Куыд ма хъусын кодтам, афтӕмӕй амӕйразмӕ Чъехы къанау фехӕлд, Уелиты хъӕумӕ цы хахх цӕуы уыцы бынаты ӕмӕ доны иу хай ӕххӕст гуырахстӕй нал хӕццӕ кодта кӕронмӕ. Уавӕр уалдзӕджы бынаты бабӕрӕг кодтой республикӕйы разамонӕг кусджытӕ Президент Бибылты Анатолийы разамындӕй. Уӕд аскъуыддзаг кодтой, цӕмӕй дзы бакӕной ӕнӕмӕнгхъӕуӕг куыстытӕ ӕмӕ донхӕры дон ӕнӕкъуылымпыйӕ цӕуа Цхинвал ӕмӕ Знауыры районты хъӕутӕм.

Фӕлӕ, доны ахсджиагдзинад ӕнкъаргӕйӕ, фӕстӕдӕр бауынаффӕ чындӕуыд, цӕмӕй куыстытэе ӕргъӕвд ӕрцӕуой фӕззӕгмӕ. Паддзахадон унита­рен куыстуат «Мелиораци»-йы коллектив (йӕ хистӕр Хуыгаты Владимир) сентябры мӕйы кӕрон бавнӕлдтой къанауы арӕзтадон-цалцӕггӕнӕн куыстытæ ӕххӕст кӕнынмӕ ӕмӕ уал сын бантыст иуӕй-иу ахсджиаг куыстытӕ ахицӕн кӕнын. Хуыгайы фырт куыд радзырдта, афтӕмӕй арӕзтады иумиаг дӕргь у 70 метры. Сӕхимӕ куыстытӕ бакӕнынӕн хъӕуӕг техникӕ кӕй нӕй, уымӕ гӕсгӕ кусынц алыгъуызон ӕххуырсгӕ техникӕйы фӕрцы. Райдианы уал асыгъдӕг кодтой бынат, бацархайдтой фӕзуат схӕрзарӕзт кӕныныл, цӕмӕй куыстытӕ ӕххӕст кӕнынӕн уа ӕнцонвадат.

Уый фӕстӕ та бавнӕлдтой къанауы арӕзтадмӕ, зӕгъын хъӕуы, йӕ зӕронд бетон ын иууылдӕр кӕй ныппырх кодтой. Уый фӕстӕ дзы райдыдтой бетонон куыстытӕ ӕххӕст кӕнын. «Мелиораци»-йы хистӕр куыд бафиппайдта, уымӕ гӕсгӕ, куыд ӕнхъӕл уыдысты, афтӕ хуымӕтӕг нӕ рауадысты куыстытӕ. Кусджытӕ кусынц хъаруджынӕй ӕмӕ къанауы арӕзтад эксплуатацимӕ лӕвӕрд ӕрцӕудзӕн иу мӕйы фӕстӕ, уӕд рацӕудзӕн донхӕры дон дӕр.

ХУЫБИАТЫ Никъала

Comments are closed, but trackbacks and pingbacks are open.