Лекци – Ирыстоны историйы тыххæй

Историон темæйыл иу сахат æмæ æрдæг цы лекци цыд, уый тынг цымыдисон фæкаст 9-11 кълæсты ахуыргæнинæгтæн. Уыдон æрбацыдысты фæсивæды монон-хæрзæгъдауоны хъомылады паддзахадон программæйы фæлæгтты Национ музей цы лекциты цикл уадзы, уыцы фыццаг лекцимæ. Сæрмагондæй рахицæнгонд фæзуаты музейы кусджытæ сфитонг кодтой импровизацигæнæн лектори 30 хъусæгæн. Уым уыдысты нæ горæты 2-æм астæуккаг скъолайы ахуырдзаутæ æмæ ахуыргæнджытæ дæр.

Скифты æмæ абоны боны историйы, ма ирæттæ скифтæ-сæрмæттæ-аланты знæмтæ кæй сты, ууыл дзурæг артефактты тыххæй хъусджытæн радзырдта музейы директор Зассеты Мераб.

«Афтæ кæй хъуыды кодтон, зæгъын, сывæллæттæн æрдæг сахатæй фылдæр сæ бон нæ бауыдзæн байхъусын, уый раст нæ уыд, алцыдæр рауад хорз. Сывæллæттæ дæр æмæ ахуыргæнджытæ дæр цымыдисимæ хъуыстой лекцимæ. Акцент арæзт æрцыд  нæ традициты гуырæнтыл, куыд  æгъдауы æмбарынад, аланты намысы кодексыл æмæ афтæ дарддæр.

Хорз у æмæ æрмæст ивгъуыды æвдисæнтæ нæ уæвынад кæнынц, фæлæ нырыккон иртасæнтæ дæр æххæстæй æвдисынц нæ фыдæлтæ чи уыдысты, уый. Æппæт уыдæтты тыххæй, аргументты æмæ историон бæлвырдгæнæнтимæ лыстæггай  зонгæ кæнын хъæуы рæзгæ фæлтæры. Нæ фæсивæд æрмæст ирæтты ивгъуыды тыххæй нæ базондзысты, фæлæ ма базонгæ уыдзысты национ традицитæ æмæ æгъдæуттимæ дæр».

Сывæллæттæ дæр æмæ ахуыргæнджытæ дæр банысан кодтой, зæгъгæ, музеймæ æрбацыд нымадтой ноджы иу скъолайон урокыл, фæлæ уыцы урок уайтагъд рахызт Ирыстоны ивгъуыдмæ цымыдисон балцмæ. Лекцийы рæстæджы зал йедзаг кодта ног хъусджытæй. Цасдæр рæстæджы фæстæ 2-æм астæуккаг скъолайы ахуырдзаутæм æрбаиу сты Аивæдты паддзахадон лицейы ахуыргæнинæгтæ, æрбаиу сæм сты музейы æппæт кусджытæ дæр. Афтæ цымыдисонæй атахт рæстæг.

Мадзалы кæрон айзæлыд Зассеты Мерабы æмдзæвгæ «Иронæн», цыран уый ирдæй сиды ирон адæмы бæрзонд монон-хæрзæгъдауон нормæтæ бахъахъхъæнынмæ. Сывæллæттæм лекци стыр цымыдисдзинад кæй сæвзæрын кодта, ууыл дзурæг уыд уый дæр æмæ сæ цасдæр рæстæджы дæргъы кæй нæ фæндыд музейæ ацæуын, уæлæмхас фарстытæ лæвæрдтой æмæ бузныджы ныхæстæ дзырдтой цымыдисæй арвтигæ рæстæджы тыххæй.

Скъоладзауты иннæ къорды темæ та уыд брозæйон æнусы керамикæ, кæцы æвæрд ис  Национ музейы. Уый фæдыл та сывæллæттæн радзырдта хйады хистæр Дриаты Фатимæ.

Радон лекци та уыдзæн хуызфыссынады аивады тыххæй. Уый фæдыл та ахуыргæнинæгтæн радзурдзæн экскурсиамонæг Бекъойты Олеся.

Нæ уацх.