Хуссар Ирыстоны фæзынд хуыты африкæйаг емынæ. Республикæйы цы хуытæ амардысты, уыдоны паталогион æрмæгæй лабораторон иртасæнты фæстиуæгæн Федералон паддзахадон бюджетон уагдон «Цæрæгойты æнæниздзинад хъахъхъæныны федералон центр» бафидар кодта хуыты африкæйаг емынæйы диагноз.
Низ фæзынд Църу, Чъимас, Чеселт, Хеит æмæ Джеры хъæуты хисæрмагонд хæдзарадты. Ныртæккæ Хъæууон хæдзарады министрад исы æппæт æнæмæнгхъæуæг мадзæлттæ, цæмæй ацы низ дарддæр ма парахат кæна. Уыцы нысанæн Уанат, Чъех, Гуфта, Хуыцъе æмæ Кърозы хъæуты районон ветеринарон службæтæ Хъæууон хæдзарады министрады æххуысæй æвæрынц дезинфекцион барьертæ, Дзауы районы та, хуытæ цы бынæтты сты, уыдоны кæнынц дезинфекци.
Ныртæккæ республикæйы æппæт индивидуалон хисæрмагонд хæдзарадты бар нал ис, цæмæй хуыты хизынмæ здахой, хъуамæ сæм зилой æхгæд бынаты. Хъæууон хæдзарады министрады ветеринарийы управлени хъæууон администрациты сæргълæуджытæ æмæ районон ветеринарон службæты кусджытæн фехъусын кодта, цæмæй æмбæлон æмбарынгæнæн куыст бакæной цæрджыты ‘хсæн.
Хуытæм зæрдæ куы фехсайа фæрынчынæй, уæд фермертæ æвæстиатæй хъуамæ фехъусын кæной районон æмæ республикон ветеринарон службæтæн. Уымæй дарддæр ма хъæууон администрацитæ хъуамæ банымайой, цæрæн бынæтты цы хуытæ ис, уыдоны. Цæмæй цæрджыты ‘хсæн паникæ ма уа, уый тыххæй хъуамæ æххуыс кæной фадыгон милиционертæ дæр. Цæвиттон, куы рабæрæг уа низæй хуыты амæлыны цау æмæ сын сæ мæрдты цæугæдонмæ куы æппарой, уæд хъæуы ссарын аххосджынты æмæ сæ административон бæрндзинадмæ æркæнын. Цæмæй дæттæ ма чъизи кæной, уый тыххæй ахæм цауты ныхмæ хъæуы цæхгæр мадзæлттæ райсын. Цы хуытæ амардысты, уыдоны хъæуы ба-судзын сæрмагонд уæрмы æмæ сыл сыджыт хъæуы æмбæлон фæткмæ гæсгæ бакалын.
Адæймагæн æмæ цæрæгойты æндæр хуызтæн ацы вирус тæссаг нæу.
Профилактикон нысæнттæн, цалынмæ сæрмагонд барамынд уа, уæдмæ бар нæй Цхинвалы, Дзауы æмæ Знауыры районтæй хуыйы дзидза Хуссар Ирыстоны базарадон объектты уæй кæнынæн, афтæ ма æхсæнадон хæлцадон бынæтты хуыйы дзидзайæ хæлцадон продукттæ реализаци кæнынæн. Банысан кæнын хъæуы уый, æмæ низ бахæцыны сæйраг нысан кæй у хуыты хизынмæ кæй скъæрынц, уый, кæд цæрджытæн фехъусынчындæуыд, цæмæй сæ æхгæд бынæтты дарой, уæддæр. Хуыты африкæйы емынæйы низæй профилактикæйы нысæнттæн дырысæй хъахъхъæнын хъæуы цæрæгойты фермæйы æхгæд уавæрты дарыны фæткойтæ, хъуамæ дзæгъæл ма рацу-бацу кæной æмæ æндæр цæрæн бынæтты цæрæгойтимæ ма æмбæлой, афтæ ма сæ иу ранæй иннæ ранмæ ласын хъæуы ветеринарон службæты разыйæ.
Зæрдыл лæууын кæнæм, хуыты африкæйаг емынæ Хуссар Ирыстоны территоримæ фыццаг хатт кæй æрбафтыд Гуырдзыстонæй 2007 азы. 2010-2011 азты хуыты африкæйаг емынæйы эпизоотийы рæстæджы Хуссар Ирыстоны фермертыл æрцыдис стыр зиæнттæ.
Хуыты африкæйаг емынæ у хуыты хæцгæ вирусон низ. Фыццаг хатт уый регистраци æрцыд 1903 азы Хуссар Африкæйы æмæ хауы иууыл тæссагдæр низтæм цæрæгойты хæцгæ низты дунеон классификацимæ гæсгæ. Ацы низы вирусæн схосгæнæн нæй, йæ парахат кæнын æруромæн ис æрмæстдæр карз карантинон мадзæлтты – арæнтыл карантинон посттæ сæвæрыны руаджы.
РХИ-йы Хъæууон
хæдзарады министрады пресс-службæ
Comments are closed, but trackbacks and pingbacks are open.