«Ленингоры поселочы цалцæг цæуынц уынгтæ. Скъола æмæ сывæллæтты цæхæрадонмæ цы фæндæгтæ цæуынц, уыдон фæндагаразджытæ æмбæлон уагмæ æркодтой», – хъусын кæны Ленингоры районы администрацийы пресс-службæ.

Цалцæг æрцыд фараст уынджы. Уыдонæн сæ дæргъ егъау нæу, фæлæ се ‘ппæт дæр ранæй-рæтты уыдысты æвзæр уавæрты. Районы администрацийы сæргълæууæг Гæджиты Иларионы хæслæвæрдмæ гæсгæ коммуналон кусджытæ слæгъз кодтой фæндаджы уæлцъар, дондзæуæн къанаутæ дæр æмбæлон уагмæ æркодтой. Ныр уынгтæ цæттæ сты асфалт кæнынмæ дæр. Администрацийы сæргълæууæг зæгъы, зæгъгæ, кæд ацы аз фæрæзтæ самал кæной, уæд уынгтæ асфалт æрцæудзысты, кæннæд иннæ аз бацархайдзысты æмæ асфалт æрцæудзысты.

Хæрзарæзт æрцыд районы Адæмон сфæлдыстады хæдзары кæрт дæр. Ардæм дæр æвзæр боныгъæдты бахизæн нæ уыд. Ныр кæрты æвæрд æрцыд плиткæ.

Ленингормæ хæстæг ис Мордебаны хъæу. Уырдыгæй дон хастой поселочы цæрджыты иу хай. Суадон рагæй фæстæмæ хъуыстгонд у йæ хосгæнæн миниуджытæй. Ацы доны æууæлтæ сахуыр кодтой советон рæстæджы, ис ын специалистты хатдзæгтæ дæр. Хъæуы цæрджытæ куыд зæгъынц, афтæмæй донæй бынаты баназын æмæ дзы семæ ахæссыны нысанæн, Гуырдзыстоны районтæй ардæм цыд бирæ адæм. О, фæлæ адагмæ æвзæр ныххизæн уыд. Бирæ азты йæм йæ хъус ничиуал дардта æмæ схъæд, зымæджы йæм æдæрсгæ ныххизæн  нал уыд. Ленингоры районы коммуналон хæдзарады кусджытæ, суадонмæ фæндаджы хæрзарæзтадмæ бав-нæлдтой дыууæ къуырийы размæ,  асинтæ йæм сарæзтой æмæ йын йæ сæр бамбæрзтой. Ныр афæдзы алы афон дæр уырдæм ныццæуæн сæрибарæй уыдзæн.

УАЗÆГТЫ Марфа

Comments are closed, but trackbacks and pingbacks are open.