Инциденттæ ма æруадзын æмæ сæм хъусдард здахыны фæдыл механизмты фæлгæтты радон фембæлдæн фæстиуджытæ аразгæйæ, хуссарирыстойнаг делегацийы сæргълæууæг Коцты Егор информацион фæрæзтæн куыд радзырдта, уымæ гæсгæ Гуырдзыстоны информацион фæрæзты минæвæрттæ парахат кæнынц мæнг информаци.
«Фембæлды рæстæджы сæрмагонд хъусдард здæхт æрцыд мæнг информаци парахат кæныны цаутæм, ома, Хуссар Ирыстоны давд цæуынц адæм, ис дзы гуманитарон катастрофæ, адæм æх-хормагæй мæлынц…», – дзырдта Егор.
Гуырдзыстоны информацион фæрæзтæ ма дзырдтой, паддзахадон арæнтæ цы гуырдзиаг æмбæс-тæгтæ халынц, уыдоны кæй нымайынц давд æмбæстæгтыл, ома сæ хуссарирыстойнаг æмбæстæгтæ адавынц. Уыдон нымæцы сæ аргъуаны службæгæнæг дæр. Хуссар Ирыстонæй делегацийы сæргълæууæг ноджыдæр банысан кодта, аргъуаны службæгæнæг йæхæдæг кæй ахызт арæны сæрты æмæ хуссарирыстойнаг территоримæ рахызт. Æмæ уый та у Республикæ Хуссар Ирыстоны паддзахадон арæнтæ фехалыны цау. Уый тыххæй уыд ахст æмæ бæрæг процедурæтæ рацæуыны фæстæ сæрибар æрцыд. Уыцы информаци нæ æмбæхсы йæхæдæг дæр аргъуаны службæгæнæг.
Ныртæккæ дæр Хуссар Ирыстонæн Гуырдзыстонимæ йæ паддзахадон арæнтæ æхгæд кæй сты, уый тыххæй Коцты Егор афтæ радзырдта, зæгъгæ, Гуырдзыстоны эпидемиологон уавæр кæд фæхуыздæр уа, уæд уадзæн режимы пункттæ байгом уыдзысты. Уыцы фарстыл дзырд цæуы бæрзонд æмвæзадыл.
Механизмты фæлгæтты иу фембæлдæй иннæмæ хынцыд æрцæуы паддзахадон арæнтæ фехалыны цаутæ. Коцты Егоры ныхæстæм гæсгæ механизмты фæстаг фембæлдæй фæстæмæ Гуырдзыстоны æмбæстæгтæй 11 фехæлдтой арæнтыл хизыны фæтк. Гуырдзиаг информацион фæрæзтæ уыцы нымæц растыл нæ банымадтой, зæгъгæ, уыдон 21 æмбæстаджы сты.
«Æгæрыстæмæй, фембæлды рæстæджы гуырдзиаг фарс арæн-халджыты схуыдта 16 адæйма-джы. Æмæ 21 та сты – Гуырдзыстоны территорийыл вирусон грипп Н1N1-æй чи амард, уыдон ны-мæц», – карзæй загъта Коцты фырт.
Механизмты куысты рæстæджы, куыд уымæй размæ, афтæ та ныр дæр, гуырдзиаг фарс уынаффæмæ рахаста Арчил Тъатъунашвилийы амæлæты фарст. Хуссарирыстойнаг фарс уый фæдыл ногæй фехъусын кодта, зæгъгæ, Тъатъунашвилийы буар гуырдзиаг фарсмæ лæвæрд æрцыд æппæт æнæмæнгхъæуæг æрмæджытимæ. Уый нæ, фæлæ Хуссар Ирыстоны делегаци равдыста стыр æнæразыдзинад, ацы фарст ма нырæй фæстæмæ механизмты форматмæ хаст куы цæуа, уый тыххæй. Уымæн æмæ механизмты фæлгæтты куыстмæ уымæн ницы ахаст нæй.
Хуссарирыстойнаг фарс ма рæгъмæ рахаста, Цънелисы хъæумæ хæстæг æнæпилотон тæхæн аппараттæ кæй фæзыны, уыцы фарст. Уыцы тæхæн аппараттæ кæд æфсæддон нысаниуæджы не сты, уæддæр æрбатæхынц Гуырдзыстоны ‘рдыгæй.
Коцты Егоры ныхæстæм гæсгæ механизмты куысты рæстæджы гуырдзиаг фарс информаци сарæзта, зæгъгæ, марты мæйы Гуырдзыстоны территорийыл уагъд цæудзысты дунеон командон ахуыртæ НАТО-йы бæстæтæ-хайадисджытæ æмæ гуырдзиаг гарзджын тыхты хайадистæй.
Къæбулты Марина
Comments are closed, but trackbacks and pingbacks are open.