Хатырон уавæрты кредиттæ радтыны фæдыл къамис райдыдта исын, амалиуæгад кæнынæн бизнес-плантæ чи сарæзта, уыдоны документтæ. Экономикон райрæзты министрады къамис конкурсы хуызы æвзæрдзанис хуыздæр бизнес-проекттæ. Ацы закъон нæ республикæйы архайы 2018 азæй. Фæлæ 2019 азы хатырон уавæртыл кредиткæнынады фæдыл закъоны æрцыд ивындзинæдтæ, кæцымæ гæсгæ бæрæг фæхуымæтæгдæр кодтой кредиткæнынад.
Ацы уавæрæй спайда кæнын сфæнд кодта нæ горæты цæрæг Хуыгаты Инал дæр. Уый нын радзырдта йæ бизнес-планы тыххæй. «Нæ республикæйы фæндæгты арæзтад æмæ експлуатацийы комитетæн ис цалдæр дурцъæл-гæнæны. Фæлæ уыдон æрмæстдæр кусынц кæцы комитеты дæлбар сты, уыдон закъазмæ гæсгæ. Зæгъынц, зæгъгæ, дам, нæ фадæттæ æмæ уавæртæ æндæр нæ амонынц. Арæзтадон куыс-тытæ кæнынæн змис æмæ хуыр кæдфæндыдæр бахъæуы. Уымæ гæсгæ æз сфæнд кодтон дур-цъæлгæнæн агрегат самал кæнын æмæ куыстуат-мæ бавналдзæн аразынмæ кæд æмæ йæ сæвæрын, кæд æмæ мын хицауад кредитæй баххуыс кæна, уæд. Бынатæн ын равзæрстон мæхи зæххы фадыг. Мæ бизнес-план кæд фæцæуа къамисы зæрдæмæ, уæд балхæндзæн агрегат монтажгæнæн æндадзæн куыстыты тыххæй æркæндзæн специалисттæ. Нæхимæ нæй, фæлæ Цæгат Ирыстон-Аланийы ис, ацы куыстимæ зонгæ чи у, ахæм дæсны адæймæгтæ. Уыцы лæппутæ дæр нæхицæй ацæугæтæ сты – Чилæхсаты Олег æмæ Куыдзеты Артур. Ахæм куыстытæ уыдон бакодтой Алагир æмæ Мæздæджы. Ацы куыстытæ кæныныл кæд бахъæуынц, дыууæ мæйы бæрц, уæддæр сын стæй уый фæстæ сæ куыстмæ фау ничи æрхæссы», – зæгъы Хуыгаты Инал.
Уый ма нын радзырдта, агрегат йæ куыст куыд æххæст кæндзæнис, уыдæтты тыххæй дæр. «Æппæты бæрзонддæр бынаты æвæрд æрцæудзæн бункер. Уырдæм машинæтæ калдзысты дуртæ. Æдæппæт бункеры цæудзæнис 10 кубометры ставд дур. Цъæл дур уырдыгæй сæрмагонд хаххыл сæ фæндаг акæндзысты егъау транспортмæ, кæцы схойы дуртæ цъæлгæнæнмæ. Уырдыгæй цæудзæнис сасиртыл. Уыдонæй сæ иу ставд у, иннæ – лыстæгдæр. Афтæмæй агрегат уадзы дыууæ хуызы продукци – сæ иу ставд иннæ та лыстæгдæр хуыр. Агрегат скусын кæнынæн хъæуы цыппар траспортеры. Сæ дæргъ иууыл у 16 метры. Иудзырдæй, агрегат сæмбæрд кæнын æнцон нæу, йæ алфæмблай территори дæр хъуамæ уа хæрзарæзт. Ног куыстуат кæд сырæза, уæд арæзтадон-цалцæггæнæн куыстытæ кæныны рæстæджы хи-цæн æмбæстæгтæ дæр хъæуæг æрмæг ссарыныл нал тыхсдзысты.
Хуыгаты Инал зæгъы, зæгъгæ, ахæм серьезон куыстуат бакæнынæн къамис цы суммæ дæтты, уый фаг нæу. Уымæ гæсгæ уый хъавы йæ дыууæхатæнон фатер бангмæ радтын залогы хуызы æмæ цы суммæ райса, уыдонæй спайда кæнын.
Бирæтæ дызæрдыг кæнынц йæ æнтыстыл, зæгъгæ, тас у куыстуат куынæ скуса æмæ дæ фатер дæр куы фесафай. «Уый дæр бæргæ æмбарын, фæлæ иуран бадын мæ бон нæу, бинонтæ дарын хъæуы. Хъæууон уавæрты халсæрттæ æмæ дыргътæ бæргæ æркæнæм мæ бинойнагимæ, фæлæ уыдон æрмæст нæхи фаг вæййынц. Аразджытæ уыдысты мæ фыдæлтæ, мæнæн дæр уый мæ туджы ис уыцы хъуыддаг æмæ мын æнцойад нæ дæтты».
УАЗÆГТЫ Марфа
Comments are closed, but trackbacks and pingbacks are open.