Республикæ Хуссар Ирыстоны Культурæйы министрад æмæ сфæлдыстадон интеллигенци зæрдæрыстæй райстой зынгæ нывгæнæг  авангардист, Хуссар Ирыстоны адæмон нывгæнæг, Уæрæсейы Федерацийы сгуыхт нывгæнæг,  Республикæ Цæгат Ирыстон-Аланийы сгуыхт нывгæнæг, Уæрæсейы Аивæдты академийы кадджын уæнг Козаты Ушангы æнæрæстæджы амæлæты фыдуац.

Козаты Ушанг уыд стыр курдиаты хицау, уый Ирыстоны нывкæнынады аивад фæхъæздыгдæр кодта ахæм зынгæ уацмыстæй, кæцыты ахъардта хуызты ирд мидис æмæ сæ радæттыны фæрæзты оригиналондзинад.

Йе сфæлдыстад æндæртæй хицæн кæны жанрон хъæздыгдзинадæй, ныфсхаст фæрæзтæ æмæ энергийæ. Бирæфарсон курдиат, æхсидгæ сфæлдыстад æмæ вазыгджын адæймагон амонд  сты нывгæнæджы миддуне æмæ йæ æнæсфæлхатгæнгæ цардвæндаджы   бæрæггæнæнтæ. Уымæн ныв кæнын уыд æнæмæнгхъæуæг, куыд æнæмæнгхъæуæг у уæлдæф  улæфыны. Козаты Ушанг нырыккон аивады дунейы нысаниуæгджын бынат ахста. Йæ нывтæ æвæрд сты æндæр æмæ æндæр бæстæтæ æмæ континентты хуыздæр галлереяты. Уый хайад иста республикон, регионалон, æхсæнадæмон равдыстыты Мюнхены, Гамбургы, Китайы, Японы. Уымæн персоналон равдыстытæ уыд Таллины, Мæскуыйы, Цхинвалы, Дзæуджыхъæуы, Санкт-Петербурджы.

Козаты Ушангы куыстытæ æвæрд сты Уæрæсейы, Хуссар Ирыстоны паддзахадон музейты æмæ фæсарæйнаг коллекционерты сæрмагонд æмбырдгæндты.

Уый хорзæхджын у Нырыккон аивады Сыгъзæрин майданæй (Япони — 1988 аз), Уæрæсейы Аивæдты академийы «Аивадæн лæггад кæныны тыххæй» орденæй (2011 аз), Уæрæсейы Нывгæнджыты цæдисы майданæй (2011 аз). Хуссар Ирыстоны хъахъхъæныны хайадисты тыххæй та Козаты Ушанг хорзæхджын æрцыд Республикæ Хуссар Ирыстоны уæлдæр паддзахадон хорзæх «Уацамонгæ»-йæ.

Патриот, æцæг æмбæстаг, хуызфыссынады стыр дæсны Козаты Ушангы мæлæт у, баххæстгæнæн кæмæн нæй, ахæм стыр  зиан   нæ культурæйæн.

Фыдыбæстæйы аккаг фырты рухс ном æнустæм цæрдзæн нæ зæрдæты!

Рухсаг у, Ушанг!

Comments are closed, but trackbacks and pingbacks are open.