Стыр Фыдыбæстæйон хæсты тыххæй сæ мысинæгтæ журналисттæн видео-хиды рæстæджы радзырдтой постсоветон тыгъдады иу-цалдæр регионы ветерантæ. Видео-хид уагъдæуыд информацион агентад Спутник-Хуссар Ирыстоны студийы.
Видеотрансляцийы хайадисджытæ систы горæттæ Сухумы, Кишинев, Ереван, Ташкент æмæ Душанбейы минæвæрттæ. Хуссар Ирыстоны æрдыгæй дзы хайад райста Президенты паддзахадон уынаффæгæнæг, æхсæнадæмон акци «Æнæмæлгæ полк»-ы организатор Зассеты Жаннæ æмæ Стыр Фыдыбæстæйон хæсты ветеран Тедеты Никъала.
Видео-хиды хайадисджытæй алчи дæр радзырдта алы нациты хайбавæрды тыххæй Стыр Уæлахизмæ. Дзырдтой ма, раздæры цæдисы бæстæты ацы бæрæгбон куыд нысан цæуы, уый тыххæй. Æхсæнадæмон чи сси, уыцы «Æнæмæлгæ полк»-ы змæлд æрвылаз дæр аххæссы ног æмæ ног регионтыл. Хуссар Ирыстоны ацы акцийы тыххæй видео-хиды хайадисджытæн радзырдта Зассеты Жаннæ. Уый у «Æнæмæлгæ полк»-ы штабы сæргълæууæг.
«Республикæйы «Æнæмæлгæ полк»-ы колоннæйы ацы аз рæцæудзысты фондз мин адæймагæй фылдæр. Уыдон æхсæн сты, 1652 фæлгæты æвæрд ныв æмæ хæстоны нæмттимæ æнæ нывтæй чи рацæудзæн, уыдон. Уыдон сты, фронтæй чи нæ рыздæхт, дунейы кæй агуырдтам æмæ кæй ссардтам, Венгрийæ райдай æмæ нæ сыхаг республикæйæ фæу, уыцы æнæзонгæ сæфтытæ», – загъта уый.
Йæхи рады, ветеран Тедеты Никъала радзырдта ирæтты хъæбатырдзинады тыххæй. Уыдон ницæмæй тарстысты æмæ размæ æппæрстой сæхи.
«Мæн акодтой хæстмæ æмæ фæхæ-цыдтæн хæсты фæудмæ. Истон активон хайад бирæнымæц хæстыты. Æмæ æз уым цы федтон, уый никæмæн бауарздзæн мæ цæст. Фæлæ уæддæр, ирон адæм цы хай бахастой, уый уыди æгæрон. Æнæхъуаджы нæ ахсынц нæ адæм фыццаг бынат хъайтарты нымæцæй», – банысан кодта уый.
Видео-хиды хайадисджытæ банысан кодтой, ахæм патриотикон мадзæлтæ ахсджиаг кæй сты фæсивæд æмæ рæзгæ фæлтæрæн, абон историмæ ныхылд кæй цæуы йе сзыгъуыммæ кæныны сæраппонд, уый тыххæй. Уымæ гæсгæ гуырахстджын акцитæ, «Æнæмæлгæ полк» æмæ бирæ æндæр ахæмтæ, хъуамæ ахъаз суой советон адæмы сгуыхтдзинад зæрдыл бадарынæн.
Comments are closed, but trackbacks and pingbacks are open.