Мæ мадæлон æвзагыл уагъдцæуæг иунæг газет «Хурзæрин»-ы фенд мын вæййы райсомæй сæуæхсиды хуры тыны фендау. Хæрз чысылæй мын бауарзын кодтой мæ ныййарджытæ  мæ мадæлон æвзаг. Абоны онг дæр æй мæ зæрдыл бадардтон, мæ ныййарджытæ-иу алыхатт дæр кæй рафыстой уæды рæстæджы дæр ирон æвзагыл уагъдцæуæг иунæг ирон газет «Советон Ирыстон».

Ирон газет чи нæ уарзы æмæ йæ  æппындæр чи нæ кæсы, ахæм ирæттæ зын бамбарæн сты. Уыдон цæй ирæттæ сты! Наци æвзагæй наци у. Æнæхъуаджы куынæ фыста мыййаг ирон адæмы сæрхъызой Абайты Васо мæнæ ахæм ныхæстæ: «Нæй æвзаг — нæй наци». Уымæ гæсгæ алы ирон адæймаг дæр хъуамæ уарза æмæ кад кæна нæ мадæлон æвзагыл уагъдцæуæг иунæг газет «Хурзæрин»-æн.

Æз каст фæдæн ХИПИ-йы райдиан кълæсты педагогикæ æмæ методикæйы факультет. Ахуыры æмрæнхъ куыстон Цъинагары астæуккаг скъолайы пионерты раздзогæй. Никуы мæ рох кæнынц нæ куырыхон комбæстаг Мæргъиты Алексийы ныхæстæ. Уыцы рæстæджы уый куыста Ленингоры райкомы ахуыры хайы сæргълæууæгæй æмæ-иу  арæх фæуазæг не скъоламæ.  Адæймаг йæхицæй куы æппæла, уый мæм рæсугъд нæ кæсы, фæлæ-иу мæм уыдон цы фарстытæ лæвæрдтой, уыдонæн дзуапп кодтон алыхатт дæр. Арæх-иу мын дзырдта, зæгъгæ, дам, ды хъуамæ ноджы дæ ахуыр адарддæр кæнай. Æрмæст иу факультетыл, зæгъ, ма æрлæу. Йæ ныхæстæ мæм бахъардтой æмæ  ма ноджы каст  фæдæн ХИПИ-йы историон факультет дæр. Куыд ахуыры, афтæ куысты рæстæджы дæр мæ зæрдæ никуы сивтон мæ мадæлон æвзагыл. Уæдмæ нæ районы дæр мыхуыры цæуын райдыдта газет «Ленинон» æмæ сдæн йæ активон газеткæсæг, уыцы иурæстæджы мæ уацтæ мыхуыры цыдысты йæ фæрстыл дæр. Мæ уацтæ ма-иу арвыстон газет «Советон Ирыстон»ы редакцимæ дæр æмæ иу мын сæ мыхуырæн куы саккаг кодтой, уæд-иу мæхицæй амондджындæр никæйыуал æнхъæлдтон. Абоны онг дæр мæ уацтæ мыхуыры рацæуынц газет «Хурзæрин»-ы фæрстыл. Уый тыххæй мæ стыр бузныг фæнды зæгъын газеты кусджытæн. Æппæт ме ‘мбаргæ царды алыхатт дæр æнхъæлмæ кастæн æмæ ныр дæр фенхъæлмæ кæсын, постхæссæг нæм газеттæ кæд æрбахæсдзæн, уымæ. Уымæн æмæ цыфæнды фæлладæй дæр «Хурзæрин» мæ къухмæ куы райсын, уæд мæ фæллад æрбайсæфы.

Мæнмæ дисау кæсы ирон газет чи нæ рафыссы, уыдоны хъуыддаг. Ау, куыннæ хъуамæ исай не ‘взонг республикæйы уагъдцæуæг иунæг ирон газет «Хурзæрин», уымæй дæр йæ аргъ абоны æргътимæ абаргæйæ у хæрзчысыл — 330 сомы. Цæмæн хъæуы хатын ирон газет рафыссыны тыххæй. Йæ рафыссын у алы ирон бинонты хæс дæр. Хæдзары бинонты ‘хсæн рæзгæ фæлтæр ирон газет кæсгæ куынæ уыной сæ ныййарджыты, уæд уыдон куыд хъуамæ аргъ кæной сæ мадæлон æвзагæн.

Ацы аз октябры мæйы кæрон Дзæуджыхъæуы уагъд æрцыд ирон адæмы æнæрадон съезд. Съездæн дæр йæ сæйраг нысан уыд мадæлон æвзаг бахъахъхъæнын. Фæлæ ирон адæмæй алкæмæ бахъардзæн ацы ахсджиаг фарст, уый зын зæгъæн у. Мæ уацы ма мæ бузныг зæгъын фæнды профессор Битарты Зояйæн. Уый æвæллайгæ куыст  кæны мадæлон æвзаг бахъахъхъæныны тыххæй.

Нымад бонтæ ма баззад ног азы æрбалæудмæ. Уымæ гæсгæ æз сидын не ‘мбæстæгтæй алкæмæ дæр, цæмæй йæ мадæлон æвзаг чи уарзы, уыдон рафыссой газет «Хурзæрин»  2018 азæн.

Уалыты Зоя,

Цъинагар

Comments are closed, but trackbacks and pingbacks are open.