Нæ республикæйы медицинæйы къабазы иумиаг уавæр фæхуыздæр æмæ дохтырты профессионалон æмвæзад фæбæрзонддæр кæныны тыххæй Уæрæсейы хуыздæр медицинон уагдæттæй хуынд цæуынц зындгонд медиктæ, сæ дæсныйады æцæг профессионалтæ. Уыдон бынаты нæ дохтыртæн кæнынц практикон æххуыс, кæсынц сын лекцитæ.

Банысан кæнын хъæуы уый, æмæ ацы мадзæлттæ уагъд кæй цæуынц Хуссар Ирыс-тоны æнæниздзинад хъахъхъæныны рæзты концепцийы фæлгæтты, цыран дзырдæуы, медицинон кусджыты кæй хъæуы сæ квалификаци бæрзонддæр кæнын.

Ацы концепци ист æрцыдис ивгъуыд азы декабры мæйы кæрон нæ республикæйы Президент Тыбылты Леониды Барамындмæ гæсгæ.

Æнæниздзинад хъахъхъæныны рæзты концепцимæ гæсгæ медицинон кусджытæн лекцитæ кæсынмæ нæ республикæмæ цæудзысты медицинæйы алы фæдыздæхтыты специалисттæ. Лекциты цикл кæсын райдыдтой ацы аз 8-æм февралæй æмæ фæуд кæнынц 2-æм марты.

Нæ республикæйы Сывæллæтты реабилитацион центр байгом кæныны агъоммæ уал нæ республикæйы педиатртæн уæрæсейаг медиктæ кæсдзысты лекцитæ.

Цæвиттон, 14-æм февралы уал уыдонæн республикон рынчындоны конференцзалы лекцитæ кастысты Уæрæсейы Медицинæйы зонæдты академийы фæсдипломон ахуырады сывæллæтты эндокринологийы кафедрæйы доценттæ Олег Латышев æмæ Елена Киселева.

Лекцитæ кæсыны размæ уыдон басгæрстой нæ дохтыртимæ иумæ сывæллæтты. Стæй та нæ республикæйы педиатртæн кастысты лекцитæ, сывæллæтты эндокринологон низтæ рæстæгыл куыд сбæрæг кæнын хъæуы æмæ сын куыд хос кæнын хъæуы æппæт уыцы æнæмæнгхъæуæг фарстатыл. Фыццаг уал уыдон æрдзырдтой сывæллæтты сæкæрнизы тыххæй, сæ æрдон рæзты тыххæй, сывæллæтты артериалон гипертензийы, нард кæнын æмæ æндæр ахæм темæтыл.

Лекцитæ бакæсыны размæ бузныджы ныхæстæ загъта РХИ-йы Æнæниздзинад хъахъхъæныны министры хæдивæг Плиты Агуындæ. Уый ма æрдзырдта уæлдæрзагъд концепцийы æмæ лекциты нысаниуæджы тыххæй: «Махæн дарддæр кæнынц лекциты цикл 2017-2021 азты Æнæниздзинад хъахъхъæныны рæзты концепцийы фæлгæтты. Уый у стыр хайбавæрд æнæниздзинад хъахъхъæныны рæзтмæ. Уымæн æмæ махмæ ис кадрон ресурсты цухдзинад, фæлæ нæм потенциал ис, уымæ гæсгæ мах нæ уæрæсейаг коллегæты руаджы фæлварæм ацы потенциал среализаци кæнын ног медицинон объектты байгом кæныны агъоммæ. Махæн уымæй нæ куысты гъæд бирæ фæхуыздæр уыдзæнис, уымæй мах барухс кæндзыстæм нæ республикæйы цæрджыты зæрдæтæ», — загъта уый.

Лекциты циклтæ каст фæуыны фæстæ нæ дохтыртæ уæлæмхас цы зонындзинæдтæ райстой, уыдон тыххæй дæтдзысты фæлварæнтæ, уый фæстæ сын лæвæрд æрцæудзысты уæрæсейаг академийы фæсдипломон ахуырады бæлвырдгæнæнтæ (сертификаттæ).

Ацы мадзалы ма журналисттæн РХИ-йы Æнæниздзинад хъахъхъæныны фарстаты фæдыл Президенты уынаффæгæнæг Сиукъаты Радион куыд фехъусын кодта, уымæ гæсгæ нæм сывæллæтты эндокринолог иу йедтæмæ кæй нæй, уый раст нæу, уый тыххæй ист æрцæудзысты æмбæлон мадзæлттæ.

Туаты Ларисæ

Comments are closed, but trackbacks and pingbacks are open.