Инциденттæ ма æруадзын æмæ сæм хъусдард здахыны фæдыл механизмты фæлгæтты æрвылмæйон радон рабадт уагъд æрцыд знон Гуырдзыстон æмæ Хуссар Ирыстоны Паддзахадон арæныл гуырдзиаг хъæу Ергнетмæ хæстæг.
Традицимæ гæсгæ фембæлд уагъд цæуы æнæ информацион фæрæзты хайадистæй. Фембæлдæн хатдзæгтæ аразгæйæ Хуссар Ирыстонæй делегацийы сæргълæууæг, РХИ-йы Президенты Паддзахадон уынаффæнæг Санахъоты Дауыт афтæ радзырдта:
«Механизмты фæлгæтты дзырд цыд къорд фарстытыл. Фæстаг фембæлдæй абоны онг Паддзахадон арæнтыл æнæзакъонæй хизыны тыххæй урæд æрцыд æхсæз гуырдзиаг адæймаджы. Уыдонæй дыууæ ссæрибар сты, иннæ цыппар дæр æмбæлон процедурæты фæстæ сæрибар æрцæудзысты.
Сæйраджы ма дзырд цыд Паддзахадон арæнтæ делимитаци æмæ демаркацийы фарстытæ бæстон кæныныл. Уымæн æмæ ацы фарст бирæбæрцæй фæрог кæнид æмæ æрбæстон кæнид бирæ гуманитарон фарстатæ, кæцытыл æмбæлынц, куыд арæнтæм хæстæг гуырдзиаг цæрджытæ, афтæ ирон æмбæстæгтæ дæр.
Дарддæр нысан цыд, бирæ гуырдзиаг информацион агентадтæ раст информаци кæй нæ дæттынц. Ам дзырд цæуы, гуырдзиаг æмбæстæгтæ арæныл æнæзакъонæй хизыны фæстиуæгæн ахст куы æрцæуынц, уый рæгъмæ хæссынц куыд давыны цаутæ, афтæ. Уыцы хъуыддæгтыл мах разы не стæм, кæй зæгъын æй хъæуы.
Дзырд ма цыд, нæ республикæйы Знауыры районы Арæнгæрон хъæуы æввахс рæстæджы кæй æрæвналдзысты арæнтыл инженерон арæзтæдтæ аразынмæ, ууыл. Уымæн æмæ уырдыгæй сæфы арæнтæм хæстæг цæрджыты ставдкъах фос».
Механизмты фæлгæтты радон фембæлд уагъд цæудзæн 11 июлы.
Нæ уацх.
Comments are closed, but trackbacks and pingbacks are open.