Къухтæ фыст æрцыдысты сразыдзинадыл згъæркуыстгæнæн заводы арæзтады фæдыл

31-æм марты Цхинвалы РХИ-йы Экономикон рæзты министр Зæгъойты Вильям æмæ инновацион технологиты мæскуыйаг компанийы проектты фæдыл директор Михаил Кожевников къухтæ æрфыстой сразыдзинадыл згъæркуыстгæнæн заводы арæзтады фæдыл.

Зæгъойты Вильямы ныхæстæм гæсгæ, арæзт æрцæудзæн нырыккон завод, цыран æвæрд æрцæудзысты нырыккон ифтонггæрзтæ.

«Мæн ныфс ис, æмæ ам цы продукци уагъд цæудзæн, уый хъæуæг кæй уыдзæн Уæрæсейы Федерацийы территорийыл. Нæ коллегæтæ, инвестортæ, кæцыты бафæндыд ацы завод саразын, бирæ рæстæджы дæргъы æвзæрстой, номхуындæй, завод кæм саразой, уый, фæлæ Хуссар Ирыстоны территорийыл цы инвестицион климат арæзт æрцыд, уый хынцгæйæ равзæрстой Хуссар Ирыстоны. Æхсызгонæй банысан кæнын хъæуы уый дæр, æмæ æрдæг азы дæргъы цы куыст уагъд цыд, уый радта йæ фæстиуæг инвестицион бадзырдыл къухтæ æрфыссыны хуызы», – загъта уый.

Зæгъойты Вильям бамбарын кодта, зæгъгæ, объекты хынцыд æрцыдысты иу миллиард сомы онг инвестицитæ.

«Инвестицион бадзырдмæ гæсгæ, дыууæ фарсы дæр исынц хæс. Паддзахад хæсджын у зæххы фадыджы цалдæр варианты радтын, кæцы æмбæлон у инвесторы домæнтæн, æмæ уый  æвзары фадыг, кæцы йын къух ратдзæн проект среализаци кæнынæн. Проектмæ гæсгæ, дарддæр паддзахад  объектмæ аразы коммуникацитæ, æппæт дæр йæхимæ исы республикæ, цæмæй нæ бæстæмæ инвесторы æрбацыдæн арæзт æрцæуой уæлдай комфортон уа-вæртæ», – банысан кодта Экономикон рæзты министр Зæгъойты Вильям.

Уый ма йæ ныхасмæ бафтыдта, зæгъгæ, инвесторы ‘рдыгæй дæр ис хæс-тæ, кæцытæм гæсгæ банысангонд æмгъуыдтæм инвестицион проект хъуамæ реализаци æрцæуа.

Йæ рады, Михаил Кожевников банысан кодта, зæгъгæ, йын æхсызгон у уазæгуарзаг Республикæ Хуссар Ирыстонмæ кæй æрцыд, уый.

«Фыццаг рады, мæ нæ инновацион технологиты компанийы къухдариугады номæй раарфæ кæнын фæнды Хуссар Ирыстоны Хицауадæн, Зæгъойты Вильямæн ацы Инвестицон бадзырды реализацийы æмархайды тыххæй. Ацы процесс цыд тынг тагъд, сплангонд ма-дзæлтты реализаци иууыл цыбырдæр æмгъуыдты кæй ацыд, уый, кæй зæгъын хъæуы, бындуронæй бандæвта, номхуындæй, Хуссар Ирыстоны территорийыл ацы проект реализаци кæй æрцæу-дзæн, уый фæдыл мах уынаффæ кæй райстам, ууыл». Михаил Кожевниковы ныхæстæм гæсгæ, ацы инвестицион проекты æрмæст згъæркуыстгæнæн заводы арæзтад не ‘рцыд хынцыд.

«Уый у практикон æгъдауæй згъæркуыстгæнæн æнæхъæн фадыджы рæзт», – загъта Михаил Кожевников.

Уый ма бамбарын кодта, зæгъгæ, проекты арæзтады реализацийы æмгъуыдтæ сты дыууæ аз æмæ æрдæджы онг.

«Мах ныфс ис, уымæй æмæ реализацийы æмгъуыдтæ гæнæн ис фæкъаддæр уой, кæд æмæ процесс ам ацæуа тагъддæр, уæд. Иумæйагæй, абон æз ницы ныхдуртæ уынын ацы проект среализаци кæныны тыххæй, ам адæм сты зæрдæхæлар, бæстæ у уазæгуарзаг»,- йæ ныхас адарддæр кодта Михаил Ко-жевников.

Директоры ныхæстæм гæсгæ, проекты руаджы 50 адæймагæн фæзындзæн куысты бынæттæ. «Гæнæн ис æмæ ацы нымæц фæфылдæр уа. Ацы заводы цы ифтонггæрзтæй пайда цæудзæн, уыдон уыдзысты фæсарæйнаг рауагъд. Заводы цы персонал кусдзæн, уыдон сахуыр кæныны тыххæй æрбаконд æрцæудзысты фæсарæйнаг специалисттæ. Персоналы 90 проценты уыдзысты Хуссар Ирыстоны цæрджытæ», – бамбарын кодта уый.

Михаил Кожевников банысан кодта хæрзвадат инвестицион климат, кæцы арæзт æрцыд Хуссар Ирыстоны архайдæй. Уый ма загъта, зæгъгæ йæ ныфс ис, ам цы инвестицион климат арæзт æрцыд, уый руаджы æндæр инвестортæ дæр æввахс рæстæджы кæй æрбацæудзысты Хуссар Ирыстонмæ сæ проекттимæ.

«Цалдæр азы размæ æз ардæм æрцыдтæн уазæгуаты мæ хæлæрттæм, æмæ ацы рæсугъддзинæдтæ куы федтон, Хуссар Ирыстоны уазæгуарзон адæ-мимæ куы базонгæ дæн, уæд æй бамбæрстон нæ компанийы проекттæй сæ иу арæзт кæй æрцæудзæн Хуссар Ирыстоны. Кæй зæгъын æй хъæуы, инвестицион химæздахындзинадæй дарддæр ма, нысаниуæг ис хъалонты закъондæттынадæн дæр». Михаил Кожевников бамбарын кодта, зæгъгæ, кондад ницахæм зиан нæ хæсдзæн алфæмбылайы дунейæн.

Мадзалы кæрон Зæгъойты Вильям банысан кодта республикæйы ахæм аналогон кондадты баконды æвæрццаг нысаниуæджы тыххæй.

«Хуыцау зæгъæд, цæмæй ацы фыццаг документ, кæцыйыл къухтæ æрфыстой Хуссар Ирыстоны Хицауад æмæ инновацион технологиты акционерон æхсæнад разæууæл уа нæ дыууæфарсон æфтиагджын дарддæры æмгуыстады планы, цæмæй Хуссар Ирыстон райса æууæнкджын партнеры ацы акционерон æхсæнады хуызы æмæ Инновацион технологиты компани та Хуссар Ирыстоны Хицауады хуызы райса аккаг партнеры».