Нæ республикæ æндидзынадæй экономикæйы реалон секторы рæзты фарстытæ цадæггай скъуыддзаг кæнынмæ кæй хизы, уымæн æвдисæн сты, ацы бонты цы æртæ зынгæ цауы æрцыдысты, уыдон дæр. Нæ горæты байгом минералон донуадзæн завод «Ирыстоны суадон», къухтæ æрфыстæуыд Мæскуыйаг компани «Инновацион технологитæ»-имæ Инвестицион сразыдзинадыл, кæцымæ гæсгæ нæм арæзт æрцæудзæн згъæркуыстгæнæн завод. Банысан кæнын хъæуы уый, æмæ йæ инвестицитæ кæй хæццæ кæнынц 1 миллиард соммæ. Æмæ æртыккаг — нæ республикæйы цæрджытæ æнхъæлмæ кастысты, Цхинвалы цæгатварс арæзт чи цыдис, уыцы дзидзакуыстгæнæн завод «Растдон» эксплуатацимæ лæвæрд кæд æрцæудзæнис, уымæ. Æмæ ацы бонты уый дæр байгом.

Йæ гом кæныны цытджын церемонимæ æрбацыдысты РХИ-йы Президент Тыбылты Леонид, РХИ-йы Хицауады Сæрдар Хъуылымбегты Доменти, РХИ-йы УФ-йы Уæлвæткон æмæ æххæстбарджын минæвар Къарджиаты Эльбрус, агросæудæджерадон холдинг «Евродон»-ы генаралон директор Уанеты Вадим, Республикæйы Хицауады, Парламенты æмæ æхсæнады минæвæрттæ.

Тыбылты Леонид банысан кодта ацы ног куыстуаты байгом кæныны ахсджиагдзинад, æппæт нæ адæмæн, зæгъгæ, уый у æхсызгон цау, уымæн æмæ дзу-рæг у, нæ республикæ фæдфæдылонæй кæй рæзы.

«Абон мæнæн, æмæ мæ   хъуыдымæ гæсгæ, æппæт нæ адæмæн дæр у цины бон, уымæн æмæ Республикæ рæзы иу цауæй иннæ цаумæ нæ, фæлæ фæдфæдылонæй, — загъта Президент.  Фæстаг рæстæджы Хуссар Ирыстоны территорийыл фæзынынц ног æмæ ног кондадтæ. Знон мах байгом кодтам ми-нералон донуадзæн ног куыстуат, абон райсомæй та къухтæ æрфыстæуыд сразыдзинадыл, кæцымæ гæсгæ арæзт æрцæудзæн згъæркуыстгæнæн завод. Æмæ ныр та, акæсут-ма, дзидза куыст кæныны фæдыл не ‘мзæххон Уанеты Вадимы руаджы цахæм куыстуат гом кæнæм».

Президенты ныхæстæм гæсгæ мах хъуамæ инвестортæн аразæм ног гæнæнтæ æмæ хæрзвадат уавæртæ, цæмæй сæ инвестицитæ уой адæмы хæрзиуæгæн. Æхсызгонæй банысан кодта, зæгъгæ, ацы куыстуат бакæнгæйæ, нæ республикæйы цæрджытæй 50 адæймаджы ифтонг æрцæудзысты куыстæй.

«Не ‘мбæстæгтæй 50 адæймаджы кусдзысты ам, исдзысты куыстмызд æмæ сæ бинонты дардзысты. Уый у уыцы фæндаг, кæцыйыл мах хъуамæ размæ цæуæм», — загъта паддзахады сæргълæууæг.

Уый ма афтæ банысан кодта Хуссар Ирыстон æмæ Уæрæсейы ‘хсæн ахастыты бæрзонд æмвæзад, зæгъгæ, мах хъуамæ сæрыстыр уæм, фæстаг фондз азы Хуссар Ирыстон æмæ Уæрæсейы разамынадты ‘хсæн цы ахастытæ сфидар сты, уыдонæй.

Ног дзидзакуыстгæнæн заводы нысаниуæджы тыххæй дзырдта Къарджиаты Эльбрус дæр.

«Мах стыр ныфсимæ нæ хъус дардтам, ацы объекты арæзтад куыд цыдис, уымæ, — загъта уый.  Æмæ ныр уыцы хъуыддаг æрцы-дис — уæрæсейаг егъау компанитæй сæ иу сарæзта ацы хорз куыстуаты».

Къарджиаты Эльбрусы ныхæстæм гæсгæ æнтысгæйæ реализаци цæуы Хуссар Ирыстоны социалон-экономикон рæзтæн ахъазгæнæг Инвестицион программæ, кæцы куыд æххæст цæуы, уымæ лæмбынæг сæ хъус дарынц дыууæ бæстæйы лидертæ Владимир Путин æмæ Тыбылты Леонид.

Уанеты Вадим, йæ рады, бузныг загъта Президент æмæ йæ командæйæн, арæнгонд бæрндзинады æхсæнад «Растдон»-ы дзидзакуыстгæнæн завод саразыны фæдыл проект реализаци кæныны хайад кæй истой, уый тыххæй.

«Стыр бузныг дæуæн æмæ дæ командæйæн, ацы проект мах иумæ кæй цæттæ кодтам, уый тыххæй, — Президентмæ сидгæйæ, загъта уый.  Æз азылдтæн цехты æмæ уый у иттæг хорз нырыккон кондад, кæцыйы архайынц иууыл тыхджындæр специалисттæ. Мæ хъуыдымæ гæсгæ, нæ цæрджытæ æлхæндзысты аккаг продукт, æз уый тыххæй гаранти дæттын».

Мадзалы хайадисджытæ азылдысты заводы цехты æмæ базонгæ сты куыстуаты фыццаг продукцийы æндæр æмæ æндæр хуызтимæ.

Comments are closed, but trackbacks and pingbacks are open.