Каратэ

Хуссарирыстойнаг спортсментæ æнтыстджынæй сæхи равдыстой горæт Орелы уагъдцæуæг дунейы чемпионаты æппæтстилон каратэйæ. Хистæр кары спортсменты ’хсæн дыккаг бынат бацахста Лолоты Артур. 17 азы онг кæуыл цæуы, уыцы спортсменты ’хсæн та фыццаг бынат бацахста Джиоты Дмитри.

Спортсменты тренер у Хъуылымбегты Мамед.

Тхэквондо

Минскы уагъд æрцыд Белорусийы Гом Кубок тхэквондойæ. Ерысты уæлахиздзаутæ систы Цакъоты Сæрмæт æмæ Джиоты Игорь. Сæрмæт 68 кг уæзы категорийы акодта фондз тохы, Игорь та 55 кг уæзы категорийы архайгæйæ йæ ныхмæлæуджытимæ фембæлд авд хатты.

Ерысты уæлахиздзау ма ссис Гуырцъыты Георги (58 кг). Уый хъахъхъæдта Белорусийы спортивон кад.

Футбол

Футболæй Уæрæсейы фыццаг дивизионы 17-æм туры Дзæуджыхъæуы «Алани» уазæгуаты хъазыд Калининграды «Балтика»-имæ. Фембæлды райдианы алайнæгтæ райдыдтой активонæй. Ныхмæлæууæг командæйы къулдуары раз сæвзæрын кодтой цалдæр тæссаг уавæры, фæлæ сæ не спайда кодтой. Æмæ та скуыста зындгонд футболон фæтк. Ома, кæд пурти нæ къуырыс ды, уæд пурти бакъуырдзысты дæ къулдуары. Фысымтæн бантыст нырма хыгъд бакæнын. Хъазты фыццаг æмбисы кæрон та хыгъд скодтой 2:0. Фембæлды дыккаг хай алайнæгтæ ноджы фæхуыздæр кодтой сæ архайд. Фæлæ сын æрмæстдæр хъазты фæстаг минуты рауад ныхмæлæууæг командæйы къулдуары пурти бакъуырын. Уæдмæ фембæлд рæстæг дæр фæцис. Афтæмæй «Алани» чем-пионаты фæлгæтты фембылд дыккаг хатт. Фæлæ уымæ æнæкæсгæйæ, турнирон таблицæйы дарддæр дæр ахсы фыццаг бынат.

Радон туры «Алани» 12 ноябры хъаздзæн Мæскуыйы «Родина»-имæ.

ХУРИТЫ Батрадз

Comments are closed, but trackbacks and pingbacks are open.