Куыд зонæм, афтæмæй инновацион технологиты фæрцы нæ республикæмæ хуынд цæуынц реалон сектор райтынг кæныны нысанæн инвестортæ. Уæрæсейы æртæ бангæй цы æхцайы фæрæзтæ хицæн æрцæуынц, уый руаджы къухтæ æрфыстæуы сразыдзинадыл Хуссар Ирыстоны территорийыл инвестицион климат саразыныл. Инвестицион бадзырдмæ гæсгæ дыууæ фарсы дæр райсынц хæс. Паддзахад хæсджын у зæххы фадыджы цалдæр вариант радтын инвесторы домæнтæм гæсгæ. Уый йæхæдæг æвзары фадыг, кæцы йын къух ратдзæн проект среализаци кæнынæн. Проектмæ гæсгæ дарддæр паддзахад объекты аразы коммуникацитæ, æппæт дæр йæхимæ исы республикæ, цæмæй нæ бæстæмæ инвесторы æрбацыдæн арæзт æрцæуой уæлдай комфортон уавæртæ. Фæлæ йæ рады инвесторы разылæууæг хæстæм, кæцытæм гæсгæ инвестицион проект хъуамæ реализаци æрцæуа банысангонд æмгъуыдмæ. Проекты руаджы фæзыны куысты бынæттæ, заводты цы персонал хъуамæ куса, уыдон куыст сахуыр кæныны хæс дæр ис инвесторыл. Кæй зæгъын æй хъæуы, ацы проекты хорздзинæдтæй ма иу у хъалонты закъондæттынад дæр. Ома, проект реализаци куы æрцæуы, уæд хъалонтæ фæцæуынц бынæттон бю-джетмæ.
Куыд зонæм, афтæмæй марты мæйы байгом суаруадзæн завод «Родник Осетии». Уый ис нæ горæты БАМ-ы районы. Проект реализаци æрцыд «Владимирский стандарт»-ы руаджы. «Осетинская» ахæм маркæйы бын уагъд цæуы минералон дон. Дон ист цæуы Бæгъиаты 9-æм донгуырæнæй. уырдыгæй уыйбæрц дон цæуы, æмæ æппындæр не ‘ндавы заводы куыстыл.
Завод бакæныны рæстæджы «Владимирский стандарт»-ы вице-президент, амалиуæггæнæг Павел Антов дзырдта: «Ацы проект реализацийы рæстæджы æз ницы цæлхдуртыл фембæлдтæн. Процесс цыд тынг тагъд. Агъуыст цæттæ кæй уыд, уый бирæбæрцæй фæтагъд кодта проект бакæныны хъуыддаг».
Заводы цы суары дон уагъд цæуы, уый реализаци цæудзæн Уæрæсейы Федерацийы территорийыл. Ныртæккæ заводы кусы æрмæстдæр иу хахх, кусджытæ та дзы ис 20 адæймаджы бæрц. Компани «Владимирский стандарт»-ы минæвар Михаил Зиновьевы ныхæстæм гæсгæ завод дон рæстæгмæ кæд Згъуыбиры донгуырæнæй исы, уæддæр æппæт æнæмæнгхъæуæг процедурæтæ рацæуыны фæстæ та компани сараздзæн документтæ сæрмагонд донгуырæн саразыны фæдыл. Уый ма куыд загъта, афтæмæй сæрмагонд донгуырæны фæфылдæр уыдзæн кусджыты нымæц дæр. Уымæн æмæ æвæрд æрцæудзæн ног хахх. Цæмæй, дам, куыстуат уæрæхгонд æрцæуа, уый тых-хæй, дам, махæн ис хорз фадæттæ. Ныртæккæ завод цы территорийыл ис, уый дзуапп дæтты куысты уавæртæн.
Михаил Зиновьевы ныхæстæм гæсгæ республикæйы территорийыл ахæм куыстуаты фæзынд дзурæг у Хуссар Ирыстоны размæцыдыл.
«Мæн ныфс ис, цы продукци нæм уагъд цæуы, уый Владимиры областы кæй суыдзæн тынг популярон. Мæ коллегæтæ-инвестортæ, бирæ рæстæджы дæргъы æвзæрстой, завод кæм саразой, уый. Фæлæ Хуссар Ирыстоны территорийыл цы инвестицион климат арæзт æрцыд, уый хынцгæйæ, равзæрстой сæрмагондæй ацы бынат. Фæнды мæ бузныджы ныхæстæ зæгъын уæ къухдариуæгадæн. Ацы процесс цыд тынг тагъд. Уый, кæй зæгъын æй хъæуы, дыууæ фарс кæрæдзи хорз кæй æмбæрстой, уый руаджы уыд. Иууыл цыбырдæр æмгъуыдмæ реализаци æрцыд проект. Нырма раджы у дзурын продукцийы реализацийыл. Бизнесæн йæхи фæткойтæ ис, фæстиуæг уадид нæ ратты. Фæлæ уал æхсызгонæй мæ бон банысан кæнын у, заводы цы персонал кусы, уыдонæй зæрдæ кæй рухс кæны, уыцы æхсызгон хъуыддаг. Хуссар Ирыстоны уазæгуарзон адæмимæ куы базонгæ дæн, уæд æй бамбæрстон, нæ компанийы проект арæзт ам кæй æрцыд, уый раст кæй уыд. Уæ территорийы географион равæрдмæ гæсгæ иттæг хорз бынаты ис, уæ дон та йæ æууæлтæм гæсгæ у уæ хæзна. Хъуамæ йæ æмбарат, аргъ ын кæнат», – дзырдта «Владимирский стандарт»-ы проекты минæвар.
Хуыцау зæгъæд, цæмæй ацы проекты фæстæ Ирыстонмæ ныккæлой инновацион технологиты æхсæнады минæвæрттæ, цæмæй Хуссар Ирыстон райса æууæнкджын партнерты.
Уазæгты М.
Comments are closed, but trackbacks and pingbacks are open.