Цхинвалы ис 38 бирæуæладзыгон «Сидзæр» хæдзары

Редакцимæ æрбацыд коллективон фыстæг нæ горæты цæрæнуатон-коммуналон кооперативон хæдзæртты цæрджытæй. Бæрæг куыд у, афтæмæй ахæм хæдзæрттæ республикæйы ис 38. Цæрджытæ рагæй домынц, цæмæй сæ йæхимæ айса Цхинвалы администрацийы цæрæнуатон-коммуналон хæдзарад. Закъонмæ гæсгæ кооперативон хæдзары цæрджытæ сæ цæрæнуатон-коммуналон лæггæдтæ горæтæн нæ фидынц. Хатт куы фæзыны иумæйаг исад сцалцæг кæныны, афтæ ма хæдзæртты раз территоримæ хуыздæр хъусдард æрдарыны фарстатæ, уæд горæты администрацийы цæрæнуатон-коммуналон хæдзарады дзуапп вæййы, зæгъгæ, нæ балансыл не стут æмæ уæхæдæг уæхи кой бакæнут.

Куыд рабæрæг, афтæмæй ацы фарстайы фæдыл ацы аз 24 апрелы Хицауады æмбырды Бекъойты Геннади уыцы рæстæджы нырма сæрдар уыдис æмæ æнæмæнгхъæуæгыл банымадта бирæфатерон хæдзæртты иумæйаг исадмæ æмбæлон хъусдард аздахын. «Ацы проблемæ рагон у. Цæрæн хæдзæрттæ нæ горæты цæрæнуатон-коммуналон хæдзарады балансмæ радтын фадат дæтдзæн фидæны куыстуаты фонд бахъахъхъæнынæн». Дарддæр ма æрдзырдта бирæ азты дæргъы цæрæнуатон-коммуналон хæдзарады бирæфатерон хæдзæрттæм æмбæлон хъусдард кæй нæ уыд æмæ уый фæстиуæгæн исады фылдæр хай хъæуы бындуронæй цалцæг кæнын. Бекъойты Геннади бахæс кодта горæт Цхинвалы администраци æмæ Паддзахадон цæрæнуатон-коммуналон хæдзарадæн, цæмæй кооперативон бирæфатерон хæдзаратты иумæйаг бынæттæ лæвæрд æрцæуой эксплуатацимæ, уыдонмæ.

Хицауады уагæвæрд куыд æххæст цæуы, уый тыххæй фарст радтам горæт Цхинвалы цæрæнуатон-коммуналон хæдзарады сæргълæууæг Хъотайты Аланмæ. Йæ дзуапп уыд ахæм:

«Цæрæнуатон-коммуналон хæдзарады балансыл не сты ацы бирæуæладзыгон кооперативон хæдзæрттæ. Æрвылаз дæр республикæйы паддзахадон бюджетæй цæрæнуатон-коммуналон хæдзарады хæрдзтæн цы финансон фæрæзтæ хицæн æрцæуы, уыдон вæййынц бынтон цъус, нæ фæфаг кæнынц нæ балансыл цы коммуналон хæдзæрттæ ис, уыдонæн лæггад дон, газ, электроифтонгадмæ хауæг æрмæг цалцæг кæнынæн, афтæ ма уынгтæ æфснайын, бырæттæ ласынæн æмæ æндæр ахæм куыстытæн. Ацы 38 хæдзары цалынмæ горæты балансмæ ма радæтта Хицауад, уæдмæ махæн нæ бон нæу уыдон тыххæй экономикон рæзты министрадмæ хæрдзты калькуляци æмæ бакæнгæ лæггæдты гуырахсты зонæнтæ бавдисын. Сымах уæлдæр цы до-кументы кой скодтат, уыимæ æз зонгæ дæн, фæлæ кæд æмæ ис ахæм уагæвæрд, уæддæр уымæн ис йæхи процедурæ. Махмæ лæвæрд куы æрцæуой 38 кооперативон бирæуæладзыгон хæдзары, уæд нæ юрист та бакусдзæн тарифтыл, кæцы æрвыст æрцæудзæн Экономикон райрæзты министрадмæ. Тарифты бындурыл бæлвырд цæудзысты субсидиты бæрцтæ, кæнæ бюджетон лимиттæ. Æнæуи, цалынмæ Экономикон райрæзты министрады ацы гæххæттыл кусынц, уæдмæ мах, кæй зæгъын æй хъæуы, уавæр æмбаргæйæ нæ фадæттæ цæйбæрц сты, уымæй æххуыс кæнæм кооперативон хæдзæртты цæрджытæн. Агъуыст раивын, подъездты капиталон æгъдауæй цалцæг кæнын, кæнæ зынаргъ исты хæтæлтæ балхæнын нæ бон нæу. Фæлæ сæм лыстæг хъуыддæгты алы хатт дæр фæдаргъ кæнæм не ’ххуысы къух. Коммуналон фиддонтæ чи фиды, уыцы хæдзæрттæн дæр, куыд æмбæлы, афтæ лæггад кæнын нæ бон нæу. Бирæ хæдзæртты подъездтæ æртынгай азты дæргъы цалцæггонд нæ уыдысты.

Мах нымадмæ гæсгæ иу подъезд капиталонæй сцалцæг кæныны аргъ лæууы 750-800 мин сомы. Коммуналон фиддонтæ æнæуыйдæр нæ республикæйы минималонтæ сты æмæ рох кæнын нæ хъæуы, уыдон дæр кæй нæ фидынц нæ горæты цæрджытæн сæ фылдæр хай», — загъта Хъотайты Алан.

Нæ редакци дарддæр дæр йæ хъус дардзæн ацы фарстатæм æмæ уый тыххæй хъусын кæндзыстæм газеты радон номырты.

Ныртæккæ сымах къамы уынут нæузæххонты уынджы 1-æм кооперативон хæдзары, дыккæгæм подъезды æдзæллаг уавæр.

УАЗÆГТЫ Марфæ

Comments are closed, but trackbacks and pingbacks are open.