8-æм ноябры Президент радон æрвылкъуырион æмбырд ауагъта тыхон структурæты сæргълæуджытæн. Гаглойты Аланæн фехъусын кодтой, къуырийы дæргъы цы бакуыстой, цы мадзæлттæ ауагътой, уыдоны тыххæй. Æмбырды куысты хайад райстой Парламенты Сæрдар Æлборты Алан æмæ Президенты Администрацийы къухдариуæггæнæг Джиоты Алан.

Генералон прокуроры хæстæ æххæстгæнæг Битеты Сергей куыд радзырдта, афтæмæй хыгъдон рæстæджы генпрокуратурæмæ ног хъуыддæгтæ не ’рбарвыстой. Слестгæнæн мадзæлттæ уагъд цæуы, раздæр цы уголовон хъуыддæгты фæдыл цыд дзырд, уыдоны тыххæй.

РГУП «Дорэкспострой»-ы раздæры сæргълæууæг Мæхъиты Семены тыххæй та загъта, зæгъгæ, ис æхсæнадæмон агуырды.

Битеты Сергейы ныхæстæм гæсгæ, йæ дæлбар ведомство бæрæг кæны, хъахъхъæнынады министрады территорийыл цы объекттæ ис, уыдон.

«Контролон мадзæлтты фæстиуджытæм гæсгæ, объектты аргъ у, цы æмбæлы, уымæй 3 милуан 864 мин сомы фылдæр. Фæлæ ууыл куыст нæ фæцис. Генералон прокуратурæ æнхъæлмæ кæсы Контролон-нымайæн палатæйы бæрæггæнæн куыстыты фæудмæ», — банысан кодта генпрокуроры хæстæ æххæстгæнæг.

Дарддæр куыд радзырдта, афтæмæй Хуыбылты Валерийы номыл паркы тыххæй документтæ Генпрокуратурæ арвыста цæгатирыстойнаг специалисттæм.

Битеты Сергей ма радзырдта, 25 азы размæ Мамытайы фырты тыххæй цы уголовон хъуыддаг бакондæуыд, уый тыххæй дæр.

Бæрæг куыд у, афтæмæй Мамытайы фырты аххосджын кæнынц, ивгъуыд æнусы 90-æм азты Цхинвалы районы Дменисы хъæуккаг дыууæ æмбæстаджы кæй амардта, уый тыххæй. Ныртæккæ уый экстрадицигонд æрцыд Уæрæсейæ.

«Уыцы цауы фæдыл слестгæнæн мадзæлттæ кæронмæ бахæццæ сты æмæ иннæ къуыри лæвæрд æрцæудзысты республикæйы Сæйраг тæрхондонмæ», — фехъусын кодта генпрокуроры хæстæ æххæстгæнæг.

«Хыгъдон рæстæджы дæргъы республикæйы территорийыл регистраци æрцыд æрмæстдæр иу фыдракæнд. Ацы хатт дæр барадхъахъхъæнæг органтæн тынг баххуыс „Æдас горæт“-ы системæ. Ацы системæйы руаджы нæ къухы бафтыд æвæстиатæй фыдгæнæджы ссарын», — йæ рады фехъусын кодта мидхъуыддæгты министр Гæззаты Валери. Радзырдта, æнæ психиатрион рынчындонæй цы проблемæтæ æвзæры, уый тыххæй дæр. Хъусдард аздæхта ацы рынчындоны сырæзты актуалондзинадмæ. Уымæн æмæ иуæй-иу фыдракæндтæ саразынц, йæ психикон æнæниздзинадимæ проблемæтæ кæмæн ис, ахæм адæймæгтæ.

Йæ ныхæстæм гæсгæ, барадхъахъхъæнæг органты кусджытæ срегистраци кодтой ахæм фыдракæнд: дыууæ æмбæстаджы фæхыл сты æмæ сæ иу иннæйы кардæй æртæ хатты ныррæхуыста.

«Æз цы хъуыды кæнын, уымæй уыцы адæй-маг цыппæрæм хатт сарæзта ахæм фыдракæнд. Бæрæг у, уымæн йæ психикæимæ проблемæтæ кæй ис», — бафиппайдта министр.

Йæ ныхæстæм гæсгæ, ацы фыдракæнд сбæрæг кодтой, «Æдас горæт»-ы проекты фæлгæтты уынгты конд видеокамерæтæ.«Фыдгæнæг нæ саст йæ фыдгæндыл, фæлæ йæ камерæты руаджы милицийы кусджытæ æрцахстой. Ныртæккæ фыдгæнæг басаст йæ фыдгæндыл», — бамбарын кодта Гæззайы фырт æмæ ма банысан кодта, зæгъгæ, психикон рынчынтæн хосгæнæн уагдон кæй нæй æмæ сæ Цæгат Ирыстонмæ æрвитын кæй фæхъæуы, уый тыххæй сæвзæры стыр проблемæтæ, уыимæ иумæ ма расайынц уæлдай хæрдзтæ дæр.

Министры доклады фæстæ Гаглойты Алан фехъусын кодта, зæгъгæ, Хицауад кусы ацы фарстыл. Цхинвалы горæтгæрон Медико-социалон центры бындурыл баконд æрцæудзæн психиатрион рынчындон.

Фæндæгтыл цæуыны фæткы тыххæй та Гæззаты Валери банысан кодта, зæгъгæ, арæх фистæгæй цæуджытæ сæхæдæг фехалынц фæндæгтыл цæуыны фæткойтæ — фæндаджы иу кæронæй иннæмæ ахизынц æнæран бынæтты æмæ уымæй саразынц аварион уавæр.

«Æвæццæгæн рæстæг æрцыд, фæндагыл цæуыны фæтк чи халы, уыцы фистæгæй цæуджыты ивар кæнынæн. Мах сахуыр стæм, цыфæнды хуыз фæндагон цауты дæр шофыры фæаххосджын кæнын. О, фæлæ арæх фæткхалджытæ вæййынц фистæгæй цæуæг æмбæстæгтæ», — загъта министр Гæззаты Валери.

Уый куыд банысан кодта, афтæмæй æрæджы фæндагон-транспортон цауы аххосджын уыд сывæллон. Уый фæндаджы иу фарсæй иннæмæ хызт æнæмбæлон бынаты. Ныртæккæ бæрæг цæуы, шофыр æмæ сывæллон цас аххосджын уыдысты, уый.

Министрæн Гаглойты Алан бахæс кодта, цæмæй уал æмбæлой цæрджытимæ, уыцы нымæцы фистæгæй цæуæг фæткхалджытимæ æмæ семæ кæной æмбарынгæнæн куыст, уый фæстæ райсдзысты карздæр мадзæлттæ исын, уыцы нымæцы ивар кæнын дæр.

Ныхас цыдис, фос æвæгæсæгæй кæй цæуынц фæндæгтыл æмæ аварион уавæр кæй аразынц, уый тыххæй дæр.

Сæ бакæнгæ куысты тыххæй хыгъд радтой Юстицийы министр Гаглойты Олег, Паддзахадон æдасдзинады комитеты сæрдар Олег Ширан, Паддзахадон таможнæйон комитеты сæрдар Цхуырбаты Мурат.

ОСИАТЫ Индирæ

Comments are closed, but trackbacks and pingbacks are open.