Абоны бон РХИ-йы Парламенты закъондæттынад, закъондзинад æмæ бынæттон хæдразамынды фæдыл комитеты сæйраг фарстытæ сты тæрхондонон реформæ æмæ æнæмæнгхъæуæг закъæттæ райсын, кæцытæ фадат ратдзысты алыгъуызон ныхмæвæрд факттæ ма æруадзынæн, — банысан кодта профилон комитеты сæрдар Коцты Олеся.

Йæ ныхæстæм гæсгæ, стыр куыст цæуы алыгъуызон æмвæзадты тæрхонгæнджыты бынæттæм Парламентмæ Президенты æрбавдыст адæмы фæдыл.

«Дзырд цæуы Уæлдæр æмæ Арбитражон тæрхондоны тæрхонгæнджыты тыххæй, кæцытæ кусын райдайдзысты фыццаг инстанцимæ гæсгæ. Кæд уыдон закъоны проекттæ не сты, уæддæр сыл цæуы стыр куыст, уымæн æмæ Президенты æрбавдыстытæ бындуриуæг кæнынц тæрхонгæнджыты квалификациджын коллегитыл, Парламент æрмæст йæ разыдзинад ма хъуамæ радта, фæлæ йæ куыст дæр хъуамæ бакæна. Мах арвитдзыстæм ацы кандидатурæтæ Парламенты æппæт комитеттæм, æмæ уыдонæй хъуамæ райсæм кæнæ æвæрццаг кæнæ та æппæрццаг хатдзæгтæ. Уый фæстæ уыцы хатдзæгты мах бавдисдзыстæм президиуммæ æмæ сессимæ», — фехъусын кодта Коцты Олеся.

Коцты Олесяйы ныхæстæм гæсгæ, егъау куыст цæуы РХИ-йы Парламенты депутатты æвзæрстыты æмхæццæ системæмæ ракæныны баст фарстытыл.

«Бæрæг у, Конституцимæ хаст æрцыдысты ивындзинæдтæ, кæцытæм гæсгæ Парламент æвзæрст цæудзæн процентон æмахасты 50/50 æмхæццæ системæмæ гæсгæ, ома, депутатты æмбис æвзæрст цæудзæн партитæй, дыккаг æмбис та — мажоритарон системæйы депутаттæ. Уымæ гæсгæ, «Æвзарæн барты сæйраг гарантиты тыххæй» Закъон дæр æмæ «Депутатты æвзæрстыты тыххæй» Закъон дæр хъуамæ æмбæлонмæ конд æрцæуой. Кæнæм ацы Закъон Ног азмæ райсыны фæнд», — загъта уый.

Коцты Олеся бамбарын кодта, зæгъгæ, Президенты бахæсмæ æмæ комитеты хъæппæрисмæ гæсгæ прокуратурæйы органтимæ æнгом æмгуыстад кæнгæйæ куыст цæуы, Хуссар Ирыстоны бар кæмæн нæй, ахæм буарадтæ уæй кæнынимæ баст фæтк халыны цауты тыххæй санкцитæ фæкарздæр кæныны тыххæй, сæрмагондæй, кæмæн ис, «Лирика» æмæ  се сконды «прегабалин»-ы уыцы препараттæ.

«Ныры онг ацы нормæйæн уаг лæвæрдта административон закъондæттынад. Ист цæуынц иварон санкцитæ, фæлæ ацы фарсты æвæрццаг динамикæ кæй нæ уынæм, барад халыны цаутæ дарддæр кæй цæуынц, уымæ гæсгæ махмæ растдæр кæсы фыдракæндты рецидив уголовон закъондæттынады барадмæ ракæнын. Ома, мах фæндон хæссæм, фыдракæндты рецидив скриминализаци кæнынмæ», — бамбарын кодта Коцты Олеся.

Профессионалон Парламенты темæйы фæдыл Коцты Олеся банысан кодта, зæгъгæ, Конституцийы ис комкоммæ дæнцæг уый тыххæй, ома, республикæйы Парламент хъуамæ куса Парламенты тыххæй конституцион закъонмæ гæсгæ. Æмæ кæд къорд паддзахады закъондæт-тынадон палатæты вæййы фаг регламент, уæддæр Хуссар Ирыстоны Конституци æвæры ног закъон райсыны хæс.

«Уый фæдыл комитеты ныридæгæн ис Парламенты тыххæй Конституцион закъоны проект. Мах фæнд кæнæм ацы закъон Ног азмæ æмбæлон уагмæ æркæнын. Фæлæ æз хъуыды кæнын афтæ, нæ графикы куысты егъау гуырахстмæ гæсгæ, закъон райсдзыстæм иннæ азы фыццаг мæйты. Куыддæр Парламент профессионалон бындурмæ рахиза, афтæ йыл райдайдзыстæм дзурын. Нырма махæн нæ бон нæу уынаффæтæ исын, уымæн æмæ цалынмæ Конституцимæ ивындзинæдттæ бахæссыны тыххæй къухтæ фыст не ‘рцæуой, уæдмæ конституцион закъон райсыныл дзурæн нæй», — бамбарын кодта уый.

Уымæй дарддæр ма абоны бон, Коцты Олесяйы ныхæстæм гæсгæ, хицауады закъондæттынадон хъæппæрисмæ гæсгæ комитет кусы «Политикон партиты тыххæй» закъоны, «Мидхъуыддæгты органты службæ чи кодта, уыцы адæймæгты æмæ сæ бинонты пенсийæ сифтонг кæныны тыххæй» закъоныл, «РХИ-йы паддзахадон тæрхондонон-экспертон архайды тыххæй» закъоныл, «Æнæкоммерцион баиугæндты тыххæй» закъоныл æмæ афтæ дарддæр.

Уый банысан кодта, зæгъгæ, хицауадæй цæуæг хъæппæристы фæдыл комитет кусы «Æххæстгæнæн кондадмæ ивындзинæдтæ бахæссыны тыххæй» Закъоны проектыл, афтæ ма къорд ивындзинæдтæ хаст цæуынц алыгъуызон закъæттæм, кæцытæ баст сты РХИ-йы Мидхъуыддæгты министрады цур информацион-координацион центры куыст райдайынимæ.

«Цæмæй сæ куыст легитимон уа, уый тыххæй æнæмæнгхъæуæг у, уыдоны къорд закъондæттынадон акттæм бахæссын. Уый у Мидхъуыддæгты министрадæн йæхи хъæппæрис. Документтæм æркастæуыдзæн, æмæ сæ мах бахæсдзыстæм, мах цы куысты фæлгæттæ аразæм, уыдонмæ», — бамбарын кодта Коцты Олеся.

Уый ма банысан кодта, зæгъгæ, уый у æрмæстдæр уыцы закъæтты проектты хай, кæцытæм æркæсдзæн комитет.

РХИ-йы Парламенты

информацион-аналитикон службæ

Comments are closed, but trackbacks and pingbacks are open.