Республикæ Хуссар Ирыстоны минæварад куыд фехъусын кодта, афтæмæй Мæскуыйы Уæрæсейы Фæсарæйнаг хъуыддæгты министрады  культурон центры уыд Æхсæнадæмон литературон преми «Булæмæргъ»-ы 2-аг сезоны лауреатты хорзæхджын кæныны церемони. Мадзал бацæттæ кодта Хуссар Ирыстоны минæварад   компани  «Стройцентр»-ы къухдариуæггæнджытæ Æзнауырты Георги æмæ Витали, афтæ ма Серби æмæ Словенийы ирон æхсæнадты минæвар Уалыты Гелайы комкоммæ хайадист æмæ æххуысæй.

Прозæйы жанры уацмысты циклы тыххæй æртыккаг премийы диплом  æмæ  20 000 мин сомы Организаторты совет æмæ премийы эксперттæ радтой Мæргъиты Алимæн. Хорзæх радта горæт Сочийы ирæтты æхсæнад «Алантæ»-йы сæрдар Мæргъиты Анатоли. Дыккаг премийы диплом æмæ æхцайы преми 30 000 сомы райста Томайты Роксанæ, «Скæсæйнаг æмбисæндтæ» ирон æвзагмæ кæй ратæлмац кодта, уый тыххæй. Преми йын радта Финляндийы ирон диаспорæйы сæргълæууæг Къусрати Анатоли. Дыккаг сезоны уæлахиздзау æмæ фыццаг премийы, афтæ ма 50  мин сомы  хицау ссис хуссарирыстойнаг æвзонг журналисткæ Уалыты Дианæ. Дианæйæн хорзæх радта Мæскуыйы ирон æхсæнады сæргълæууæг Уыртаты Бексолтан. Уый стыр аргъ скодта  мадзалы цæттæдзинадæн æмæ æвзонг фысджытæн загъта сфæлдыстадон æнтыстыты фæндиæгтæ. Мадзалы хайад райстой Уæрæсейы Федерацийы Фæсарæйнаг хъуыддæгты министрады, фæсарæйнаг дипломатон мисситы  минæвæрттæ, ирон диаспорæты къухдариуæггæнджытæ, æхсæнады минæвæрттæ.

Церемонийы хайадисджытæн равдыстæуыд концерт дæр. Концерты хайад райстой кæфтыты мæскуыйаг ансамбль «Алания»-йы солисттæ  Марушев Тимуры къухдариуæгадæй, афтæ ма Хъуылымбегты Сослан, Хуытъинаты Маринæ, Хасанова Алинæ æмæ Серафима Кристинская.

Мадзалы фæлгæтты ауагъдæуыд æртæ равдысты — ирон зындгонд нывгæнæг Гобозты Владимир, архитектор Гобозты Александр æмæ дизайнертæ Еналдыты Фатимæ æмæ Гуцунаты Дзерассæйæн.

Comments are closed, but trackbacks and pingbacks are open.