3-æм июны Æлборты Феликсы номыл нæ горæты музыкалон ахуыргæнæндоны залы уагъд æрцыд Дзаттиаты Анисимы мысæн изæр. Мысæн мадзал сорганизаци кодта РХИ-йы Президенты цур ирон национ зарæджы паддзахадон хор æмæ сывæллæтты хоры аивадон къухдариуæггæнæг Къæбысты Сæрмæт. Нацийы ирд минæвар, РХИ-йы адæмон артист Дзаттиайы фырты Ирыстоны дзыллæ йæ фæстаг фæндагыл афæндæраст кодтой 2021 азы 5-æм июлы. Ныгæд æрцыд национ пантеоны.

Мысæн изæрмæ æрбацыдысты РХИ-йы Культурæйы министры  хæдивæг Къацты Филипп, Хицауады уæнгтæ, нæ горæты музыкалон скъолаты æмæ ахуыргæнæндоны ахуыргæнджытæ æмæ ахуыргæнинæгтæ, ныййарджытæ, æхсæнады æмæ интеллигенцийы минæвæрттæ, афтæ ма  Анисимы хиуæттæ  дæр.

Сценæйы къулыл конд уыд Дзаттиаты Анисимы стыр портрет. Мадзал амыдта музыкалон ахуыргæнæндоны директор Гæджиты Жаннæ. «Ирон национ культурæйæн йæхи чи снывонд кодта, ирон музыкалон аивадæн удуæлдай лæггад чи бакодта йæхи базонынхъомæй суанг йæ амæлæты бонмæ, уыдоны фыццæгтæй иу уыд Дзаттиаты Анисим Антоны фырт. Уый райгуырд 1934 азы 20-æм июны Дзауы районы Сыбайы хъæуы. Йæ чысылæй фæстæмæ йæ зæрдæмæ тынг цыд музыкæ, уæлдайдæр та адæмон мелодитæ национ музыкалон инструменттыл æххæст кæнгæйæ. Хистæртæ-иу фæндырыл куы цагътой, уæд-иу чысыл Анисим æрбадт сæ цуры æмæ-иу йæ цæстытæ нал иста фæндырдзæгъдæджы къухты змæлдæй. Авдаздзыдæй лæппу йæхæдæг сæрибарæй цагъта фæндырыл. Ирон зарæг ссис йæ царды нысан, Сыбагомы хосдзæутты зарынмæ хъусгæйæ.  Анисимæн Дунескæнæг балæвар кодта алæмæттаджы стыр аивадон курдиат», – дзырдта мадзал амонæг. РЦИ-Аланийы Ногиры хъæуы астæуккаг скъола каст фæуыны фæстæ бацыд Дзæуджыхъæуы аивæдты ахуыргæнæндонмæ æмæ йæ æнтыстджынæй каст фæцис 1965 азы. Райста дирижер-хормейстеры дæсныйад. Йæ хъæппæрисæй Ногиры хъæуы культурæйы хæдзары арæзт æрцыд зарæггæнджыты хор, фæстæдæр та –  Дзæуджыхъæуы паддзахадон филармонийы. Абон уыцы хорæн къухдариуæгад кæны Дзанайты Ольгæ.  Хуссар Ирыстоны Облæххæсткомы культурæйы хайады фæхуындмæ гæсгæ Анисим кусын райдыдта зард æмæ кафты паддзахадон ансамбль «Симд»-ы æмхæццæ хоры æмæ адæмон инструментты оркестры къухдариуæггæнæгæй. 30 азæй фылдæр бакуыста ансамбль «Симд»-ы.  Ирыстоныл уæззау бонтæ куы ныккодтой, уæддæр цудын нæ бауагъта йæ уарзон къабазы куыст. Хорз æмбæрста, цыфæнды уæззау рæстæджы дæр ирон зарæг бæрзонд хъæлæсæй кæй хъуамæ хъуыса, уый. Хуссар æмæ Цæгат Ирыстоны къухдариуæгад стыр аргъ скодтой музыкалон культурæмæ Анисимы хайбавæрдæн, лæвæрд ын æрцыд РХИ-йы адæмон артист æмæ РЦИ-Аланийы аивæдты сгуыхт архайæджы кадджын нæмттæ. 2010 азы ссис Хетæгкаты Къостайы номыл паддзахадон премийы лауреат. 2006 азы Дзаттиаты Анисимы хъæппæрисæй арæзт æрцыд РХИ-йы Президенты цур ирон национ зарæджы æмæ сывæллæтты паддзахадон хор, кæцыйæн уый æр-мæст къухдариуæггæнæг  нæ уыд, фæлæ ма – рæзгæ фæлтæрæн сæ хъомылгæнæг дæр. Хоры репертуар хъæздыг у хъайтарон зарджытæй. Арæх-иу дзырдта: «Национ хоры зарæг нын нæ зæрдæты райхъал кæны патриотизмы æнкъарæнтæ æмæ æвзонг фæлтæрты монон æгъдауæй æввахсдæр кæны нæ фыдæлты æгъдæуттæм». Уый хорз æмбæрста зарæг лæвæрд кæй цæуы фæл-тæрæй фæлтæрмæ, æмæ Ирыстоны сæрвæлтау йæ цард чи сны-вонд кодта, уыдоныл кæй хъæуы зарджытæ фыссын, цæмæй сын сæ хъайтардзинæдты тыххæй зоной фидæны фæлтæртæ æмæ сæ ма рох кæной.

Сценæйыл ралæууыдысты РХИ-йы Президенты цур ирон национ зарæджы æмæ сывæллæтты паддзахадон хор, йæ аивадон къухдариуæггæнæг Къæбысты Сæрмæты сæргълæудæй. Дирижер сын уыд Мзареулишвили Лианæ. Уыдон  тынг аив сæххæст кодтой зарджытæ «Балцы зарæг» æмæ «Иу Иры хъæбултæ» (музыкæ – Дзаттиаты Анисимы, ныхæстæ – Хетæгкаты Къостайы). Дирижер Гаглойты Варламы къухдариуæгадæй та хор сæххæст кодта «Цæргæс базæронд», «Хъуыбады» (Хетæгкаты Къостайы ныхæстæ, музыкæйыл бакуыста Дзаттиаты Анисим). Афтæ ма сæххæст кодтой Дзигойты Маринæйы фыст зарæг «Город герой – Цхинвал» æмæ Дзаттиаты Анисимы ныхæстæ æмæ музыкæмæ гæсгæ «Аланты фæлтæртæ».

Ирыстоны ахæм къуым нæй ирон фæсивæды зард-иу кæцæй нæ райхъуыст. Анисимæн йæхи комбæсты – Дзауы район дæр курдиаттæй цух никуы уыд. Æрбамбырд кодта курдиатджын фæсивæды æмæ Дзауы районы культурæйы хæдзары сарæзта фольклорон хор. Абон ацы хорæн къухдариуæг кæны Къæбысты Сæрмæт. Сценæмæ фæхуыдтой Дзауы районы фольклорон хоры. Уыдон сæххæст кодтой «Ирæй-Ирмæ» (ныхæстæ Тасойты Ботазы, музыкæ Дзаттиаты Анисимы) æмæ «Нартыхты Сосойы зарæг», (зарæджы ныхæстæ æмæ музыкæ сты адæмон, бакуыста йыл Дзаттиаты Анисим).

Уæздан ирон лæг табу кодта фыдæлты кувæндæттæн. Аргъ кодта чырыстон динæн. Фæндыд æй æмæ йæ бæллиц уыд чырыстон аргъуанæй дæр куы хъуыстаид алайнаг æвзагыл Хуыцауы сыгъдæг ном арыны, кад ын кæныны тыххæй зарджытæ. Æмæ йын ацы фæнд сæххæст кæнын дæр бантыст. Анисим æвæллайгæ куыст бакодта Ирыстоны чырыстон аргъуаны æмæ йæ мелодитыл æвæрд æрцыдысты Хуыцауы Литургийы тексттæ, сфæлдыста 40 аргъуанон мелодийæ фылдæр. Хор сæххæст кодта зарджытæ «Дæуæн зарæм», «Мады Майрæмы зарæг» (Хетæгкаты Къостайы ныхæстæ, музыкæ Дзаттиаты Анисимы) æмæ «Æхсины лæг». Сæххæст ма кодтой Джыккайты Шамилы зарæг, кæцыйæн музыкæ дæр æмæ ныхæстæ дæр ныффыста Дзаттиаты Анисим, «Хосдзауты зарæг» (ныхæстæ æмæ музыкæ сты адæмон), бакуыста йыл Гаглойты Варлам. Афтæ ма тынг хорз сæххæст кодтой зарджытæ «Песня моя Ирыстон», «Терская казачья песня». Банысан кæнын хъæуы уый дæр, æмæ сценæмæкæсджыты зæрдæмæ афтæ тынг фæцыд сæ аивад æмæ сæхæдæг дæр хоримæ зарыдысты, кодтой сын тыхджын къухæмдзæгъд. Хоры цæгъдджыты къорд та сæххæст кодта «Бирæгъзæнгаг хонгæ» æмæ «Тымбыл кафты цагъд». Залы айхъуыст зарæг «Дидин кал Цхинвал» (музыкæ Дзаттиаты Анисимы, ныхæстæ Кокайты Тотрадзы).

Хъæздыгæй-хъæздыгдæр кодта хоры репертуар, тыхджынæй-тыхджындæр кодтой курдиатджын зарæггæнджыты хъæлæстæ. Фæлæ, хъыгагæн, 2008 азы тугуарæн хæсты рæстæджы басыгъд хоры куысты бынат, – Хицауады хæдзары органон зал. Курыхон Анисим æмбæрста, фæсхæст знаджы фыддæрадæн ирон зарæг ноджы бæрзонддæр хъæлæсæй сисын кæй хъæуы, уый. Цæмæй нæ цæрæнбонты цыфыддæр знаг фена ирон лæг цæргæ-йæ дæр æмæ мæлгæйæ дæр заргæ кæй фæкæны, уый. Æмæ Дзаттиайы фырт дывæр хъаруйæ æрæвнæлдта йæ куыстмæ. Уæд та кусын райдыдтой горæты бастдзинады хайады хæдзары æмæ абоны онг дæр репетицитæ фæкæнынц уым иу чысыл хатæны. Банысан кæнын хъæуы уый дæр, æмæ ирон национ зарæджы æмæ сывæллæтты паддзахадон хорæн, цæмæй йæ фидæн ноджы хуыздæр æмæ æнтыстджындæр уа, уый тыххæй сын кæй хъæуы кусынæн алыварсон уавæртæ аразын. 2-æм июны музыкалон ахуыргæнæндоны залмæ чи æрбацыд, уыдон стыр æхцондзинад  райстой мысæн изæры зарæг-гæнджыты аивадæй. Æгæрыстæмæй, сценæмæкæсджытæй бирæтæ нæ зыдтой ахæм дисса-джы курдиатджын зарæггæнджытæ нæм кæй ис, уый  æмæ кæрæдзийæн дисгæнгæйæ дзырдтой сæ тæлмæнтæ, зæгъгæ, мæнæ нæм цæй диссаджы курдиатджын фæсивæд ис.

Дзаттиайы фырты тыххæй йæ мысинæгтæ радзырдта Къацты Филипп. Уый куыд банысан кодта, афтæмæй Анисим йæ цард нæ уыдта æнæ ирон адæмон зарджытæй. «Уынджы дæр-иу æрлæууын кодта æвзонг лæппуты æмæ-иу сæм бахатыд, цæмæй йæм æрбацыдаиккой, музыкалон курдиат сæм ис æви нæ, уый сбæрæг кæныны тыххæй. Афтæ агуырдта ацы сывæллæтты адæмы ‘хсæн, кæцытæ мæнæ абон равдыстой диссаджы концерт. Иу хатт чындзæхсæвы уыдыстæм иумæ æмæ фынджы кæрон базарыдысты æртæ лæппуйы. Анисим сæм йæхи баввахс кодта æмæ сын загъта, зæгъгæ, æз дæр хъуамæ уемæ азарон. Хъуыддаг уый мидæг уыд æмæ лæппутæй сæ иуы зард æмæ хъæлæс йæ зæрдæмæ фæцыдысты æмæ йæ фæхуыдта йæхимæ. 80-æм азты Джыккайты Акимимæ зылдысты хъæутыл æмæ агуырдтой фольклорон зарджытæ, рагон зарджытæ. Гуырдзиаг-ирон хæсты рæстæджы-иу адæм ныккæндтæм лыгъдысты æхстытæй æмæ-иу нæ корпусы цæрæг дыууæ лæджы та сæ куыстмæ уæд бавнæлдтой. Кæсойты Лаврент-иу ныв кæнынмæ фæцис, Дзаттиаты Анисим та-иу пианинойыл цагъта, цыма-иу йæ мæстытæ уымæй ита, афтæ-иу æй фæндыд уыцы æхстыты пианинойы хъæлæсæй банымæг кæнын. Дыккаг бон-иу йæ дзыппæй гæххæтты гæбаз систа æмæ-иу мын загъта, зæгъгæ, мæнæ æхстыты бын æрæмысыдтæн ног музыкæ. Афтæ мæм кæсы æмæ царды ахæм цыдæр ис, кæцыйы мах нæ уынæм, мах æй нæ зонæм æмæ чи амæлы, уыдон цыма кæмдæр æввахс сты махмæ æмæ абон Анисимы хъомылгæнинæгтæ цы аразынц æмæ цы диссаджы аивад æвдисынц, уымæй йæ зæрдæ райы уымы бæсты дæр».

Зæгъын ма хъæуы уый дæр, æмæ Дзаттиаты Анисим хъайтарон характеры зарджытæ кæй ныффыста зынгæ поэт Джыкайты Шамил, РЦИ-Аланийы Горæтгæрон районы раздæры сæргълæууæг Тедеты Павел, зынгæ ахуыргонд Джусойты Нафи, фыссæг Дзаттиаты Тотырбег æмæ æндæртыл. Афтæ ма зарджытæ ныффыста гуырдзиаг-ирон хæсты фæмардуæвæг хъайтар Тасойты Инал æмæ Коцты Грийыл. Ис ын зарджытæ Зары трагедийы тыххæй дæр.

Дзаттиаты Анисимæн бирæ паддзахадон хорзæхтæ лæвæрд æрцыд, фæлæ йæ иууыл стырдæр хорзæхыл нымадта – адæмы хорзæх. Абон не ‘хсæн нал ис куырыхон, уæздан, саламдæттаг, кæстæртимæ кæстæр чи уыд, хистæртимæ хистæр, ирондзинад æмæ фыдæлты фарн йæ дадзинты кæмæн згъордтой, уый – Дзаттиаты Анисим, фæлæ йæ ном цæрдзæн йæ радтæг ирон адæмы зæрдæты. Абон ын йæ ахсджиаг архайд йæ хъомылгæнинаг Къæбысты Сæрмæт æнтыстджынæй кæй дарддæр кæны, уый кæуылты хъуыддаг у.

Мысæн изæры кæрон мадзаламонæг бакаст, Остъаты Алан Анисимыл цы æмдзæвгæйы рæнхъытæ ныффыста, уый:

«Æнæхъуаджы нæ уыд йæ райгуырд.

Цы фæцард – уый лæгау-лæгæй фæцард,

Дзырд та дæттæм Анисимæн йæ разы,

Ирон зарæг – Ирыстоны нæрдзæн!

Æмæ нын зарæгимæ йæ рухс ном дæр цæрдзæн!

Уый фæстæ хор сæххæст кодта зарæг  «Уæ цæрæнбон бирæ», зæгъгæ.

ДЖИОТЫ Екатерина

Comments are closed, but trackbacks and pingbacks are open.