Номдзыд ахуыргонд Дзидзойты Валерийыл сæххæст 70 азы

Ссæдз азы размæ Кæсæг-Балхъары Республикæйæ Цæгат Ирыстонмæ æрбаздæхт дур-дураг лæппу, профессор, дунейыл хъуыстгонд историк Дзидзойты Валери. Дзæвгар рæстæг фæкуыста номдзыд ахуыргонд Кæсæг-Балхъарты республикæйы, бирæ фæлæггад кодта историон зонад æмæ журналистикæйы рæзтæн бынæттон газеттæй сæ иуы кусгæйæ.

Йæ интересты тыгъдад –

æнæхъæн Кавказ

Йæ зонадон интерестæм хауынц Советон Цæдис æмæ нырыккон Уæрæсейы Федерацийы иууыл ныхмæвæрддæр рæстæджытæ. Уæлдай хъусдард кæддæриддæр здæхта кавказаг адæмты историмæ. Фæлæ уæддæр æмæ уæддæр нæ номдзыд ахуыргонды иууыл вазыгджындæр куыстыты сæйраг бынат ахсы Цæгат æмæ Хуссар Ирыстоны баиу кæныны идейæ.

Профессор Дзидзойты Дудары фырт Валери Цæгат Ирыстоны уæлдæр ахуыргæнæндæтты лекцитæ кæсы 1998 азæй фæстæмæ, æмæ уыцы азты дæргъы йæхи фенын кодта бæрзонд, профессионалон æгъдауæй цæттæ æмæ нысанмæздæхт специалистæй йæ фыдыбæстæйы истори æмæ политологийы иууыл карздæр проблемæтæ скъуыддзаг кæнгæйæ.

Цæгат Ирыстоны Паддзахадон Университеты политологийы кафедрæйы бындурыл йæхисæрмагонд зонадон скъола бакæнгæйæ æмæ Цæгат Ирыстоны паддзахадон Университеты, стæй Кæсæг Балхъарты Паддзахадон Университеты дыууæ диссертацион советы активон уæнг уæвгæйæ ахуыргонд-кавказиртасæг бацæттæ кодта дæсгай историон зонæдты кандидаттæ æмæ доктортæ Цæгат Кавказы республикæтæн. Йæ къухдариуæгады бын чидæриддæр зонадон къæпхæн бахъахъхъæдта, уыдон практикон æгъдауæй иууылдæр сты æмбæлон æмвæзадыл специалисттæ. Уыдонæн сæ нымæц раджы ахызт фæндзайæ. Дардыл у уыцы адæмы географи, кæцытæ бæллынц, цæмæй Дзидзойты Валеримæ бахауой аспирантурæ æмæ докторантурæмæ.

Йæ зонадон скъолайы тыллæг

Цæгат Ирыстоны паддзахадон Университеты политологийы кафедрæйы сæргълæууæг æмæ Этнополитикон иртасæнты зонад-иртасæн центры директоры бынаты кусгæйæ бирæ хъару бахардз кодта аспирантурæ æмæ докторантурæтæ бакæныны хъуыддаджы, кæцытæн фæстæдæр азты æмæ абон дæр ис æвæджиауы ахадындзинад. Нæ номдзыд ахуыргонд бындуронæй бауырнын кодта политологийы кафедрæйы «фыдыбæстæйы истори», зæгъгæ, ахæм дæсныйадимæ аспиранурæ бакæныны æнæмæнгхъæуындзинад. 2002 азы банысангонд аспирантурæ йæ дуæрттæ байгом кодта  Дзайныхъты Маринæ, Мсоты Фатимæ, Мæхæмæтты Петр, Ататы Артур, Ирина Кравченко, Гиоты Иринæ, Тауаситы Владимир, Артур Афаунов, Наталья Стеблей æмæ æндæр-тæн, кæцытæ кандидатон диссертацитæ бахъахъхъæдтой æмæ баххæст кодтой куыд Ирыстоны, афтæ Кæсæг-Балхъары æмæ Ставраполы зонадон кусджыты рæнхъытæ.

Банысан кæнын хъæуы, историон доктортæ бацæттæ кæныны хъуыддаджы дæр ын фагæй фылдæр кæй бантыст. Цæгат Ирыстоны паддзахадон Университеты докторон диссертацитæ хъахъхъæныны фæдыл зонадон консультант уыд ахæм докторанттæ: Б.К. Мальбахова (г. Налцыкк), Баликъоты Т. М. , Айларты С.А. (г. Дзæуджыхъæу), З. Р. Кочкарова (г. Ставрополь), З. Ш. Закрияева, Х. Г. Магомедсалихова (г. Налцыкк) æмæ æндæртæн, кæцытæ абон æрмæст профессортæ не сты, фæлæ кусынц Цæгат Кавказы алыгъуызон зонадон организациты къухдариуæггæнджытæй.

Хъæппæристæ æмæ фæстиуджытæ

Цæгат Ирыстоны сыхаг республикæтæн бæрзондквалификациджын кадртæ бацæттæ кæныны тыххæй Дзидзойы фырт хорзæхджын æрцыд зонады къабазы уыцы республикæты иууыл уæлдæр хорзæхтæй. Йæ хуыздæр æмæ ахсджиагдæр хъæппæристы ‘хсæн уæлдай хъусдард æнæаздахгæ нæй Хæххон Паддзахадон Аграрон Университеты юридикон факультетæй истори æмæ паддзахады бартæ æмæ теорийы кафедрæ саразыны реорганизацийы хъуыддагмæ, кæцы, йæ хъæппæрисæй, æрмæст паддзахады теори æмæ политологийы бартæй не ‘рцыд ивд, фæлæ ссис иунæг ахæм кафедрæ, цыран гæнæн ис диссертаци сæдæ процентæй бахъахъхъæнын.

Уымæй дæр, Хæххон Паддзахадон Аграрон Университетмæ йæ фыццаг къахбавæрдæй фæстæмæ бындуронæй ныффидар кодта, цыфæнды классикон университеты, уыцы нымæцы  Хæххон Паддзахадон Аграрон Университеты дæр æрмæст юридикон факультеты нæ, фæлæ алы факультеты дæр кæй хъуамæ уа политологийы предмет. Банысан кæнын хъæуы уый дæр, паддзахадон аттестаци дзы ауадзыны фæстæ мæскуыйаг авторитетон къамис аккаг аргъ кæй скодта, банысангонд уæлдæр ахуыргæнæндоны  политологийы предмет кæй ахуыр кæнынц, уымæн. Хъуамæ банысан кæнæм уый дæр, ацы предметы фæдыл уый кæй рауагъта дæсгай зонадон куыст æмæ ахуыргæнæн- методикон чиныджы, кæцытæй пайда кæнынц студенттæ æмæ аспиранттæ. Политологийы фæдыл ын цы зонадон куыстытæ ис, уыдоны тыххæй лæмбынæгдæр куы дзурæм, уæд уыдон мыхуыры цæуынц Уæрæсейы Федерацийы Уæлдæр Аттестацион Къамисы нывæстмæ хауæг алыгъуызон  академион зонадон журналты.

Дзидзойы фырты удыхъæды бирæ тæхудиаджы миниу-джытæ ис. Йæ сæйраг тæхудиаджы миниуæгæн схонæн ис бæрзондквалификациджын специалисттæ æмæ зонадон кусджытæ цæттæ кæныны хисæрмагонд системæ. Уый алы æмæ алы æмвæзадтыл рамбылдта цалдæр гранты. Ноджы фылдæр гранттæ та рамбылдтой йæ зонадон скъолайы минæвæрттæ. Уый у зонадон скъолайы къухдариуæггæнæг æмæ æрвылаз дæр конкретон фæстиуджыты фæрцы бафидар кæны къухдариуæггæнæджы къæпхæн æмæ æмвæзад. Ссæдз азæй фылдæр кусы Дзæуджыхъæуы, цыран дзæвгар азты уыд Цæгат Ирыстоны Паддзахадон Университеты политологийы кафедрæйы сæргълæууæг, Этнополитикон иртасæнты зонад-иртасæн центры директор, историон факультеты декан, Цæгат Ирыстоны Паддзахадон Гуманитарон Иртæстыты Зонадон Институты Кавказаг адæмты историйы хайады сæргълæууæг æмæ афтæ дарддæр.

Æнæмæнгхъæуæг у банысан кæнын, бирæ азты фæстæ Дзидзойты Валерийы хъæппæрисæй Цæгат Ирыстоны  Паддзахадон Гуманитарон Иртæстыты Институты кæй байгом аспирантурæ «Фыдыбæстæйы истори», зæгъгæ, ахæм дæсныйадимæ. Уыцы аспирантурæ йæ къухдариуæгады бын каст фесты æмæ историон зонæдты кандидаттæ систы: Дарчиты С. В., Р. М. Никаев, Гатеты В. М., А. В. Сичкарь æмæ æндæртæ. Уый йæхæдæг дæр æмæ йæ ахуыргæнинæгтæ дæр иудадзыг сты ног идейæты æмæ ног, æнæкуыстгонд зонадон проблемæты агурæнты.

Ног зонадон агурæнтæ

Ныр дзæвгар азты дæргъы нæ номдзыд ахуыргонд архайы, стыр энерги кæмæ ис, ахæм аспирант ссарыныл, кæцыйæн йæ бон бауыдзæн, бынтондæр иртæст чи нæма æрцыд, фæлæ актуалон чи у, ахæм зонадон проблемæ раиртасын, кæцы баст у 1939-1940 азты Советон-финландиаг хæсты Ирыстоны минæвæртты хайадистимæ.

Цæвиттон, ацы зонадон хæс кæй бæрны бакодта, уыцы дыууæ аспирантæн сæ бон нæ бацис куысты алыгъуызон этапты æмæ аххосæгтæм гæсгæ сæ зонадон къухдариуæг-гæнæджы хæс сæххæст кæнын. Æмæ хæрзæрæджы Дзидзойты Валери Цæгат Ирыстоны Паддзахадон Университеты аспирантурæйæ фæхуыдта иу Хуссарирыстойнаг æрыгон чызджы, кæцы кусдзæн ацы цымыдисон æмæ актуалон зонадон проблемæйыл.

Бузныг ахуыргæнджытæн

Ахæм цæвиттонтæ гæнæн ис æрхæссæн тынг бирæ. Æнæмæнгхъæуæг у банысан кæнын, Дзидзойы фырт зындгонд ахуыргонд-кавказиртасæг кæй ссис йæ ахуыргæн-джыты иууыл хуыздæр миниуджытæ исгæйæ – бæрзонд профессионалондзинад, ныхас кæныны культурæ, æрдзон интеллект, историон факттæ равæрыны логикæ æмæ афтæ дарддæр.

Йæ ахуыргæнджытæй æрмæст Хетæгкаты Къостайы номыл Цæгат Ирыстоны Паддзахадон Университеты про-фессортæ Тототы М. С., Тедтойты А. А., Саламты Б. С.-йы кой нæ ракæндзыстæм фæлæ Сергей Есенины номыл Рязаны Паддзахадон Университеты профессорты дæр – Е.Н. Оскольков, М. С, Чигринский, А. И. Козлов æмæ æндæрты. Уыдоны къухы ахуыр кæнгæйæ, Рязаны Паддзахадон Университеты Квалификаци фæбæрзонддæргæнæн институты куы уыд, уыцы рæстæджы. Дзидзойы фырт стыр æхсызгонæй æрымысы, квалификаци фæбæрзонддæр кæныны курсытæ ма кæм рацыд, уыцы  Мæскуыйы Паддзахадон Университет æмæ Ленинграды Паддзахадон Универститеты бирæнымæц профессорты дæр. Æппæт уыдæттæ æвдисæн сты, Дзидзойты Валери кæй зоны аргъ кæнын, зонындзинæдты дунейы дуæрттæ йын чи бакодта, уыдонæн, уæлдайдæр та ахæмтæн, уыдоны ‘хсæн уæлдай курдиатджындæр педагогтæ чи уыд, райдайæг ахуыргонд тæхудиа-джы цæвиттон кæмæй иста. Уыдонæй йын бирæтæ абон дæр сты стыр цыты бынаты.

Цæгат Кавказы Федералон Зылды субъекттæн зонæдты кандидаттæ æмæ доктортæ

Иу диссаджы миниуæг ма ис Дзидзойты Валеримæ: йæ зонадон æмæ æмбæстагон хъæппæристæ ахъазгæнæг сты адæмты хæлардзинад фидардæр кæнынæн. Конкретон цæвиттоны хуызы гæнæн ис скæнæм иу хъæппæрисы кой, кæцы здæхт у Цæцæны республикæйы зонæдты кандидаттæ æмæ доктортæ цæттæ кæнынмæ. Æнæмæнгхъæуæг нæу, цæмæй лыстæггай æрдзурæм Цæцæны Республикæйы Советон Цæдисы ныппырхы фæстиуæгæн чи фæзынд, уыцы проблемæты, æмткæй сисгæйæ цæцæйнаг адæмы тыххæй. Нæ иумиаг бирæнационалон Райгуырæн бæстæйы ныппырхимæ ныппырх Цæцæн-Мæхъæлы республикæ дæр, кæцыйы территорийыл фæзынд дыууæ республикæйы: Цæцæйнаг Республикæ æмæ Мæхъæлы Республикæ. Хицæндзинад уыд æрмæстдæр уый мидæг, Мæхъæлы Республикæ кæй баззад Уæрæсейы Федерацийы сконды, Цæцæны республикæ та райста йæ хæдбардзинады Деклараци. Хуымæтæджы æвзагæй дзургæйæ, Цæцæны Республикæ рахызт Уæрæсейы Федерацийы скондæй, кæцы расайдта  дыууæ æмбæстагон æмæ æхсæннацион хæст.

Уыцы вазыгджын уавæры, цыран бахауд фæсконфликтон Цæцæйнаг Республикæ, æнæмæнгхъæуæг уыд, хъуагдзинад кæмæй æййæфтой, ахæм бæрзондквалификациджын зонадон кадртæ цæттæ кæнынмæ уæлдай хъусдард аздахын. Ацы фарст аскъуыддзаг кæнынмæ сæм фæзындысты иуæй-иу ахуыргæндтæ куыд Мæскуыйæ, Ростов-Донæй, афтæ Дзæуджыхъæуæй дæр, кæцыты ‘хсæн уыд профессор Дзи-дзойы фырт. Афтæ æмæ йæ зонадон къухдариуæгады бын кандидатон æмæ докторон диссертацитæ бахъахъхъæдтой Махмудова К. З., Изрипова Е. А., Хамурзаев И. С., Исакиева З. С. æмæ æндæртæ, кæцытæ абон æнтыстджынæй кусынц Цæцæны Республикæйы алыгъуызон уæлдæр ахуыргæнæндæтты.

Кæронбæттæны ма мæ фæнды банысан кæнын, Дзидзойты Валери æрмæст Ирыстоны нæ, фæлæ æнæхъæн Цæгат Кавказы дæр кæй у иунæг ахæм ахуыргонд, кæцыйæн кадджын ном «профессор» лæвæрд æрцыд æртæ дæсныйадмæ гæсгæ: фыдыбæстæйы истори, политологи æмæ паддзахады теори æмæ бартæ.

ДРИАТЫ Арсен

Comments are closed, but trackbacks and pingbacks are open.