Мæскуыйы уагъд æрцæудзæн, ХИПУ-имæ æмгуыстады фæлгæтты Стратегион иртасынæдты уæрæсейаг институт цы зонадон конкурс ауагъта, уым Хуссар Ирыстонæй цы æвзонг ахуыргæндтæ фæуæлахиз сты, уыдоны схорзæхджын кæныны церемони.

Фехъусынчындæуыд æвзонг ахуыргæндты конкурсы уæлахиздзауты нæмттæ, кæцы уагъта Стратегион иртасынæдты уæрæсейаг институт Тыбылты Алыксандры номыл Хуссар Ирыстоны паддзахадон университетимæ æмгуыстады фæлгæтты ахæм темæйыл: «Паддзахаддзинады рæзты перспективæтæ æмæ Уæрæсеимæ интеграцион процесстæ».

Конкурсы фæстиуджытæм гæсгæ къамис сбæрæг кодта уæлахиздзауты.

Фыццаг бынат лæвæрд æрцыд ХИПУ-йы кусæг Тадтаты Таймуразæн, æмавтор ын уыд Хæххон аграрон паддзахадон университеты кусæг Дзидзойты Валери, ахæм куысты тыххæй: «XXI-æм æнусы Республикæ Хуссар Ирыстоны геополитикон ориентиртæ». Дыккаг бынат лæвæрд æрцыд ХИПУ-йы кусæг Тедеты Оксанæйæн ахæм куысты тыххæй: «Фæсконфликтон уавæрты Гуырдзыстон æмæ гуырдзиæгтæм ахасты хуссарирыстойнаг фæсивæды социалон ретроспективæ». Æртыккаг бынат адих кодтой æвзонг ахуыргæндтæ, ХИПУ-йы кусæг Плиты Сослан ахæм куысты тыххæй: «Республикæ Хуссар Ирыстон дарддæры политикон перспективæты контексты» æмæ Хуссар Ирыстоны зонад-иртасæн институты кусæг Дзабиты Вячеслав ахæм куысты тыххæй: «Кавказы Республикæ Хуссар Ирыстоны нысаниуæг».

Хуыздæр куыстытæ мыхуыр æрцæудзысты журнал «Проблемы национальной стратегии»-йы. Конкурсы уæлахиздзаутæн лæвæрд æрцæудзысты сертификаттæ æмæ æхцайы призтæ.

ХИПУ-йы ректор Тедеты Вадимæн, телефоны ныхас кæнгæйæ, Стратегион иртасынæдты уæрæсейаг институты директоры хæдивæг Тамара Гузенкова куыд фехъусын кодта, уымæ гæсгæ хорзæхтæ дæттыны церемони уагъд æрцæудзæн Мæскуыйы, цыран уæлахиздзаутæн хорзæхтæ ратдзæн сæрмагондæй ацы институты директор, æддагон развæдсгæрсты инæлар-лейтенант Леонид Решетников.

ХИПУ-йы ректор Тедеты Вадим раарфæ кодта Леонид Решетниковæн æмæ Стратегион иртасынæдты уæрæсейаг институты æппæт коллективæн алыгъуызон здæхтыты ХИПУ-имæ æнтыстджын æмгуыстады тыххæй.

«29-æм октябры иу аз æххæст кæны, Стратегион иртасынæдты уæрæсейаг институт æмæ ХИПУ-йы ‘хсæн æмгуыстады тыххæй Бадзырдыл къухтæ куы æрфыстæуыд, уыцы боныл. Уыцы рæстæгмæ Хуссар Ирыстоны паддзахадон университет æмæ Стратегион иртасынæдты уæрæсейаг институт иумæ Цхинвалы политологийы фæдыл ауагътой дыууæ æхсæнадæмон конференцийы Уæрæсейы æмæ Хуссар Ирыстоны, афтæ ма Серби, Итали æмæ Болгарийы ахуыргæндты хайадистæй.

ХИПУ-йы ахуыргæндтæ хайад райстой Стратегион иртасынæдты уæрæсейаг институты цыппар зонадон конференцийы. ХИПУ-йы цыппар студенты каст фесты ацы институты æвзонг политологы скъола. ХИПУ-йы кусджытæн институты уыд стажировкæ. ХИПУ-йы ахуыргæндтæн уагъд æрцыд зонадон куыстыты гом конкурс дæр. Æмæ æппæт уыдон уагъд æрцыдысты ацы институт æмæ ХИПУ-йы ‘хсæн æмгуыстады цыбыр рæстæгмæ. Леонид Решетников институты кусджытæ Тамара Гузенкова, Артур Атаев, Аджар Куртов æмæ æндæртимæ нæ университетæн аразы æппæт дæр, цæмæй нæ паддзахаддзинады рæзтæн ахæм ахсджиаг здæхт, куыд политологи рæза стыр темптæй», – фехъусын кодта ХИПУ-йы ректор Тедеты Вадим.

ХИПУ-йы ректор ма бадзырдта ацы институты къухдариуæгадимæ ХИПУ-йы иумиаг зонадон-практикон конференциты æмбырдгæндты презентаци ауадзыны тыххæй, æмгуыстады Бадзырдыл къухтæ куы æрфыстæуыд, уыцы боныл иу аз кæй æххæст кæны, уый цытæн.

 

109/7, 09, 2016

Comments are closed, but trackbacks and pingbacks are open.