Ленингойрæгты сфæлдыстадæй байгом фестиваль

Ленингойрæгты аивад æрбамбырд кодта сфæлдыстадон адæмы

Ленингоры Сывæллæтты сфæлдыстадон галуан скъоладзау фæсивæдæн у уæлæмхас ахуырадон центр. Ам рæзгæ фæлтæр стыр æхсызгонæй æрвитынц сæ сæрибар рæстæг, архайынц дзы æндæр æмæ æндæр сфæлдыстадон къордты. Сывæллæттæн сæхи къухтæй хатгай диссаджы зæрдæмæдзæугæ куыстытæ рацæуы æмæ сæ уæд рахæссынц адæмы рæгъмæ.

Уый фæдыл галуаны директор Быценты Гуло фæндон бахаста, цæмæй Республикон сывæллæтты сфæлдыстадон галуаны адæмæн равдисой сæ арæхстдзинад.

4-æм ноябры Цхинвалы Республикон сывæллæтты сфæлдыстадон галуаны байгом декоративон-прикладон æмæ хуызфыссынады аивады фестиваль «Мир творчества» æмæ йæ фыццаг хайадисджытæ систы ленингойрæгтæ. Фестивалмæ фæуазæг сты куыд горæты, афтæ районты сывæллæттæ æмæ ахуыргæнджытæ.

Галуаны фойейы бирæ адæм æрбамбырд ис. Тæрхджытыл æмæ мольберттыл диссаджы нывтæ равæрдтой. Сæ фылдæр уыдысты бисерæй æмæ зæлдаг хуызджын æндæхтæй хуыд. Равдысты экспозицийы фенæн уыдис æндæр æмæ æндæр темæтыл нывтæ: æрыгон чызджыты портреттæ, натюрморттæ, дидинджытæ, халсартæ, цæрæгойтæ, ирон хъæу, бæркадджын фæззæджы сюжет æмæ бирæ æндæртæ. Хицæн къуымы та равæрдтой «Умелые руки и мягкая игрушка»-йы къорд кæй бацæттæ кодта, уыцы алыгъуызон хъазæнтæ æмæ хиæрымысгæ цымыдисон куыстытæ. Æрмдæсныты æхсæн равдысты æвæрд уыдысты хъæдæрмæгимæ архайæг, сывæллæтты конд куыстытæ дæр. Æппæт ацы куыс-тытыл зæрдиагæй чи бакуыста, уыдон сты: Болататы З., Голоты К., Джиголаты А., Долишвили З., Къораты Э., Павлиашвили Л., Елхъанты Е. Илуридзе А., Джабаури Н., Джабаури А., Гаглойты А æмæ æндæртæ. Фойейы къуымтæ афтæ бæркадджын уыдысты сфæлдыстадон æрмæгæй æмæ сыл адæймаджы цæст не ‘ххæссыд.

Скъоладзау фæсивæд уæлдай тынгдæр цымыдис кодтой се ’мгæртты куыстытæм.

Равдыст арфæйаг ныхæстæй байгом кодта Республикон сывæллæтты сфæлдыстадон галуаны директоры хæдивæг Æрсойты Заринæ, Ленингоры Сывæллæтты сфæлдыстадон галуаны директор Быценты Гуло та йæ раныхасы раарфæ кодта равдыстмæ чи æрбацыдис уыдонæн. Æмæ цыбыртæй радзырдта курдиатджын фæсивæд тынг зæрдæргъæвд кæй сты сфæлдыстадон куыстмæ æмæ загъта, сæ архайдæй тынг райгонд кæй у.

Æрæмбырдуæвджытæн Цхинвалы сывæллæтты сфæлдыстадон галуаны ахуыргæнинæгтæй равдыстой чысыл концерт æмæ йæ фæстæ та цытджын æгъдауæй хорзæхджын æрцыдысты фестиваль «Мир творчества»-йы æппæт хайадисджытæ дæр.

ЦХУЫРБАТЫ Ларисæ