1-æм июны – Сывæллæтты хъахъхъæныны дунеон боны хæдразмæ Республикæ Хуссар Ирыстоны Президент Бибылты Анатоли бацыд Цхинвалы сывæллæтты цæхæрадæттæй сæ иу – «Дидинæг»-мæ, цыран сывæллæттæн уагъд цыдис нывкæнынæй республикон конкурс «Счастливое детство», зæгъгæ, ахæм номимæ.
Бæстæйы сæргълæууæгимæ ма ацы мадзалмæ æрбацыдысты РХИ-йы Президенты Ад-министрацийы къухдариуæггæнæг Козаты Игор æмæ нæ республикæйы Ахуырад æмæ зонады министр Гасситы Натали.
Сывæллæтты цæхæрадон «Дидинæг»-ы директор Джиоты Залинæ куыд загъта, афтæмæй ацы конкурс организаци æрцыдис Ахуырад æмæ зонады министрады æххуысæй. Конкурсы хайад райстой куыд горæты, афтæ районты сывæллæтты цæхæрадæтты хъомылгæнинæгтæ дæр. Конкурс ауадзыны нысан уыд сывæллæтты цымыдисдзинад æмæ сфæлдыстадон æвзыгъддзинæдтæ рæзын кæнын. Сывæллæттæн сæ конкурс уагъд цыд дыууæ этапæй. Алкæцы цæхæрадон дæр развæлгъау æрбавдыста йæ хъомылгæнинæгты куыстытæ, æмæ уæд уый фæстæ хуыздæр нывты автортæ ахызтысты дыккаг турмæ.
Конкурсы алы цæхæрадонæй дæр хайад истой фæйнæ æртæ хъомылгæнинаджы, кæцы-тæ 20 минутмæ хъуамæ, сæ фантазимæ гæсгæ, сныв кодтаиккой цыфæндыхуызон нывтæ дæр.
Сывæллæтты конкурсæн аргъ кодтой жюрийы уæнгтæ. Уыдон уыдысты нывгæнæн скъолайы директор, РХИ-йы аивæдты сгуыхт архайæг Æлборты Æхсæртæг, Цхинвалы 5-æм скъолайы нывкæныны ахуыргæнæг Куымæриттаты Розæ æмæ Сывæллæтты сфæлдыстадон галуаны къорд «Юный художник»-ы ахуыргæнæг Коцты Нинель.
Сывæллæттæн сæ бæрæгбоны цытæн зæрдæбын арфæйы ныхæстæ загъта нæ бæстæйы сæргълæууæг Бибылты Анатоли. «Сывæллæтты хъахъхъæныны дунеон боны размæ сымах ахæм хорз мадзал кæй ауагътат, уый хорз хъуыддаг у. Ацы ран хайад исынц республикæйы æппæт районты сывæллæттæ дæр, æмæ уый та ахъаз кæны сывæллæтты кæрæ-дзимæ æрбангом кæнын æмæ хъæлдзæгæй сæ рæстæг æрвитыны хъуыддагæн. Ахæм конкурсты руаджы райтынг вæййынц сæ хъуыдыкæнынад, сæ фантази æмæ уый у тынг хорз. Фæнды мæ бузныджы ныхæстæ зæгъын, конкурс чи срæвдз кодта, уыцы орга-низатортæн. Стыр бузныг зæгъын Ахуырады министр Гасситы Наталийæн сывæллæттæм йæ хорз æмæ рæвдаугæ ахасты тыххæй. Сывæллæттæ махæн сты нæ фидæн, æмæ сæм мах цы ахаст æмæ хъусдард аздахæм, уымæй аразгæ у нæ республикæйы сомбон дæр. Мæнæн æппæт сабитæн дæр мæ цæст уарзы фидар æнæниздзинад, сабырад æмæ хъæлдзæг цард», – загъта Президент Бибылты Анатоли.
Конкурсы сывæллæттæ истой активон хайад, алчи дæр сæ тырныдта куыдхуыздæрæй йæхи равдисынмæ.
Сюрпризы хуызы сывæллæттæм фæзындысты циркы клоунтæ, кæцытæ сæ музыкалон номыртæй бахъæлдзæг кодтой æппæт хъомылгæнинæгты дæр.
Кæронбæттæны конкурсы чысыл хайадисджытæн радтой зæрдылдарæн лæвæрттæ.
Жюрийы тæрхонмæ гæсгæ фыццаг æмæ дыккаг бынæттæ лæвæрд æрцыдысты Цхинвалы сывæллæтты 12-æм цæхæрадоны хъомылгæнинæгтæ Галуанты Æхсæртæг æмæ Гæбæраты Марияйæн. Æртыккаг бынат та æрхаудта сывæллæтты 7-æм цæхæрадоны хъомылгæнинаг Дзугаты Дианæмæ.
Comments are closed, but trackbacks and pingbacks are open.