СÆХХÆСТ ИНВАЛИДЫ БÆЛЛИЦ
Аивгъуыйгæ къуырийы кæрон Президент Бибылты Анатоли кусæгон балцы уыд Ленингоры районы Орчъосан æмæ Цъинагары хъæуты. Паддзахады сæргълæууæг, фыццаджыдæр, йæ фæндаг акодта Орчъосаны хъæуыл, цыран фæуазæг Дриаты Валикъойы хæдзармæ. Бынаты куыд рабæрæг, афтæмæй хæдзары хицау бирæ рæстæджы дæргъы у уæззау рынчын. Бинонтæ финансон зындзинæдтæ кæй æййафынц, уымæ гæсгæ сæ бон нæ уыд инвалидон коляскæ балхæнын. Уый фæдыл хъæуы цæрæг Дриаты Майя бахатыд бæстæйы сæргълæууæгмæ, цæмæй йе ‘ххуысы къух фæдаргъ кæна æмæ инвалидон коляскæйæ сифтонг кæна Дриаты Валикъойы. Уымæ гæсгæ Бибылты Анатоли йæ кусæгон балцы рæстæджы сæххæст кодта Дриаты бинонты стыр бæллиц æмæ, йæ балцы рæстæджы уыдонæн лæвæрд æрцыд инвалидон коляскæ. Йæ рады Дриаты Валикъойы чызг Дали арфæйы ныхæстæ загъта президентæн: «Цытджын Президент, бузныг дын дæ лæвары тыххæй. Мæнæн мæ фыд ныр цалдæр азы дæргъы сыгъдæг уæлдæфмæ нæ рахызт, нæ уыд цалдæр азы дæргъы нæ кæрты дæр. Фæлæ ныр, дæ егъау лæвары фæрцы кæд сыгъдæг уæлдæфмæ цæуит», – загъта кодта Дриаты Дали.
Зæгъын хъæуы уый, æмæ инвалидон коляскæ æлхæд æрцыд хæрзаудæн фонд «Иууон Алани»-йы фæрæзтæй, кæцыйы бындурæвæрæг у Бибылты Анатоли.
ЦЪИНАГАРЫ ТРАГЕДИЙЫ БОН
28-æм апрелы Цъинагары хъæуы цæрджытæ нысан кодтой Цъинагары трагедийыл 27 азы сæххæсты бон. Фыдохы митинджы хайад райстой Президент Бибылты Анатоли, нæ республикæйы æхсæнады минæвæрттæ, Ленингоры администрацийы кусджытæ йæ сæргълæууæг Хацырты Филиппы сæргълæудæй, фæмардуæвджыты бинонтæ, Цъинагары хъæуы цæрджытæ æмæ скъоладзаутæ.
Бæстæйы сæргълæууæг æмæ фыдохы митинджы хайадисджытæ веноктæ æмæ дидинджытæ сæвæрдтой знаджы нæмыгæй фæмардуæвджыты цырты раз. Уый фæстæ мысæн мадзал байгом кодта Ленингоры администрацийы сæргълæууæг Хацырты Филипп. Уый йæ раныхасы банысан кодта, зæгъгæ, æрвылаз дæр Цъинагары хъæуы цæрджытæ æрæмбырд вæййынц, цæмæй æрымысой хъæубæсты фæдисон лæппутæй чи фæмард, уыдон рухс нæмттæ: «27 азы размæ, уæззау рæстæджы Цъинагары хъæубæсты хуыздæр лæппутæ фæдисы фæцыдысты, цæмæй хъæубæсты ном æмæ кад бахъахъхъæной. Уыдоны раз тугмондаг бирæгътæ сусæгæй бабадтысты æмæ сæ амардтой. Уыдон уыдысты Би-былты Гиви, Хуыбылты Отар, Мæргъиты Отар, Хуыбылты Зауыр, Чертхъоты Славик, Дудайты Тенгиз æмæ Хуыбылты Таймураз. Иу боны мидæг, иу хъæуы æрцыд стыр трагеди, кæцы ныууагъта Цъинагары хъæуы цæрджыты зæрдæты егъау хъæдгом. Уыцы рæстæджы уæззау дуг æвзæрста æгас Ирыстон. Æмæ, куыд алы ран, афтæ Цъинагары хъæуы фæссивæд дæр æппынæдзух архайдтой, цæмæй бахъахъхъæной сæ кæстæрты цард, сæ сомбон», – загъта Хацырты Филипп. Æрсидт хъæуы кæстæр фæлтæрмæ, цæмæй ма рох кæной сæ хистæр фæлтæры хъайтардзинæдтæ. Уый фæстæ бахатыд æрæмбырдуæвджытæм, цæмæй иу уысм æмырæй алæугæйæ ссарой, Ирыстоны сæрвæлтау йæ сæр нывондæн чи æрхаста, уыцы хъайтар лæппуты рухс нæмттæ.
Фыдохы митинджы раныхас кодта Президент Бибылты Анатоли.
– Зынаргъ æмбæстæгтæ! Кæй зæгъын æй хъæуы, 27 азы размæ ‘рцыд егъау æвирхъау хабар – Цъинагары хъæубæстыл нæ, фæлæ æмткæй Ирыстоныл. Уый тыххæй æмæ иу бон, иу хъæубæстæй, уый æппæт æвзонг фæсивæд куы фесæфой, уæд, уый егъау трагеди у æмткæй Ирыстонæн. Рысти хъæубæстæ, рысти комбæстæ, рысти Ирыстон. Фæлæ уæд, æппæт зындзинæдтæм нæ кæсгæйæ, хъæубæсты цæрджытæ равдыстой стыр фидардзинад. Уыцы уæззау дуджы рæстæджы Ленингоры район уыд Гуырдзыстоны оккупацийы бын. Æмæ уымæ нæ кæсгæйæ, сымах иууылдæр иумæ равдыстат егъау хъарудзинад уыцы рæстæджы, æмæ уын мæ сæрæй ныллæг кувын, стыр бузныг уын зæгъын Ирыстоны адæмы номæй.
Мæнæ ам ныртæккæ цы фæсивæд лæууы, уыцы фæсивæдæн ис цæвиттон кæмæй исой, уый. Махæн рохгæнæн нæй ацы лæппуты нæмттæ, махæн рохгæнæн нæй , Ирыстоны сæрибардзинады тыххæй сæ сæртæ нывондæн чи ‘рхастой, уыцы лæппуты рухс нæмттæ. Зындзинад алы хатт дæр адæймаджы фидар кæны, цы зындзинæдтыл рацыдысты Цъинагары адæм, цы зындзинæдтæ баййæфтой æгас Ирыстоны цæрджытæ, уыдон мах сфидар кодтой. Æмæ махæн нæ хæс у, цæмæй ацы бонтæ ма рох кæнæм æмæ кæронмæ æвдисæм нæ фидардзинад», – загъта Президент Бибылты Анатоли.
Митинджы æрæмбырдуæвджыты размæ рахызт Цъинагары хъæуы цæрæг Уалыты Зоя. Уый банысан кодта, зæгъгæ, цæудзысты бонтæ æмæ азтæ, фæлæ нæ фыдбоны сыхæгты къухæй нæ адæмæй чи фæмард, уыдоны рухс нæмттæ махæй никуы ферох уыдзысты. Цъинагары хъæуы цæрджытæй никуы ферох уыдзысты ацы авд лæппуйы нæмттæ æмæ ацы уæззау трагеди дæр. Дарддæр Уалыты Зоя æрæмбырдуæвджытæн радзырдта трагедийы историйы тыххæй.
1991 азы Цъинагары хъæуы ацы егъау трагеди куы ‘рцыд, уæд æххуысы къух фæдаргъ кодтой Цхинвалы уæды мидхъуыддæгты органты кусджытæй иу къорд, зæгъгæ, балæууæм не ‘фсымæрты фарсмæ. Уыцы къордæй цалдæрæй хайад райстой мысæн мадзалы. Сæ номæй ныхасы рацыд Тедеты Вовæ æмæ ‘рæмысыд 27 азы размæ æрцæугæ æнамонд цаутæ.
Уый фæстæ Цъинагары скъолайы ахуырдзаутæ кастысты хæстон темæйыл фыст æмдзæвгæтæ.
ТАНДЕЛАТЫ Виленæ
Comments are closed, but trackbacks and pingbacks are open.