Цхинвалы Республикæйы Сывæллæтты сфæлдыстадон галуаны уыд номдзыд ирон лингвист-ахуыргонд Абайты Васойы номыл Республикон зонадон практикон конференци «Шаг в науку»-йы хайадисджыты схорзæхджын кæныны церемони.

Мадзалы хайад райстой Хицауады Сæрдары хæдивæг Пухаты Эрик, Ахуырад æмæ зонады министр Гасситы Натали, Республикæ Хуссар Ирыстоны президенты цур сывæллæтты барты фæдыл æххæстбарджын Козаты Гульнарæ, ХИПУ-йы профессортæ æмæ ахуыргæнджыты сконды минæвæрттæ, РХИ-йы зонадон-иртасæн институты минæвæрттæ, скъолаты ахуыргæнджытæ, афтæ ма зонадон куыстыты автортæ.

Мадзалы райдианы Сывæллæтты сфæлдыстадон галуаны директор Джиоты Арянæ æрсидт æрæм-бырдуæвджытæм, цæмæй æдзæмæй алæугæйæ ссарой æрæджы Ту-154 – йы уæлдæфон æнамонд цауы аххосæй чи фæмард, уыдон, стæй Турчы Уæрæсейы Уæлвæткон æмæ Æххæстбарджын минæвар, Уæрæсейы хъайтар Андрей Карловы рухс нæмттæ.

«Уæрæсейы рыст нæ рыст у», – банысан кодта уый.

Мадзалы рæстæджы бакастæуыд зонадон-практикон конференцийы алыгъуызон фадгуыты цымыдисон докладтæ, куыд: армæмхиц-декоративон аивад, аивзонынад, истори æмæ археологи, бæстæзонынад æмæ этнографи, культурæзонынад æмæ социологи, техникон аивад, Хуссар Ирыстоны экономикæ, билоги, математикæ æмæ информатикæ, физикæ.

Конференцийы хайадисджытæ хорзæхджын æрцыдысты дипломтæй æмæ зæрдылдарæн лæвæрттæй.

Дарддæр Джиоты Арянæ бузныджы ныхæстæ загъта конференцийы хайадисджытæн æмæ банысан кодта, зæгъгæ Галуаны архайды хæстæй иу у курдиатджын хайджын сывæллæтты сбæлвырд кæнын æмæ уыдонимæ куыст райтынг кæнын.

«Ацы хæсы фæлгæтты махмæ уагъд цæуынц алыгъуызон конкурстæ, интеллектуалон хъæзтытæ, – бæлвырдæй загъта уый.  Сæрмагондæй мæ зæгъын фæнды, махмæ «Зонды къуыбар»-ы хъазт куыд райтынг, уый тыххæй. Уый махмæ ис ныр 4 азы дæргъы. Абон пленарон рабадты мах дипломтæй схорзæхджын кодтам 30 зонадон куысты авторы, æмæ уыдонæй асты автортæ махмæ цыппар азы размæ æрбацыдысты «Зонды къуыбар»-ы хъазтмæ.

Галуаны сæргълæууæг банысан кодта, зæгъгæ хъазты финалисттæ систы «Чысыл академийы» хъусджытæ.

«Сæ куыстæй æмæ ацы конкурсы сæ абоны рæлæудæй уыдон равдыстой, «академик»-ы номы аккаг кæй сты», – загъта уый.

Галуаны директор банысан кодта, зæгъгæ сывæллæттимæ кусыны охыл хуынд æрцæуынц канд Галуаны кусджытæ нæ, фæлæ ма Республикæйы зонадон архайджытæ.

«Сæрмагондæй, нæ «академиктимæ» дыууæ азы дæргъы кусынц нæ зонадон интеллигенцийы минæвæрттæ  Цыбырты Маринæ, Гаглойты Иринæ, Гæззаты Лианæ, Хъуылымбегты Роберт, Битарти Зоя, æмæ сæ мах уый тыххæй стæм стыр бузныг,- бафтыдта ма йæ ныхасмæ Джиоты чызг.  Хицæн бузныджы ныхæстæ мæ фæнды зæгъын Битарти Зояйæн, уымæн æмæ уый у нæ зонадон консультант»

Мадзалы рæстæджы ма æрыгон «академиктæн» лæвæрд æрцыдысты æвдисæндартæ «Чысыл академийы» æххæст курс кæй фесты, уый фæдыл.

Гасситы Натали бузныджы ныхæстæ загъта зонадон-практикон куыстыты конкурсы бындурæвæрджытæ Уанеты Захары номыл Хуссар Ирыстоны зонадон-иртасæн институт æмæ Тыбылты Алыксандры номыл Хуссар Ирыстоны Паддзахадон университеты кусджытæн.

«Æхцонæй мæ фæнды банысан кæнын, ацы диссаджды проект бонæй-бон тыхджындæр кæй кæны, æмæ йæ фæстиуджытæ та – цæстуынгæ æмæ ахадгæдæр, – банысан кодта Гасситы чызг.  Абон уынæм, уыцы куыстытæн æцæгæйдæр кæй ис иртасæн нысаниуæг».

Дарддæр министр схорзæхджын кодта конференцийы хайадисджыты къухдариуæггæнджыты Ахуырад æмæ зонады министрады грамотæтæй.

Ахуырад æмæ зонады министры хæдивæг Гаглойты Элисæ банысан кодта, зæгъгæ ахуырдзаутæ ацы аз равдыстой фаронæй хуыздæр цæттæдзинад.

«Махæн абон сæрыстырæй зæгъыны фадат ис, нæ сывæллæттæн сæ бон кæй у зонады сæхи сæрибарæй равдисын, сæ позици раргом кæнын, сæхи сæрмагонд уагæвæрдтæ бафидар кæнын, – загъта Гаглойты чызг.  Уый æцæгæйдæр у тынг ахсджиаг, æмæ махæн ис, сæрыстыр цæмæй уæм, уый. Абон махæн ис Хуссар Ирыстоны зонадон-иртасæн институт æмæ Хуссар ирыстоны Паддзахадон университет – нæ сабитæ сæхи кæм равдисой, уыдон».

Козаты Гульнарæ раарфæ кодта конференцийы хайадисджытæн сæ фæстиуæгджын куысты тыххæй.

«Сывæллæтты сфæлдыстадон галуан æз нымайын сывæллæтты архайдæн иууыл хуыздæр бынатыл, – загъта уый.  Ацы ран цыдæриддæр арæзтæуы, уый вæййы кæддæриддæр аив, зондзонæн, æмæ сабитæн рæзын кæны сæ хуыздæр миниуджытæ».

Конференци «Шаг в науку» æввахс кæны нæ фæсивæды стыр зонадмæ æмæ нын нæ зæрдæты уадзы ныфс, фидæны стыр ахуырты рæнхъыты мах кæй фендзыстæм абоны конференцийы хайадисджыты. Республикæйы Президент Тыбылты Леонид рæзгæ фæлтæр-мæ цы хъусдард здахы, уый зонгæйæ, æз фидарæй зонын, сымах æнтыстджын кæй уыдызстут, æмæ кæй суыдзыстут уæ бæстæйы аккаг æмбæстæгтæ».

Comments are closed, but trackbacks and pingbacks are open.