Зынаргъ æмбæстæгтæ! Нымад бонтæ ма баззад 2017 азы дыккаг æмбисæн бынæттон периодикон мыхуыр рафыссыны æмгъуыдмæ. Уымæ гæсгæ уæ курæг стæм, цæмæй уæ ма ферох уа, нæ республикæйы мыхуырцæуæг иунæг ирон газет «Хурзæрин» афойнадыл рафыссын. Кæд ныртæккæйы уæззау æмæ вазыгджын царды алцыдæр фæзынаргъ æмæ бонæй бонмæ ноджыдæр зынаргъдæр кæны, уæддæр бынæттон периодикон мыхуыры фæрæзтæ нæ фæзынаргъ сты. Æрдæг азæн газет «Хурзæрин»-ы рафыссыны аргъ у æрмæстдæр 330 сомы.

Абоны онг газеткæсджыты фылдæр хай хъуамæ рафыстаиккой бынæттон газеттæ æмæ журнал, фæлæ нын «Югосетпечать»-ы хистæр Саулохты Зоя куыд фехъусын кодта, уымæ гæсгæ бынæттон периодикон мыхуыры фæрæзтæ рафыссыны хъуыддагæй нырма нæ рухс кæны зæрдæ.  «Ивгъуыд азимæ абар-гæйæ, ныртæккæ бынæттон газеттæ рафыссыны хъуыддаг ноджы февзæрдæр. 22-æм июнмæ газет «Хурзæрин» рафыстой æр-мæстдæр 215 экземпляры æмæ газет «Южная Осетия» та  367 экземпляры. Абоны онг нæм министрадтæй дæр ничима æрбавдыста куырдиæттæ, æцæг Ахуырады министрад рафыста 5 газеты æмæ Æвзонг натуралистты станц дæр рафыста цалдæр газеты. Нырма сæ бæ-рæггæнæнтæ не ‘рбавдыстой нæ республикæйы  районтæй дæр. Фæнды мæ бахатын министрадтæ æмæ ведомствоты къухдариуæггæнджытæм, афтæ нæ республикæйы цæр-джытæм дæр, цæмæй афойнадыл рафыссой бынæттон мыхуыры фæрæзтæ. Зынаргъ газеткæсджытæ, нымад бонтæ ма баззад 2017 азы дыккаг æмбисæн газеттæ рафыссыны æмгъуыдмæ, æмæ уæ курæг дæн, цæмæй бæрнондæр ахаст равдисат ацы ахсджиаг процессмæ. Фæнды ма мæ иу ахсджиаг хъуыддагыл æрдзурын. Цæвиттон, ивгъуыд аз хуссарирыстойнаг дзыллон информацийы фæрæзтæ ист æрцыдысты каталогæй, Цæгат Ирыстон-Аланийы  цæрджытæн  нал ис хуссарирыстойнаг  газеттæ  æмæ  журнал рафыссыны фадат. Ацы фарсты фæдыл нæм Цæгат Ирыстоны цæрджытæй бирæтæ бахатынц, фæлæ мах бон нæу ацы фарст аскъуыддзаг кæнын. Ацы фарст хъуамæ скъуыддзаг æрцæуа хицауады æмвæзадыл», — загъта Саулохты Зоя.

«Югосетпечать»-ы хистæры ныхæстæм гæсгæ газеткæсджытæ периодикон мыхуыры фæрæзтæ фылдæр рафыссынц, куыстмызд куы райсынц, уый фæстæ. Фæлæ ма  йæ но-джыдæр зæгъон, 330 сомы ахæм стыр æхца нæу, æмæ йæ бавгъау кæнæм. Ныр та мадæлон æвзаджы тыххæй.

Мадæлон æвзаг мады ад хъуамæ кæна ирон адæмæй алкæмæндæр. Йæ мадæлон æвзагыл чи нæ дзуры,  ирон газет чи нæ кæсы, уый нæдæр йæхи, нæдæр йе ‘мтуг адæмы æмæ нæдæр йæ райгуырæн зæхх уарзы æцæг уарзтæй. Алы адæймагæн дæр æппæты зынаргъдæр хæзнатæ сты йæ Райгуырæн бæстæ æмæ йæ мадæлон æвзаг. Мадæлон æвзаг, Фыдыбæстæ, ныййарæг мад — алы нацийæн дæр Хуыцауæй лæвæрд сты, æмæ сæ алчидæр хъуамæ уарза. Мадæлон æвзаг алкæмæндæр мады ад хъуамæ кæна, ный-йарæг мады хуызæн æй хъуамæ уарза, афтæ куынæ уа, уæд нацийы фидæнæн хорз фæстиуджытæ никуы вæййы. Ацы хуымæтæг  æцæгдзинад æмбаргæйæ, не ‘ппæты хæс дæр у мадæлон æвзагмæ хуыздæр æмæ уарзæ-гойдæр ахаст дарын. Алы нацийæн дæр йæ мадæлон æвзаг у йæ иууыл стырдæр хæзна, уымæ гæсгæ йæ хъуамæ хъахъхъæна цæсты гагуыйау, авгау ын æрхауынæй хъуамæ тæрса. Хъуамæ ирон адæм сæ зæрдыл дарой æмæ сæ иу уысм дæр рох ма хъуамæ уа, ирон адæмы кадджын фырт, стыр ахуыргонд æмæ стыр адæймаг Абайты Васойы фæдзæхст: «Бæлас акæлы, йæ уидæгтæ йын зæххæй куы стонай, уæд. Æвзаг амæлы, йæ уидæгтæ йын бинонты ‘хсæн куы сыскъуынай, уæд. Уымæ гæсгæ, ирон лæг, де ‘взаг хъахъхъæн дæ бинонты ‘хсæн». Ацы ахсджиаг фæдзæхст зæрдыл даргæйæ, махæй алчидæр хъуамæ тырна йæ мадæлон æвзагыл дзурынмæ æмæ ирон мыхуыры фæрæзтæ кæсынмæ.

Фæлæ, хъыгагæн, алкæцы адæймаг нæ аргъ кæны йæ мадæлон æвзагæн. Уымæн ирд æвдисæн у уый дæр, æмæ нæ республикæйы уагъдцæуæг иунæг ирон газет «Хурзæрин»-æн йæ тираж уырыссаг æвзагыл мыхуырцæуæг газетты тиражимæ абаргæйæ, иууыл къаддæр кæй вæййы. Алы ирон адæймаг дæр хæсджын у, цæмæй аргъ кæна йæ мадæлон æвзагæн æмæ кæса ирон æвзагыл нæ республикæйы уагъдцæуæг иунæг ирон газет «Хурзæрин». Æвзаг у адæмы уд. Нæй æвзаг — нæй адæм. Уымæ гæсгæ æвзаджы бахъахъхъæнын у куыд хицауады органты, афтæ адæмæн дæр сæ фыццаградон хæс. Не ‘взаг та бахъахъхъæндзыстæм, кæд æмæ йыл иууылдæр дзурæм æмæ кæсæм ирон периодикон мыхуыр, уæд. Хъуамæ нæ алчидæр уарза æмæ кад кæна ирон æвзаг æмæ литературæйы бындурæвæрæг Хетæгкаты Къоста цы æвзагыл сфæлдыста йе нæмæлгæ уацмыстæ, уымæн.

Зынаргъ газеткæсджытæ, бахатут, уæ хиуæттæй, уæ зонгæтæй ирон газет чи нæ рафыссы, уыдонмæ, цæмæй рафыссой æмæ кæсой ирон æвзагыл нæ республикæйы мыхуырцæуæг иунæг ирон газет «Хурзæрин» æмæ афтæмæй сæ кæстæрты цайдагъ кæной мадæлон æвзаг уарзыныл æмæ йын аргъ кæныныл.

Не ‘мбæстæгтæй курæг стæм, цæмæй мадæлон æвзаджы тыххæй ма бавгъау кæной 330 сомы æмæ алчидæр рафысса ирон газет «Хурзæрин». Табуафси, ма фæзивæг кæнут, æрбацæут, «Югосетпечать»-мæ, кæнæ газеттæуæйгæнæн киосктæм æмæ рафыссут газет «Хурзæрин».

Джиоты Е.

Comments are closed, but trackbacks and pingbacks are open.