Цæмæй æмткæй нæ республикæйы уæвæг библиотекæты куыст фæхуыздæр уа, уый тыххæй ивгъуыд аз РХИ-йы Культурæйы министрад бакуыста уагæвæрд Хуссар Ирыстоны библиотекæты ‘хсæн конкурс ауадзыны тыххæй, цыран бæрæг хъуамæ æрцыдаид республикæйы хуыздæр библиотекæ.

Конкурсы нысæнттæ æмæ хæстæ уыдысты ахæм: цæрджытæн библиотекон лæггæдтæ фæфылдæр кæнын, чиныджы размæ кæнын; практикæйы ног проекттæ ныббиноныг кæнын; библиотекæйы специалистты квалификаци фæбæрзонддæр кæнын; РХИ-йы цæрджытæн лæггæдты ассортименты гъæд фæбæрзонддæр æмæ фæуæрæхдæр кæнын; нырыккон библиотекæйы имиджæй эффективонæй спайда кæнын.

Конкурсы хайадисджытæ уыдысты РХИ-йы Культурæйы министрады системæйы библиотекæтæ. Конкурс ауадзыны уавæртæ æмæ уæлахиздзау сбæрæг кæныны критеритæ та уыдысты ахæм: Конкурс уагъд цыд 2016 азы 27-æм майæ 2017 азы 27-æм маймæ. Библиотекæты куыстæн саргъкæныны критеритæ: куысты афæдзы планы сæйраг хæстæ сæххæст кæнын; чиныгкæсджытæн лæггад кæныны куысты ног формæтæ æмæ методтæ ныббиноныг кæнын; чиныджы размæ кæнын, ног информацион технологитæй пайда кæнын; чиныгкæсджыты æвзонг контингент æрбакæнын; регионалон æмæ горæтон ма-дзæлтты библиотекæты хайадист; библиотекæйы рекламон архайд.

Организацион комитеты архайд: Конкурс «Азы хуыздæр библиотекæ»-йæн хатдзæгтæ саразыны тыххæй арæзт æрцыд конкурсон къамис. Хорзæхджын кæныны уавæртæ: «Азы хуыздæр библиотекæйы» ном лæвæрд цæуы РХИ-йы библиотекæйæн азы куысты фæстиуджытæм гæсгæ ахæм номинациты: хуыздæр горæтон библиотекæ; хуыздæр районон библиотекæ; хуыздæр хъæууон библиотекæ.

Конкурсы къамисы сконды уыдысты: Дзеранты Джульеттæ – РХИ-йы Культурæйы министры хæдивæг, Дриаты Нателæ – РХИ-йы Культурæйы министрады библиотекæты куысты фæдыл сæй-раг специалист. Хъотайты Д. – Сывæллæтты республикон библиотекæйы методист, Сланты Заирæ – Анахарсисы но-мыл республикон национ библиотекæйы ирон абонементы сæргълæууæг. Букуылты Маринæ – Цхинвалы централон библиотекæйы библиотекарь.

Æрæджы бæрæг æрцыдысты ацы конкурсы чи фæуæлахиз, уыцы библиотекæтæ. Уый тыххæй нын бæстондæрæй радзырдта РХИ-йы Культурæйы министрады библиотекæты куысты фæдыл сæйраг специалист Дриаты Нателæ: «Конкурсы къамисы уæнгты уынаффæмæ гæсгæ, горæты библиотекæты ‘хсæн 1-аг бынат лæвæрд æрцыд Æвзæнгты республикон библиотекæйæн (директор Тъототы Ленæ). Банысан кæнын мæ фæнды уый дæр, æмæ ацы библиотекæ бирæ азты дæргъы йæ куыст кæй æххæст кодта Хуссар Ирыстоны зонад-иртасæн институты бæстыхайы иу чы-сыл хатæны, фæлæ уымæ нæ кæсгæйæ, æмбæлон куыст кодта чиныгкæсджытимæ, уагъта алыгъуызон мадзæлттæ. Абон ацы библиотекæ ис Хъайтарты уынджы ног сцалцæггонд бæстыхайы æмæ уагдоны кусджытæ тырнынц сæ куыст ноджы фæгъæдджындæр кæнынмæ. Кæд конкурсы фæлгæтты азы дæргъы хъуыд æртæ мадзал ауадзын, уæддæр уыдон ауагътой цыппар мадзалы. Æрмæст иу мысæн мадзалы Æвзæнгты республикон библиотекæйы хайад райстой 40-50 ахуыргæнинаджы бæрц æмæ уый та хуыздæрырдæм æндавы рæзгæ фæлтæры монон хъомыладыл. Уыцы мадзæлттæй сæ иуæй иннæ хуыздæр уыд æмæ сын уымæ гæсгæ лæвæрд æрцыд фыццаг бынат.

Дыккаг бынат адих кодтой Анахарсисы номыл республикон библиотекæ (директор Кокойты Валерия) æмæ Сывæллæтты республикон библиотекæ (директор Джиоты Аллæ). Æртыккаг бынат та лæвæрд æрцыд горæты централон библиотекæйæн (директор Прокопенко Иринæ). Кæй зæгъын æй хъæуы, уæлахиздзаутæ хорзæхджын æрцыдысты æхцайы премитæ æмæ РХИ-йы Культурæйы министрады Дипломтæй. Æвзæнгты республикон библиотекæ хорзæхджын æрцыд 12 мин сомы æмæ Дипломæй. Анахарсисы номыл республикон библиотекæ æмæ Сывæл-лæтты республикон библиотекæтæ та хорзæхджын æрцыдысты фæйнæ 10 мин сомы æмæ Дипломтæй.

Районты библиотекæты ‘хсæн 1-аг бынат лæвæрд æрцыд Дзауы районон библиотекæйæн. Уыдон тынг хорз мадзал ауагътой ирон адæмы аккаг фырт Джусойты Нафийы кадæн. Ацы библиотекæ та хорзæхджын æрцыд 5 мин сомы æмæ Дипломæй. Дыккаг бынат бацахстой Цхинвалы районы библиотекæтæ иумиагæй. Районы хъæуты цæрджытæ кæй скадавар сты, уымæ гæсгæ-иу ацы районы хъæуты библиотекæтæ ауагътой иумиаг мадзæлттæ. Уымæ гæсгæ сæ схорзæхджын кодтам 5 мин сомы æмæ РХИ-йы Культурæйы министрады дипломæй. Æртыккаг бынат та бацахста Ленингоры Сывæллæтты централон библиотекæ. Уый та хорзæхджын æрцыд РХИ-йы Культурæйы министрады Кады грамотæйæ. Афтæ ма нæ министрады Кады грамотæйæ хорзæхджын æрцыд Ленингоры районы Цъинагары хъæууон библиотекæ. Зæгъын мæ фæнды уый дæр, æмæ ацы хъæууон библиотекæйы уагъдцæуæг мадзæлтты активон хайад кæй райсынц Хуриты Гивийы номыл Цъинагары астæуккаг скъолайы ахуыргæ-нинæгтæ сæ директор Гуссойты Ласкойы сæргълæудæй.

Знауыры районы библиотекæты ‘хсæн та хуыздæр æнтыстытæ уыд Принеу æмæ Бехъмары хъæуууон библиотекæтæн. Сæрмагондæй, Бехъмары хъæууон библиотекæйы сæргълæууæг Тедеты Галинæ хорзæхджын æрцыд 5 мин сомы æмæ РХИ-йы Культурæйы министрады Кады грамотæйæ тынг хорз кæй кусы, уымæ гæсгæ. Нæ министрады Кады грамотæйæ, сæрмагондæй хорзæхджын æрцыдысты Анахарсисы номыл республикон библиотекæйы ирон абонементы хайады сæргълæууæг Сланты Заирæ æмæ ацы библиотекæйы библиотекарь Икъаты Аринæ алыгъуызон мадзæлтты сæ активон хайадисты тыххæй. РХИ-йы Культурæйы министрады Кады грамотæйæ ма хорзæхджын æрцыд Сывæллæтты республикон библиотекæйы библиотекрь Мæргъиты Маринæ. Уый дæр активон хайад фæисы уагдоны уагъдцæуæг мадзæлтты.

Банысан кæнын ма мæ фæнды уый дæр, æмæ конкурсы хайадисæг библиотекæтæ иууылдæр хорзæхджын кæй æрцыдысты РХИ-йы Культурæйы министрады Кады грамотæтæй.

Дриаты Нателæ ма куыд банысан кодта, уымæ гæсгæ дарддæр фæнд кæнынц проект «Жизнь замечательных людей» бацæттæ кæнын. Ацы проекты фæлгæтты рæзгæ фæлтæр æмæ иумиагæй цæрджытæ зонгæ кæндзысты ирон адæмы разагъта фырттæ æмæ чызджыты архайд æмæ сгуыхтдзинæдтимæ. «Зæгъæм, бæрæг куыд у, афтæмæй дунейы фыццаг космонавт Юри Гагарин космосæй куы æртахт, уæд ыл фыццаг сæмбæлд не ‘мзæххон Гасситы Ахмæт, фæлæ  алчи нæ зоны ацы гоймаджы архайды тыххæй, бирæтæ йын йæ ном хъусгæ дæр никуы фæкодтой. Кæй зæгъын æй хъæуы, уый раст нæу, ахæм адæймæгты архайды тыххæй хъуамæ зона алчидæр.  Фæнд кæнæм Анахарсисы номыл республикон библиотекæйы тымбыл фынг ауадзын ахæм темæйыл, «Чи уыд Анахарсис», зæгъгæ. Иу дзырдæй плæнттæ нæм бирæ ис æмæ нын саразын цы бантыса, уый та рæстæг фенын кæндзæн», – загъта Дриаты Нателæ.

Зæгъæн ис афтæ, æмæ ацы конкурс хуыздæрырдæм кæй бандæвдта нæ республикæйы библиотекæты куыстыл, уымæн æмæ кæд алчи нæ, уæддæр сæ бирæтæ тырныдтой хуыздæр мадзал ауадзынмæ, фылдæр чиныгкæсджыты сæхимæ æрбакæнынмæ æмæ уый сæ къухты æфтгæ дæр бакодта.

Джиоты Е.

Comments are closed, but trackbacks and pingbacks are open.