Хуссар Ирыстоны Хицауады Сæрдары хæдивæг Козаты Димитр фембæлд Хъæууон хæдзарады министрады Фитосанитарон æмæ ветеринарон хъусдарды управленийы хистæр Æлборты Таймуразимæ. Фембæлды нысан уыд Хуссар Ирыстонæй æддæмæ хъæууонхæдзарадон продуктты аласт фæхуымæтæгдæр кæныны фæдыл конструктивон фæндæттыл бакусын.

Бæрæг куыд у, афтæмæй индивидуалон амалиуæггæнджытæ бæрæг зындзинæдтыл сæмбæлынц, «Дæллаг Зæрæмæджы» таможнæйон посты, се ‘ркæнгæ хъæууонхæдзарадон продукци куы фæласынц, уæд. Сæрмагондæй, уыдон зындзинæдтæ æвзарынц, Хуссар Ирыстоны территорийæ æддæмæ продукци ласыны бар райсыны тыххæй бирæнымæц хъæуæг документтæ аразыны рæстæджы. Хъæуæг документты æрæмбырд кæныныл бахардз вæййы бирæ рæстæг æмæ тыхтæ. Амалиуæггæнджытæ цы хъæууонхæдзарадон продукци аласынц, уый уыцы рæстæгмæ сæвзæр вæййы æмæ нал фæбæззы.

Ныртæккæ республикæйы территорийыл кусы Уæрæсейы Федераци æмæ Республикæ Хуссар Ирыстоны хицауадты ‘хсæн 2012 азы марты арæзтæрцæуæг  Сразыдзинад товартæ уæй кæныны режимы тыххæй, кæцымæ гæсгæ дыууæ бæстæйы ‘хсæн арæзт цæуынц æппæт базарадон ахастытæ дæр. Республикæ Хуссар Ирыстоны æркæнгæ продукци Уæрæсемæ  аласыны тыххæй Сразыдзинады форматы нæй ивартæ кæнæ бæрцон квотæтæ,  фæлæ дзы уыцы иурæстæджы ис домындзинæдты бæрæг фæтк, кæцы хъуамæ хъахъ-хъæной хуссарирыстойнаг амалиуæггæнджытæ.

Республикæйæ æддæмæ продукци аласыны проблемæимæ ацы бонты сæмбæлд фембæлды хайадисæг, индивидуалон амалиуæггæнæг Цхинвалы районæй Дудайты Эльбрус.

10 тоннæйы кæрдотæ тагъд реализацийы нысанæн, амалиуæггæнæг хайгай аласта йæ продукци Цæгат Ирыстоны территоримæ, цыран дзы брокерон компанийы минæвæрттæ æрдомдтой документты  стыр номхыгъд æрæмбырд кæнын, кæцыйы финансон хæрдзтæ уыдысты тынг бирæ. Цæмæй йæ проблемæ аскъуыддзаг кодтаид, уый тыххæй Дудайты Эльбрусы бахъуыд бар-æнæбары бахатын Хуссар Ирыстоны Хицауады Сæрдары хæдивæг Козаты Димитрмæ, кæцы æрæджы республикæйы къухдариуæгадмæ фæндон бахаста, цæмæй хъæуæг документты пакет аразын фæхуымæтæгдæр кæныны тыххæй арæзт æрцæуа сæрмагонд сервисон центр.

«Сервисон центр саразын, цыран физикон цæсгомæн (амалиуæггæнæгæн) закъонон бындурыл æххуыс кæндзæн юридикон цæсгом (брокер), кæцы æххæст кæны æхсæны функцитæ уæйгæнæг æмæ æлхæнæджы ‘хсæн, уый бирæбæрцæй фæахъаз уыдзæн  хъæуæг документтæ аразыны процессæн. Афтæмæй амалиуæггæнджытæн сæ бон уыдзæн Уæ-рæсейы Федерацийы территоримæ æнæ къуылымпыйæ сæ продукци ласын. Бæрæг куыд у, афтæмæй нæ сæйраг хæс у, цæмæй максималонæй фæхуымæтæг кæнæм æмæ фæкъаддæр кæнæм лæггæдты хæрдзтæ», — фембæлды рæстæджы банысан кодта Козаты Димитр.

Иумиаг сервисон центр саразын сæ къух фæрог кæндзæн, продукци аласын æмæ реализацийæн æмбæлон бар чи дæтты, Ирыстоны Хуссар æмæ Цæгат хæйтты уыцы организациты минæвæрттæн. Центры лæггæдтæ бæрæгбæрцæй сэкономи кæндзысты рæстæг, хæрдзтæ та уыдзысты минималон.

 

РХИ-йы Президент æмæ

Хицауады пресс-службæ

Comments are closed, but trackbacks and pingbacks are open.