26-æм апрелы нæ республикæйы уагъд æрцыдис фыццаг зиуы бон. Æфснайæн куыстыты хайад райстой нæ республикæйы министрадтæ, куыстуæттæ æмæ организациты, ахуырадон уагдæтты, афтæ ма хæрзарæзтады комбинаты кусджытæ. Официалонæй зиуы бон горæты æмæ районты райдыдта райсомы дæс сахатæй. Адæм кæд дзыллон æгъдауæй нæ рацыдысты æмæ тынг активон хайад нæ райстой, уæддæр алы рæтты фенæн уыд цæрджыты, уынгты æфснайгæ. Бирæтæ зиумæ рацæуынмæ фæзивæг кодтой, майрæмбоны чырыстон бæрæгбон кæй уыд æмæ зæгъгæ, зæхмæ æвналæн кæй нæ вæййы, уый тыххæй.

Ныр бирæ азты дæргъы апрелы мæйы уагъд фæцæуынц зиуы бонтæ. Адæм бафснайынц уынгтӕ, ныссадзынц алыгъуызон бæлæсты талатæ æмæ дидинджытæ. Афтæ уыд ныр дæр. Цæвиттон, Мыхуыры хæдзары кусджытæ бафс-найдтой уагдоны алыварс, æрæмбырд кодтой брæтты целлофанæй голджытæм æмæ уый фæстæ та, хорз зæрдæйы равгимæ, уагдоны размæ газоны ныссагътой цалдæр хуыз дидинджытæ. Горæты азилгæйæ ма зæрдæ рухс кодта скъолаты активон хайадистæй. Зæгъæм, нæ горæты 5-æм астæуккаг скъолайы ахуыр-гæнинæгтæ сæ ахуыргæнджытимæ фыццаг бафснайдтой скъолайы кæртæн æдтейæ, Чкаловы уынгæй суанг Мамсырайы фырты уынджы онг, уый фæстæ та се ‘фснайæн куыстытæ адарддæр кодтой се скъолайы кæрты.

Цы брæттæ тымбыл кодтой æфснайджытæ, уыдон брондæттæм ластой хæрзарæзтады комбинаты кусджытæ. Зиуы боны æфснайæн куыстытæм рацыдысты райцентры æмæ хъæуты цæрджытæ дæр.

Зиуы бон ма уагъд æрцæудзæнис иннæ къуырийы дæр. Ныфс нæ ис æмæ дзы уæд, абонæй фылдæр адæм хайад кæй райсдзысты горæты ӕмӕ хъæуты сыгъдæгдзинадыл аудыны сæраппонд.

Нæ уацх.

Comments are closed, but trackbacks and pingbacks are open.