Ивгъуыд къуырийы кæрон нæ республикæйы Паддзахадон драмон театры уагъд æрцыдис цымыдисон литературон-музыкалон мадзал «Къостайы сфæлдыстад фæлдахгæйæ», зæгъгæ, ахæм номимæ, кæцы бацæттæгонд æрцыдис ирон æвзаг æмæ литературæйы бындурæвæрæг, гениалон поэт, ирон адæмы уарзон хъæбул Хетæгкаты Къостайы 160 азы юбилейы цытæн. Бæрæг куыд у, афтæмæй нæ хицауады уынаффæмæ гæсгæ 2019-æм аз Хуссар Ирыстоны расидт æрцыдис Къостайы азæй. Уымæ гæсгæ æнæхъæн азы дæргъы уымæн йæ рухс ном арыны цытæн æмæ йын скад кæныны сæраппонд уагъд цыдысты алыгъуызон мадзæлттæ.

Литературон-музыкалон мадзалмæ фæуазæг ис нæ бæстæйы сæргълæууæг Бибылты Анатоли йе ‘мкъай Куымæридтаты Линдæимæ. Ардæм ма æрбацыдысты Хицауады бæрнон кусджытæ, «Россотрудничество»-йы къухдариуæггæнæг Сергей Скворцов, нæ горæты скъолаты ахуыргæнинæгтæ æмæ ахуыргæнджытæ, афтæ ма Къостайы сфæлдыстадæн табугæнджытæ.

Паддзахадон комплексон программæйы фæлгæтты нæ горæты гимнази «Альбион» æмæ Колыты Аксойы номыл аивæдты лицейы ахуыргæнинæгтæ бацæттæ кодтой ацы литературон-музыкалон мадзал. Уыдон паддзахадон драмон театры сценæйыл арæхстджынæй инсценировкæты хуызы равдыстой Къостайы цард æмæ сфæлдыстады тыххæй цымыдисон историон факттæ, афтæ ма сценæмæкæсджыты размæ рахастой гениалон фыссæджы зынгæдæр уацмыстæ. Хетæгкаты Къоста курдиатджын нывгæнæг кæй уыдис, уый тыххæй йын рæгъмæ рахастой йæ шедеврты æмæ сæ сдзурын кодтой. Къостайы конд нывты сюжеттæм гæсгæ сывæл-лæттæ равдыстой чысыл, фæлæ зæрдæмæхъаргæ, цымыдисон инсценировкæтæ. Уыдон сæ архайдæй судæгас кодтой ахæм нывты куыд: «Горянка, идущая за водой», «Скорбящий ангел», «Дети-каменщики», «В осетинской сакле (гонка араки)» æмæ æндæрты. Æрыгон артисттæ ма сценæмæкæсджыты зæрдыл æрлæууын кодтой Къостайы фæлгондз, кæцы аив каст йе ‘мдзæвгæты. Ацы инсценировкæты архайдæй сывæллæттæ равдыстой сæ арæхстдзинад, сæ курдиат, сæ уарзондзинад Къоста æмæ райгуырæн бæстæмæ. Цы театралон композицитæ сæххæст кодтой, уыдонæн уыд арф æмæ мидисджын бындур, уымæн æмæ сæ æвдыст цыдысты нæ рагфыдæлты хъæздыг культурæ, традицитæ æмæ цардуаг. Хетæгкаты Къостайы мысæн ма-дзалы ма скъоладзау фæсивæд аив сæххæст кодтой ирон националон кæфтытæ дæр æмæ сыл ам дæр сценæмæкæсджытæ сæмбæлдысты тыхджын къухæмдзæгъдимæ.

Республикæ Хуссар Ирыстоны Ахуырад æмæ зонады министр Гасситы Натали йæ раныхасы, фыццаджыдæр, банысан кодта, зæгъгæ, ахæм мадзæлттæ кæй сты ахсджиаг æмæ сын кæй ис хъомыладон нысаниуæг. Уый ма стыр бузныг æмæ арфæйы ныхæстæ загъта, мадзал чи бацæттæ кодта, æппæт уыдонæн. «Мæн фæнды зæгъын стыр бузныг æмæ арфæйы ныхæстæ æппæт уыдонæн, кæцытæ ацы мадзал ауадзыны хъуыддаджы райстой активон хайад. Уыдон, фыццаджыдæр, сты уыцы ахуыргæнджытæ, кæцытæ равдыстой абон сæ куыст. Мадзал рауадис тынг цымыдисон æмæ афтæ зæгъæн ис, нæ сывæллæттæ кæй сты курдиатджын, кæй зонынц цин кæнын дæр æмæ искæй рисыл фæриссын дæр. Абон махмæ нæ сывæллæттæ фæсидтысты, цæмæй тауæм хæрзиуджытæ. Уыдон нын бамбарын кодтой æвзæр хъуыд-дæгтæ сæфтмæ кæй кæнынц æмæ нæ хорзмæ кæй никуы æркæндзысты. Мах куы ферох кæнæм, æнусон чи сты, уыцы æргъадты, уæд фесæфдзыстæм. Къостайы ном махæн у æнусон. Æнусон та уымæн у æмæ цæуыл дзырдта, йæ зæрдæ цы æргъадтыл рыст, уыдон æнусон сты», — загъта министр.

Республикæ Хуссар Ирыстоны Президент Бибылты Анатоли дæр арфæ æмæ бузныджы ныхæстæ загъта Ахуырад æмæ Культурæйы министрадты разамонджытæн, афтæ ма сывæл-лæттæн æмæ мадзалы æппæт организатортæн, ахæм цымыдисон мадзал кæй бацæттæ кодтой, уый тыххæй. Уый ма банысан кодта сывæллæтты арæхстдзинад сценæйыл æмæ се стыр курдиат дæр. Президент банысан кодта, зæгъгæ, сывæл-лæтты æхсæн уыны, сомбоны артисттæн чи рабæзза, ахæмты æмæ сæм хъусдард аздахын кæй хъæуы. «Мæн фæнды зæгъын уый æмæ махæн Хетæгкаты Къоста кæй уыд, ис æмæ уыдзæн. Абоны мадзал фенын кодта,  Къоста махæн æнæмæлгæ кæй у æмæ йын йе сфæлдыстадæн дæр стыр аргъ кæй кæнæм, уый. Ацы аз мах нысан кæндзыстæм ирон адæмы геноцидыл сæдæ азы кæй æххæст кæны, уый æмæ абоны мадзал дæр, символикон æгъдауæй æрхаудта ацы азмæ. Мах куыд зонæм, афтæмæй ирон адæмы рыст, хъизæмæрттæ æмæ уæззау рæстæджытæ Къоста йæ уацмысты куыд равдыста, афтæ ничи æмæ нын уымæ гæсгæ у æнæмæлгæ», — загъта Президент Бибылты Анатоли.

ЦХУЫРБАТЫ Ларисæ

Comments are closed, but trackbacks and pingbacks are open.