Хуссар Ирыстоны разамынад нæ фæнд кæны ставдкъах фосы тыххæй хъалонтæ исын. Ацы фарсты тыххæй дам-думтæ сты бынтондæр æнæ бындур æмæ сын æцæгдзинадимæ æппындæр ницы иудзинад ис.

Экономикон рæзты министр Кокойты Геннадийы ныхæстæм гæсгæ, нæдæр Хицауады, нæдæр Экономикон рæзты министрады, нæдæр Хъæууон хæдзарады министрады æмæ нæдæр Хъалонтæ æмæ æмбырдты фæдыл комитеты ставдкъах фосы тыххæй хъалонтæ райсыны фарстыл, æгæрыс-тæмæй, уынаффæ дæр нæ кодтой.

«Стыр бæрндзинадимæ мæ фæнды фехъусын кæнын, ставдкъах фосы кæнæ æндæр хъæууонхæдзарадон цæрæгойты  тыххæй хъалонтæ ист нæ цæудзысты. Уый тыххæй дзырд дæр нæ уыд. Уый тыххæй цы дам-думтæ парахат цæуынц, уыдон сты æнæбындур», — загъта Кокойты Геннади.

Хъæууон хæдзарад, фосдард дæр æм бафтаугæйæ, у Республикæ Хуссар Ирыстоны экономикæйы реалон секторы приоритетон здæхтытæй иу. Уый тыххæй республикæйы хицауиуæгады нысан у ацы кондады рæзтæн баххуыс кæнын.

Цы фадæттæ нæм ис, уыдон бахынцгæйæ, куыст цæуынц алыгъуызон гæнæнуæвæг варианттæ хъæууон хæдзарады рæзтæн стимул раттыны тыххæй. Уыцы нымæцы фæнд цæуы Республикæ Хуссар Ирыстоны хъæууон хæдзарады рæзты тыххæй программæтæ бакусын.

«Хъæууон хæдзарады фадыджы цахæмфæнды ног хъалонтæ бакæнын, уыцы нымæцы хъæууонхæдзарадон цæрæгойты тыххæй, æппындæр не сты хъæууон хæдзарады фадыджы рæзты стимулы нысан. Уый тыххæй æнгæс архæйдтытæ, кæй зæгъын æй хъæуы, арæзт нæ цæудзысты», — бамбарын кодта министр.

Ныртæккæ Хуссар Ирыстоны ныры Хъалонты кодексы нысан не сты цахæмдæр хъалонтæ хъæууонхæдзарадон цæрæгойты тыххæй.

Статистикон бæрæггæнæнтæм гæсгæ, ацы азы райдианмæ Хуссар Ирыстоны ставдкъах фосы нымæц уыд 15958 сæры. Хъæууон хæдзарады министрады бæрæггæнæнтæм гæсгæ, 1990 азы кæрон ставдкъах фосы нымæц Хуссар Ирыстоны уыд 79000 сæры.

Хъалонтæ æмæ æмбырдты фæдыл комитеты сæрдар Кадзты Вадим куыд банысан кодта, афтæмæй фыццаг фондз азы дæргъы паддзахадон регистрацийы фыццаг бонæй хъалонтæй сæрибар цæуынц Хуссар Ирыстоны фермертæ.

Уый фæстæ, сæхи фæндонмæ гæс-гæ, сæ бон у равзарой ныры закъондæт-тынады нысангонд хъалонты альтернативон хуызтæй иу. Хъалонтæ фидыны сæхицæн оптималондæр   системæ равзарыны фæдыл лæмбынæгдæр консультацитæ  райсыны тыххæй, фермертæн сæ бон у æрбацæуой Республикæ Хуссар Ирыстоны Хъалонтæ æмæ æмбырдты фæдыл комитетмæ.

Джиоты Алан

Comments are closed, but trackbacks and pingbacks are open.