Фæстаг рæстæджыты нæ республикæйы фæндæгтыл æгæр сарæх сты фæндагон-транспортон цаутæ, уæлдайдæр та горæт Цхинвалы. Машинæты ныппырх дæр зиан куыннæ у, фæлæ ма дзы алыгъуызон цæфтимæ рынчындонмæ дæр дзæвгарæй бахаудтой. Шофыртæй бирæтæ разындысты нозтджынтæ, кæцыдæртæм та дзы машинæ скъæрыны бары гæххæттытæ дæр нæ уыд. Уый фæстиуæгæн милицийы фæндагон змæлды æдасдзинады инспектортæ Цхинвалы уадзын райдыдтой рейдон мадзæлттæ. Æххуыс ма сын кæнынц милицийы патрулон-постон службæйы æмæ спецкъордты кусджытæ.

Афтæ зæгъæн нæй, æмæ фæндæгтæм фаг хъусдард нæй фæндагон инспекцийы æрдыгæй, – æппынæдзух горæты фæпатруль кæны иууылкъаддæр иу экипаж. Уымæй уæлдай ма алы изæр дæр цалдæр патрулон экипажы рахизынц горæтмæ æмæ суанг райсоммæ службæ фæхæссынц. Арæх æрцахсынц нозтджын шофырты, сбæлвырд кæнынц, машинæ скъæрыны бары гæххæттытæ кæмæ нæй, ахæмты дæр, фæлæ уæддæр фæндагон фæткойтæ фехалынц хицæн шофыртæ. Зæгъæм, цалдæр боны размæ горæтæй ахизæны æрцыд авари. «Лада Приорайы» æрыгон шофыр стыр тагъдадæй цыд æмæ сæмбæлд йæ ныхмæ цæуæг автомашинæйыл, стæй ма ноджы фæсвæд лæууæг дыууæ машинæйыл дæр. Йæ шофыр бахауд рынчындонмæ – ацъæл йæ къах æмæ ма райста ноджы алыгъуызон цæфтæ. Шофыр йæхи аххосджыныл нæ нымадтæ – мæн, дам, æндæр машинæ фæтыхсын кодта æмæ аххосджын уый у. Фæлæ камерæйы видеоныффыст куыд равдыста, афтæмæй шофыр стыр тагъдадæй куы нæ цыдаид, уæд дзы авари не ‘рцыдаид.

Ныры рейдты рæстæджы милицийы кусджытæ уæлдай хъусдард здахынц нозтджын шофыртæм, уромынц фæндагон фæткойтæ халджыты, сгарынц бары гæххæттытæ æмæ ма, номыртæ кæцы машинæтыл нæй, ахæмты. Уымæй уæлдай ма сæ зæрдæ искæмæ куы фехсайы, уæд ын йæхи дæр æмæ йæ машинæ дæр лæмбынæг басгарынц, ома дзы ма разына наркотиктæ, æхсæнгарз, кæнæ æндæр ахæм æнæзакъонон дзаумæттæ æмæ буарадтæ.

Рейдон мадзæлтты хайад исынц цалдæр экипажы, кæцытæ иу бынаты алæууынц цыдæр рæстæг æмæ та стæй æндæр ранмæ ацæуынц.  Лæугæ та æркæнынц горæты уынгты азилæнты, кæцытыл машинæтæ фæцæуынц арæхдæр. Иу боны мидæг баурæдтой дыууæ нозтджын шофыры, 41 адæймаджы та бæрндзинадмæ æркодтой фæндагон фæткойтæ фехалыны тыххæй. 8 шофырмæ нæ разынд машинæ скъæрынæн бары гæххæттытæ æмæ сыл сарæзтой административон суагъæтæ. Уымæй уæлдай ма урæд æрцыдысты цыппар автомашинæйы, кæцытыл нæ уыд номыртæ конд.

Кæд æмæ ахæм рейдон мадзæлттæ азы мидæг бирæ хæттыты ауадзынц, уæддæр арæх æрцæуы аваритæ æмæ фæндагон фæткойтæ фехалыны цаутæ. Уый та, фыццаджыдæр, баст у, машинæтæ кæй сбирæ сты, уыимæ æмæ шофырты æвæлтæрддзинадимæ. Æвæццæгæн, афтæ никуы уыдзæн, æмæ бынтондæр фæндагон фæткойтæ мачиуал хала. Фæлæ ацы рейдон мадзæлттæ дарддæр дæр цæудзысты, цалынмæ уынгты змæлды уагæвæрд бæрæг къаддæр халой шофыртæ, уæдмæ. Паддзахадон инспекци сиды бынæттон цæрджытæм, цæмæй нозтджын шофырты, кæнæ фæндагон фæткойтæ чи халы, ахæм шофырты фенгæйæ, фæдзурой мæнæ ахæм номыртæм 45-49-36.

Джиоты Александр

Comments are closed, but trackbacks and pingbacks are open.