Нæ бæстæйы территорийыл коронавирусы рапарахатæй уæлдай уæз æрæнцад медицинæйы къабазы кусджыты уæхсчытыл. Сæрмагонд хибахъахъхъæнæн дзаумæтты уы-дон сырх зонæты дæргъвæтин рæстæджы уæхскуæзæй ку-сынц коронавирусæй рынчынтæн æнæмæнгхъæуæг медицинон æххуыс бакæныныл. Уымæн æвдисæн стæм мах дæр æмæ рынчындæтты, хосгæнæн уагдæтты чи ис, уыдон дæр.
Ног коронавирусон рынчынты исæн хайады куыст
Республикон бирæпрофилон медицинон центры коронавирусон рынчынты хайад байгом ивгъуыд аз октябры мæйы. Уæдæй абоны онг ацы хайады медицинон кусджытæ архайынц ацы низ рабæрæг кæныныл. Бирæпрофилон медицинон центры амбулаторон-поликлиникон хайады къухдариуæггæнæг Санахъоты Тамарæ нын куыд радзырдта, уымæ гæсгæ ацы хайады кусы медицинон бригадæ 12 адæймаджы скондæй. Ацы хайады кусджытæ æрмæст бынаты рынчынтимæ кусынæй дарддæр цæуынц, чи сæм бахаты, уыцы рынчынтæм хæдзæрттæм дæр. Низ йæ тæ-мæны куы уыд, уæд уыдысты фылдæр. Ам медицинон персонал исынц гриппæй рынчынты дæр. Ацы хайады кусджытæ æрмæст рынчынты нæ басгарынц, фæлæ вирусы иуæг рабæрæг кæныны нысанæн арæзт цæуы ПЦР-тесттæ дæр. Рынчыны уавæрмæ гæсгæ уыдон æрвыст цæуынц компьютерон томографмæ, науæд та стационарон уавæрты хос кæнынмæ. Рæуæгау рынчынтæн та хос цæуы хæдзарон уавæрты.
Ахæм ахсджиаг æмæ бæрнон куыст æххæст кæнынц ныртæккæ ацы хайады кусджытæ.
Санахъоты Тамарæйы ныхæстæм гæсгæ, ивгъуыд азимæ абаргæйæ, ацы аз низы уылæн раздæр рапарахат. Ивгъуыд аз та йæ тыхы уыд ноябры мæйы. Банысан кæнын хъæуы уый, æмæ нæ республикæйы территорийыл дæр, бæстæйы сæргълæууæджы барамындæй улæфтбонтæ нысан кæй æрцыд, уый хуыздæрæрдæм бандæвта нæ республикæйы эпидемиологон уавæрыл. Уымæн æвдисæн сты, фæстаг рæстæджы нæ медицинон уагдæттæй цы статистикон бæрæггæнæнтæ лæвæрд цæуы, уыдон.
«Ацы мæйы ралæудæй æнкъардæуы, низ кæй сабырдæр кæны. Йæ тæмæны куы уыд, уыцы рæстæджы исæн хайад кæд боны дæргъы астæуккаг нымадæй истой 170-180 адæймаджы, уæд ныр та райсынц 105 æмæ къаддæр адæймаджы. Уый махæн у тынг æхсызгон, уымæн æмæ низы авналæнтæ къуындæг кæнынц. Уый æмрæнхъ фæкъаддæр сты, ПЦР тесттæ аразынмæ чи цæуы, уыдон нымæц дæр. Фæкъаддæр, хæдзармæ цæуын кæмæ хъуыд, уыцы рынчынты нымæц дæр», – банысан кодта Санахъоты чызг.
Абоны онг ацы хайады хъусдарды бын сты 1070 адæймаджы, уыдонæй 55 сты пневмонийæ рынчынтæ.
Вакцинæ – низы ныхмæ сæйраг фæрæз
Хуссар Ирыстоны дæр низы ныхмæ тох кæныны нысанæн æмбæстæгтæ аразынц вакцинæ «Спутник-V». Санахъоты Тамарæ нын куыд радзырдта, уымæ гæсгæ коронавирусы ныхмæ уæрæсейаг дыууæ хуызы вакцинæтæ æрластой нæ бæстæмæ – дыууæкомпонентон «Спутник-V» æмæ иукомпонентон «Спутник-Лайт».
Банысан кæнын хъæуы уый, æмæ алы вирусон хæцгæ низтæ дæр кæй хæссынц адæймаджы цард. Уыдон ныхмæ медицинæ лæууы цæхгæр æмæ аразы вакцинæ. Ацы низы хъуыддаг дæр у афтæ, цæмæй йыл фæтых уæм, уый тыххæй нæ сæйраг хæцæнгарз у вакцинæ æмæ йæ цас фылдæр адæм саразой, уыййас тагъддæр фæтых уыдзыстæм ацы æнæхайыры низыл дæр.
Куыд у уавæр районты та?
Алы районыл дæр ног коронавирусы инфекци ныууагъта йæ дæрзæг фæд. Тæссаг вирусон низы ахæсты бахаудысты районты цæрджыты зынгæ хай. Фæлæ нæ республикæйы æнæниздзинад хъахъхъæныны уагдæтты медицинон персонал æппæтдæр аразынц, цæмæй ацы низы авналæнтæ фæкъуындæг уой, æмæ сын уый æнтысгæ дæр кæны. Ныр фæстаг рæстæджы нæ республикæйы информацион фæрæзты руаджы мах æвдисæн стæм, ацы тæссаг низ фæстæмæ кæй алæууыд, уымæн. Уый банысан кодтой республикæйы районты рынчындæтты сæйраг дохтыртæ дæр.
Дзауы район
Дзауы районы рынчынындоны сæйраг дохтыр Гасситы Констанин нын куыд радзырдта, афтæмæй районы вирусæй рынчынты нымæц фæкъаддæр.
«Ныртæккæ нæм амбулаторон рынчынты нымæц у 17. 12 рынчынæн та хос цæуы нæ республикæйы бирæпрофилон медицинон центры. Куыддæр низ йæ тæмæны бацыд, афтæ районон рынчындоны сарæзтам ПЦР-тесттæ аразæн пункт, цыран боны дæргъы арæзт цыд 40 тесты бæрц. Фæлæ фæстаг рæстæджы уыдоны нымæц фæкъаддæр æмæ ма боны дæргъы арæзт æрцæуы дæсы бæрц.
Нæ рынчындоны медицинон персоналæй ацы низæй фæрынчын сты 13. Кæй зæгъын æй хъæуы, уыцы рæстæджы тыхстыстæм, фæлæ уыцы зындзинадмæ нæ кæсгæйæ, æнæхъусдард иу рынчын дæр нæ баззад. Ныртæккæ рынчындоны персонал сты сæ куысты уæлхъус», – банысан кодта рынчындоны сæйраг дохтыр.
Йæ ныхæстæм гæсгæ, Дзауы районы дæрддзæф хъæуты цæрджытæ дæр æнæхъусдард нæ уыдысты ацы уæззау эпидемиологон уавæры рæстæджы. Ныртæккæ Теделет, Синагур Дзалабет æмæ Карзманы хъæуты ис æрмæстдæр æртæ амбулаторон рынчыны.
Знауыры район
Ацы районы рынчындоны фадыгон терапевт Гæбæраты Эммæйы ныхæстæм гæсгæ, хыгъды сты коронавирусæй 99 рынчыны. Уыдонæй 22 адæймагæн хос цæуы нæ республикæйы медицинон центры инфекцион хайады. Цалдæрæн дзы сæ уавæр у уæззау. Иннæ рынчынтæн хос цæуы амбулаторон уавæрты. Банысан кæнын хъæуы уый, æмæ рынчынтæ æдзух кæй сты районы рынчындоны медицинон кусджыты хъусдарды бын.
Аивгъуыйгæ къуырийы дæргъы бæрæг фæкъаддæр рынчынты нымæц. Уыдон кар у алыгъуызон – сывæллонæй суанг ацæргæмæ. Низы алкæцы адæймаг дæр хæссы йæхирдыгонау.
Цхинвалы район
Цхинвалы районы Дменисы хъæууон амбулаторон рынчындоны сæйраг дохтыр Тыбылты Татьянæ нын куыд радзырдта, уымæ гæсгæ æмткæй районы рынчынты нымæц кæй фæкъаддæр, ууыл бандæвта, нæ республикæйы территорийыл къуырийы бæрц улæфтбонтæ расидт кæй æрцыд, уый. Уыцы рæстæджы адæм фылдæр хæдзæртты уыдысты æмæ уæлдай хатт кæрæдзийыл нал æмбæлдысты – уый фæкъаддæр кодта низы авналæнтæ.
Йæ ныхæстæм гæсгæ, Цхинвалы районы æмткæй ис 40 рынчыны. Уыдонæн хос цæуы амбулаторон уавæрты, сæ уавæр уæззау нæу, кæй зæгъын æй хъæуы, уыдон сты медицинон персоналы хъусдарды бын, æмæ кæд зæрдæ фехсайы сæ уавæрмæ, уæд æрвыст æрцæуынц медицинон центрмæ. Ныртæккæ стационарон рынчынты нымæц у 8. Бахъуаджы рæстæджы бынаты рынчынтæн арæзт цæуы ПЦР-тесттæ. Уыцы тесттæ ма арæзт цæуынц дæрддаг хъæуты цæрджытæн, дохтыртæ цы амбулаториты ис, уым.
Татьянæйы ныхæстæм гæсгæ, Дменисы хъæуы рынчындоны медперсонал æмæ хъæуты амбулаториты кусджытæ дохтырæй, медицинон хойæ, санитаркæйæ уæхскуæзæй бакуыстой æмæ кусынц ацы низы ныхмæ тох кæныныл. Иу адæймаг дæр йæхи нæ бафæсвæд кодта.
Ацы районы ног коронавирусон инфекцион рынчынтæ кæй фæкъаддæр сты, уыцы хъуыддаг банысан кодта рынчындоны къухдариуæггæнæг дæр.
Иумиагæй сисгæйæ, республикæйы районтæ ифтонг сты фыццаградон медицинон препараттæй. Рынчынты кар дæр у алыгъуызон – сывæллæттæ, астæуккаг æмæ хисдæр кары адæймæгтæ. Фыццаг уылæнимæ йæ куы абарæм, уæд, дохтырты ныхæстæм гæсгæ, ацы уылæн уыд уæззаудæр.
КЪÆБУЛТЫ Маринæ,
ТАНДЕЛАТЫ Виленæ
Comments are closed, but trackbacks and pingbacks are open.