Информаци æмæ мыхуыры паддзахадон  комитеты пресс-центры Республикæ Хуссар Ирыстоны Фæсарæйнаг хъуыддæгты министр Медойты Димитрæн уыд пресс-конференци. Уый дзыллон информацион фæрæзтæн радзырдта Итали æмæ Испанимæ йæ балцы тыххæй.

Уый куыд радзырдта, афтæмæй министры Италимæ фæхуыдта Италийы базарадонсæудæджерадон палатæйы президент Альберто Протти. Йæ балц райдыдта зындгонд композитор Россинийы райгуырæн горæт Пезаройæ. Ацы горæт нымад у Италийы чысыл культурон центрыл. Уым  байгом ирон нывгæнджыты равдыстæй. Ацы равдысты уыдысты Хуссар Ирыстон æмæ Цæгат Ирыстоны нывгæнджыты нывтæ, афтæ ма Пезаройы цæрæг ирон нывгæнæг Томайты Фатимæйы конд куыстытæ. Равдыст бацæттæ кæнынæн Томайты Фатимæ æххуыс кодта тынг активонæй. Равдысты тыххæй бирæ информаци лæвæрд уыд Италийы дзыллон информацион фæрæзты. Культурон программæйæ дарддæр уыцы горæты министрæн уыд хъуыддагон фембæлдтытæ дæр. Фембæлд ын уыд Альберто Проттиимæ æмæ  йын бузныг загъта, Италимæ йæ кæй фæхуыдта æмæ йын Кавказы республикæтæм хорз ахаст кæй ис, уый  тыххæй.

Министр уыд цалдæр куыстуаты, цыран кæнынц цыхтахсæн куыст, аразынц дзидзайы продукци, фæуазæг бынæттон фермеры хæдзарадмæ. Уый кæны фосдарды, сæндоны куыст. Уыцы фермер цы провинцийы цæры, уым, министры ныхæстæм гæсгæ, ис нæ республикæйы æнгæс æрдз.

Министры балцæн уыд куыд культурон-гуманитарон мидис, афтæ ма бæрæг æрцыдысты дыууæфарон ахастытæ экономикæйы, бизнесы, æндæр æмæ æндæр кондадты фадгуыты.

Ромы та министрæн фембæлд уыд Хуссар Ирыстоны хæлар, Европарламенты мидæг Хуссар Ирыстоны Парламенты æххæстбарджын минæвар Джульетто Кьезаимæ.

Римы Хуссар Ирыстоны фæсарæйнаг хъуыддæгты министрæн уыд пресс-конференци. Пресс-конферпенцийы уый италиаг дзыллон информацийы фæрæзтæн радзырдта уыцы бæстæйы йæ балцы нысан кæй у экономикæ æмæ бизнесы фадыджы ног партнертæ агурын. Римы Хуссар Ирыстоны æддагполитикон ведомствойæн цы офис ис, уым та фембæлдис Италийы уæвæг ирон диаспорæйы минæвæрттимæ. Диаспорæимæ фембæлды рæстæджы уынаффæ цыд культурон, гуманитарон æмæ æндæр фадгуытæм хауæг къорд фарстатыл.

Веронайы хайад райста Евразиаг конференцийы. Ацы конференцийы куысты хайад райстой бизнес-æхсæнадтæ алы бæстæтæй, уыцы нымæцы Уæрæсейæ, Казахстанæй, Белорусийæ. Конференцийы рæстæджы фембæлдысты Веронæйы бизнес-æхсæнады минæвæрттимæ. Бадзырдтæ сын уыд  Хуссар Ирыстоны территорийыл италиаг бизнеспроектты фарсты фæдыл. Уыдон цымыдисон уаиккой куыд Хуссар Ирыстоны фарсæн, афтæ италиаг фарсæн дæр.

Министр куыд банысан кодта, афтæмæй йæ æрыздæхты хæдфæстæ италиаг хæлæрттæй райста бизнесплантæ æмæ фæндæттæ. Уыдон æмбæлон министрадтимæ бадзырдты фæстæ, уаиккой ахадгæ куыд Хуссар Ирыстонæн, афтæ Италиаг бизнесментæн дæр.

Флоренцийы фембæлд зындгон ахуыргонд, профессор Франко Кардиниимæ. Уый Хуссар Ирыстоны уыд 2010 азы, æрцыд республикæйы сырæзты 20-азон бæрæгбонмæ. Фæстæмæ аздæхгæйæ уый ныффыста зæрдæмæхъаргæ эссе Хуссар Ирыстоны тыххæй æмæ йæ ныммыхуыр кодта Ватиканы журналы. Ацы ахуыргонды зонынц дунейы бирæ бæстæты, уыцы нымæцы нæ республикæйы дæр йæ фундаменталон куыст – чиныг «Истоки фундаментального рыцарства»-йæ. Ацы чиныг мыхуыры рацыд ивгъуыд æнусы 80-æм азты. Автор йæ фундаменталон куысты равдыста, европæйаг рыцарты æгъдау æмæ европæйыг культурæ Европæмæ алантæй кæй æрбацыдысты. Уый тыххæй аланты темæ Италийы дæр æмæ æмткæй Европæйы дæр тынг парахат у. Медойты Димитр куыд загъта, афтæмæй ноджыдæр фæхуыдта Франко Кардинийы Хуссар Ирыстонмæ.

Министр ма радзырдта кæй уыд, сæрмæтты ном чи хæссы, уыцы италиаг провинцийы ном. Ацы цау æнæхъусдард нæ баззад дзыллон информацион фæрæзты æрдыгæй æмæ бынæттон газеттæй сæ иуы мыхуыр æрцыд уац ахæм сæримæ: «Сарматиямæ Сæрмæтты министры æрцыд».

Венецийы центр Венетойы уæвгæйæ, министр хъусдарæг уыд Венетойы уагъдæрцæуæг референдумы. Уыцы провинцийы референдум уагъд æрцыд æддагэкономикон бастдзинæдтæ рауæрæх кæнын, уыцы нымæцы æддагон базарад æмæ центримæ бастдзинады тыххæй.

Италийæ дарддæр министр уыд Испанийы дæр. Уыд Каталонийы, бынаты базонгæ, ауагъдæрцæуæг референдумы фæстиуæгæн  уым цы цаутæ цæуы, уыдонимæ. Министр фембæлд, бирæ рæстæджы дæргъы уым чи цæры, уыцы ирæттимæ. Уыдон нæ рох кæнынц сæ Райгуырæн бæстæ, лæмбынæг сæ хъус дарынц Ирыстоны цаутæм.

Барселонайы Хуссар Ирыстоны Фæсарæйнаг хъуыддæгты министрады минæварад кæй байгом, уымæн,  министры ныхæстæм гæсгæ, ис культурон-зонадон æмæ гуманитарон бастдзинæдтæ рауæрæх кæныны нысан.

Йæ ныхасы кæрон республикæйы æддагполитикон ведоствойы сæргъ-лæууæг бахахх кодта, зæгъгæ, йæ ацы архайд Республикæ Хуссар Ирыстоны Фæсарæйнаг хъуыддæгты министрад æххæст кæны республикæйы къухдариуæгады бахæсмæ гæсгæ æмæ фæсарæнты цы куыст кæны, уый нымайы æвæлгæт, фæлæ ахадгæйыл.

Фæсарæйнаг хъуыддæгты министр дзуаппытæ радта журналистты фарста-тæн дæр, уыцы фарстатæй сæ иу баст уыд Хуссар Ирыстоны æрдыгæй  Ката-лонийы хæдбардзинады банымадимæ.

Медойты Димитр куыд банысан кодта, афтæмæй Каталонийы паддзахадон хæдбардзинады банымадмæ Хуссар Ирыстон æркæсдзæн, сæ регионы къухдариуæгад æм куы бахатой, æрмæстдæр уæд. Уый куыд загъта, афтæмæй референдум дунеон барадмæ гæсгæ кæй ауагъдæуыд, уый фæстиуæгæн дунеон барад у Каталонийы æвварс.

Каталонийы цы процесстæ цæуы, уыдон министр рахуыдта вазыгджын æмæ банысан кодта, цæмæй йын йæ хæдбардзинад дунеон æмæхсæнад банымайой, уый тыххæй йæ нырма даргъ фæндæгтыл рацæуын кæй хъæуы.

Гуырдзиæгтæ ирæтты Тырсыгоммæ кæй нæ уадзынц, уый тыххæй министр банысан кодта, зæгъгæ, Хуссар Ирыстоны Фæсарæйнаг хъуыддæгты министрад уæлæхох нæу, ахæм гуманитарон иумиагадæймагадон принциптæ хæлд кæй цæуынц, ууыл.

«Адæмы сæ хæстæджыты уæлмæрдтæм, сæ кувæндæттæм нæ бауагъта йæхи демократийы цырагъ чи хоны, уыцы бæстæ. Ацы фарст раразмæгонд æрцыд Женевæйаг дискусситы дæр æмæ сенябры ЕÆÆО-йы æрвылазон саммиты дæр, кæцы уыд Варшавæйы», – загъта Медойты Димитр æмæ ма банысан кодта, «Тырсыгомы цытæ кодтой æмæ кæнынц гуырдзиæгтæ, уый фæснывыл 15 октябры Гуырдзыстон Хетæгкаты Къостайы райгуырæн бон кæй банысан кодтой, уый уыд цинизмы иууыл æвзæрдæр хуыз».

Министр дзуапп радта  ирæтты геноциды тыххæй фарстæн дæр. Уый куыд банысан кодта, афтæмæй ирон адæмæн гуырдзиæгтæ сарæзтой алыгъуызон геноцидтæ, куыд культурон, этногеноцид. Йæ ныхæстæм гæсгæ, афтæ хъуамæ саразæм, цæмæй фылдæр информаци уа ирæтты геноциды тыххæй, хъуамæ ист цæуой кинофильмтæ, фыст цæуой чингуытæ æмæ а.д.

Министр дзуаппытæ радта журналистты æндæр фарстатæн дæр.

Осиаты Индира

Comments are closed, but trackbacks and pingbacks are open.