздан ныхæстæ. Лæгæн йæ фарсмæ уарзон куы уа, уæд афтæ диссаг нал у. Уæд æй иууылдæр уынынц. Сусæгдзинад дзы нал ис. Афтæмæй уарзондзинад та йæ сусæгæй фидыдта. Йæ ирондзинад йæ сусæгдзинады уыд æмæ абон ацы зарæджы нæ зарæггæнджыты аив хъæлæсты фæрцы фесæфт. Уæвгæ, ацы зарæг райдайынц афтæ зарын:

Ихджын дæ, ихджын, суадон,

Дæ былтыл цæуын нæу мæ бон…

Уæ цæстытыл ауайын кæнут уыцы зарæггæнæджы: уыциу рæстæг цæуы суадоны былтыл, суадон та йæ сагæхты кæны донвæд.

Æмæ ма сæ иу зарæггæнæг куы зарид, уæд ын ныббыхсæн ис, фæлæ йæ иу иннæйы дзыхæй айсы æмæ йæ, зæгъæн ис, æнæ ахъуыдыгæнгæйæ фæлхат кæны, суанг ма йын йæ интонаци дæр бахъахъхъæны, ома, мæнæн дæр мæ репертуары уа ацы зарæг. Афтæмæй та дæ репертуармæ искæй зарæг куы хæссай, уæд дзы хъуамæ дæхи зæрдæйы æнкъарæнтæ бавæрай, дæхи уагыл æй азарай. Сергей Есенин мæнгæй нæ загъта:

Канарейка с голоса чужого –

Жалкая, смешная побрякушка.

Миру нужно песенное слово

Петь по свойски, даже как лягушка.

Суанты Ким, Хъуылаты Елхъаны, Годжысаты Исахъ æмæ иннæты зарджытæ сæ зæрдæйы уаг æмæ интонацитимæ куы зарай, уæд, кæй зарæг фæлхат кæныс, уыцы зарæггæнæджы аууоны хуызæн дæ æрмæстдæр. Дæхæдæг хъуамæ банкъарай зарæджы алы дзырд дæр, дæ зæрдæйы арфæй йæ хъуамæ сисай!

Кæддæрты-иу наукон-иртасæн институтмæ арæх бауадтæн, сихорыл-иу цай цымдтам Хаханты Дудар, Æлборты Феликс, Бæциаты Агуыдз æмæ æз. Нæ ныхас-иу уыд аивадыл: Дудар æмæ Феликс — композитортæ, Агуыдз — театриртасæг, æз — чиныгуадзæг æмæ поэт. Хатгай-иу нæм карз ныхас рауад. Иу ахæмы та дзурæм зарæджы тыххæй. Дудар дын афтæ: “Тотрадз, ирон æвзаг хъæбæр у зарæгæн: къ-тæ, пъ-тæ, чъ-тæ, хъ-тæ дзы бирæ ис”. Æз Феликсмæ бакастæн, уый дæр цыма разы уыд, афтæ мæм фæкаст уыцы уысм. Æз дын афтæ куы фæкæнин: «Дудар, ды Гуырдзыстоны аивæдты сгуыхт архайæг куы дæ?» «О, о”, — бацин кодта уый, æхсызгон ын уыд, цы хорзæх æм ис, уый кæй зонын. «Уæдæ ма зæгъ, гуырдзиаг æвзагæй ирон æвзагæй кæцы зындæр æвзаг у?» «Кæй зæгъын æй хъæуы, гуырдзиаг, уым хъæлæсонтæ чысыл ис!» «Æмæ уæдæ сæ зарæг афтæ рæсугъд цæмæн у?» Ам Дудар æмæ Феликс кæрæдзимæ бакастысты фæрсæгау, стæй разылдысты мæнырдæм æмæ мæ цæстæнгасæй фæрсынц: цæмæн? «Уымæн æмæ уыдон се ‘взаг зонынц æмæ дзырд сæ зæрдæтæй сисынц. Мах зарæггæнджытæ та дзырд не ‘нкъарынц æмæ æрмæст былтæй зарынц!»

Æмæ абон дæр афтæ кæд нæу, уæд куыд ис мæнæ афтæ зарæн:

Махæн баиу у нæ хæс…

кæнæ:

Мады цæрæнбонæй сомы зæгъут…

науæд:

Куыд хорз фидауы йæ урс разгомы…

Ирон адæммæ уыд разгæмттæ.

Куыд бамбарæн ис мæнæ ацы ныхæстæ:

Кувинаг хистæртæм адæттæм…

Цы у кувинаг? Кувинæгтæ кувгæ скæнынц хистæртæ. Кувæггаг та кæстæртæм адæттынц. Уæд цы у кувинаг? Кувинæгтæ фæзæгъынц, æмæ уыдон дæтгæ нæ вæййынц нæдæр хистæртæм, нæдæр кæстæртæм. Стæй кæд уыцы кувинагæн æнæ дæтгæ нал ис, уæд адæттæм, (амоны дæлæмæ) æмæ хистæртæ дæле бадынц? Чи кæмæ хъуамæ цы адæтта?

Фæтыхсы зæрдæ зондимæ дæуыл…

Зæрдæ фæтыхсы! О, фæлæ зонд цымæ куыд фæтыхсы? Зонд у хъуыды кæнынæн. Мæ зонд фæцыд, мæ зонд ныдздзæгъæлтæ, мæ зонд æй нæ ахсы, фæзæгъынц…

Нæ зарæггæнджытæ ирон адæмон сфæлдыстадыл сæ цæст куы ахастаиккой, уæд дзы федтаиккой залты мит æмæ йæ зæйты мит нæ зариккой, уымæн æмæ зæйæн мит нал ис, зæй аих вæййы.

Цъитийы дон пырхæнтæ кæны бынмæ кæлгæйæ, былмæ кæнгæйæ нæ æрмæст.

Зарæг у, фæнда дæ, нæ дæ фæнда, уæддæр дæм æрвылбон чи бырсы, аивады ахæм хуыз. Æмæ дзы хъуамæ æнæхсæст, схъиуæдздзаг, зынæмбарæн дзырдтæ ма уа. Алы дзырд дæр дзы хъуамæ авд хатты барст уа, алы рæнхъ дæр дзы хъуамæ бæстон нывыл карст уа. Адæмон сфæлдыстады уый бæрæгæй зыны, сæ фыццагон тексттæм сын куы ‘ркæсай, уæд. Нæдæр сæм æфтауын ницы хъæуы, нæдæр æппарын! Абон ног форматы зарæггæнджытæ уый хъуамæ сæ зæрдыл дарой: адæмон зарджытæн хъахъхъæной сæ фыццагон хуыз, сæхи зарджытæ та фæлварой сисын адæмон зарджыты æмвæзадмæ.

Сæлбиты Иринæ мæ уацхъуыды фæдыл йæ уацы раст бахахх кодта: «Нæ фæстæ цы кæстæртæ баззайдзæн, уыдон хъуамæ, мах абон рагон зарджытыл куыд цин кæнæм, афтæ цин кæной абоны зарджытыл æмæ сæ зарой, уымæн æмæ зарæг у фæлтæрты иугæнæг хид».

КОКАЙТЫ Тотрадз,

Цæгат Ирыстоны адæмон поэт

Газет «Рæстдзинад»

Comments are closed, but trackbacks and pingbacks are open.