Сылгоймæгты дунеон боны хæдразмæ информацион агентад «Спутник-Хуссар Ирыстон»-ы пресс-центры уагъд æрцыд брифинг. Йæ уазæг уыд нæ республикæйы æмбæстаг, оперон зарæггæнæг Хæбæлаты Лали, кæцы ныртæккæ йæ музыкалон дæсныйады рæзтыл кусы горæт Мæскуыйы. Брифинг уагъта нæ республикæйы Информаци æмæ мыхуыры паддзахадон комитеты сæрдар Хъотайты Мария.
Райдианы оперон зарæггæнæг цыбыртæй æрдзырдта, музыкалон аивады йын цы бантыст, уыдоны æмæ йæ сомбоны плæнттыл. Йæ фыццаг къахдзæфтæ музыкалон аивады æвзонг оперон зарæггæнæг акодта нæ республикæйы музыкалон ахуыргæнæндоны. Уый фæстæ йæ ахуыр адарддæр кодта Гнесинты номыл Мæскуыйы музыкалон ахуыргæнæндоны.
«Æз мæхи нымайын амондджын адæймагыл, уымæн æмæ мæ царды иууыл ахсджиагдæр рæстæджы мæнæн мæ фарсмæ уыдысты æмæ мын æххуыс кодтой тынг хорз адæймæгтæ, кæцытæ-иу фæстагмæ систы мæ ахуыргæнджытæ. Мæ царды иу рæстæджы æрцыдис, ферохгæнæн кæмæн нæй, ахæм цау. Фæдзырдта мæм нæ республикæйы музыкалон ахуыргæнæндоны директор Гæджиты Жаннæ æмæ мын загъта, цæмæй Мæскуыйы музыкалон ахуыргæнæндоны адарддæр кæнон мæ ахуыр. Æмæ йæ уæд бамбæрстон, иу ран лæууын кæй нæ хъæуы, фæлæ кæй хъæуы размæ цæуын. Кæй зæгъын æй хъæуы, тынг райгонд дæн Гæджиты Жаннæйæ æмæ йын дзурын бузныг», – загъта Хæбæлаты чызг.
Уæрæсейы музыкалон ахуыргæнæндоны Хæбæлаты Лалийæн уыд хорз æнтыстытæ, феххуыс ын сты, кæй зæгъын æй хъæуы, уый размæ нæ горæты музыкалон ахуыргæнæндоны райсгæ зонындзинæдтæ дæр.
Брифинджы рæстæджы æвзонг зарæггæнæг фехъусын кодта йæ дарддæры плæнтты тыххæй. «Мæнæн ацы аз мæ зæрды ис Италимæ ацæуын. Уым мæ фæнды иу цъус рæстæг ацæрын æмæ бакусын. Афтæ ма фæнд кæнын театры кусын дæр. Æмæ кæд хъысмæтæн фæндон уа, уæд мæ сомбоны плæнттæ царды биноныг кæндзынæн», – загъта Хæбæлаты Лали.
Брифинджы рæстæджы Хъотайты Мария бацымыдис кодта, зæгъгæ, де сфæлдыстадимæ кæд хъавыс не ‘мбæстæгты базонгæ кæнынмæ. Æвзонг оперон зарæггæнæг загъта, тынг серьезон ахаст ын кæй ис хуссарирыстойнаг публикæмæ. «Уымæн æмæ концертмæ æрбацæуынц æмгæрттæ, хиуæттæ æмæ афтæ дарддæр. Æмæ уыдоны раз зарæггæнæгæн зындæр вæййы, фæлæ уæддæр, хуссарирыстойнаг сценæйыл зарынæй алы хатт дæр райсын стыр æхцондзинад», – банысан кодта Лали.
Сылгоймæгты æппæтдунеон бонмæ Хæбæлаты Лали йе сфæлдыстадæй барухс кæндзæн нæ республикæйы сылгоймæгты зæрдæтæ.
ТАНДЕЛАТЫ Виленæ
Comments are closed, but trackbacks and pingbacks are open.