Кокион Аллæйы музыкалон фестиваль «Фортепиано иронау» æхгæд æрцыд гала-концертæй

Хуссарирыстойнаг зарæггæнæг Кокион Аллæйы æрвылазон музыкалон фестиваль «Фортепиано иронау», зæгъгæ, ахæм номимæ райдыдта цалдæр боны размæ пианисткæ Тедеты Иринæйы солон концертæй. Уый сценæмæкæсджыты размæ рахаста æмæ сæххæст кодта композитор Æлборты Феликсы æмæ ма æндæр зынгæ композиторты уацмыстæ. Æлборты Феликсы номыл музыкалон ахуыргæнæндоны концертон залмæ æрбамбырд сты классикон музыкæуарзджытæ æмæ стыр æхцондзинад райстой концертæй.

Йæхæдæг Аллæ куыд загъта, уымæ гæсгæ фестиваль уагъд цыдис æртæ боны æмæ æхгæд æрцыд 19-æм июлы Хетæгкаты Къостайы скверы.

Кокион æххæст кæны нырыккон ирон зарджытæ æмæ ацы фестивалы йæ арæхстдзинад равдыста гала-концерты. Банысан кæнын хъæуы уый æмæ ацы фестиваль уагъд кæй цæуы 2013-æм азæй фæстæмæ æрвылаз дæр. Аллæ йæхæдæг куыд зæгъы, афтæмæй йын адæм тынг ахъаз фесты, цæмæй æрвылаз дæр уадза концерттæ. «Сымах, зынаргъ сценæмæкæсджытæ, цалдæр азы дæргъы мæ фарсмæ куынæ рбалæууыдаиккат æмæ мын куынæ æххуыс кодтаиккат, уæд абон ацы концерт дæр уагъд не ʻрцыдаид», – загъта гала-концерты æрæмбырдуæвджытæн уый.

Фестивалы дыккаг бон та уагъд æрцыд ирон авторон музыкæйы солон концерт ВИА «Монзæл» нырыккон бакуыстмæ гæсгæ æмæ ирон сце-нæмæкæсæгæн балæвар кодта æхцондзинадхæссæг эмоцитæ, циндзинад.

19-æм июлы та Хетæгкаты Къостайы цыртдзæвæны цурмæ дæр гала-концертмæ æрбамбырд бирæ адæм, Аллæйы тынг хорз чи зоны æмæ музыкæйæн стыр аргъ чи кæны, ахæмтæ. Кокион нын куы радзырдта, уымæ гæсгæ фестивалы сæйраг нысан у, цæмæй популяризацигонд цæуой нырыккон ирон музыкæ æмæ зарджытæ. «Æз тынг райгондæй баззадтæн фестивалæй. Мæхи стыр æнтыстыл нымайын цæгат-ирыстойнаг музыканттæ дæр хайад кæй райстой фестивалы, уый. Уымæн æмæ мæ тынг фæндыд, цæмæй сæ уацмыстæ дæр æххæстгонд æрцыдаиккой Хуссар Ирыстоны адæмæн. Æмæ куыд федтон, афтæмæй нæ фæсайды дæн, тынг фæцыдысты нæ сценæмæкæсджыты зæрдæмæ. Уый мæнæн у тынг æхсызгон хъуыддаг æмæ рауад куыд сюрприз, афтæ», – загъта Кокион.

Гала-концерты кæрон Кокион Аллæ бузныджы ныхæстæ  загъта  Президент  Бибылты  Анатоли æмæ  ма  сын сæ  фестиваль  ауадзынæн  чи баххуыс кодтой, æппæт уыдонæн.