12-æм октябрæй 19-æм октябрмæ Хуссар Ирыстоны территорийыл æрцыд иуæндæс фыдракæнды æмæ дзы дæс раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымӕй уӕлдай ма республикӕйы фӕндӕгтыл ӕрцыд æртæ фæндагон-транспортон цауы. Авариты фæстиуæгæн рынчындонмæ уӕлӕнгай цӕфтимӕ бахаудтой ӕртӕ адæймаджы.
Фæндагон змæлды æдасдзинады инспекци къуырийы дæргъы сбæлвырд кодта 230 фæткхалæн цауы. Уыдонæй 12 уыдысты нозтджынæй машинæ скъæрыны цаутæ.
Ӕхсæнадон фæтк фехалыны фæстиуæгæн административон æфхæрд баййæфтой дыууæ адæймаджы.
Мидхъуыддæгты министрады слестгæнæн управленийы баконд æрцыд 9 уголовон хъуыддаджы нæ республикæйы цалдæр æмбæстагыл фæлывд митæ бакæныны фæстиуæгæн. Фыдгæнджытæ фæлывд гæххæттытæ саразтой æмæ РХИ-йы æфснайæн бангæй райстой кредиттæ.
14-æм октябры Ленингоры районы мидхъуыддæгты управленимæ хъаст балæвæрдта Ленингоры районы Захъоры хъæуы 65-аздзыд цæрæг, зæгъгæ мын мæ хисæрмагонд хæдзарæй адавтой донхъармгæнæн прибор, электрон хырх æмæ брæй. Оперативон-агурæн мадзæлттæ райсыны фæстиуæгæн уыцы изæр милицийы кусджытæ баурæдтой горæт Цхинвалы 33 æмæ 31-аздзыд цæрджыты, кæцытæ басастысты сæ фыдракæндыл.
Горæт Цхинвалы мидхъуыддæгты управленимæ хъаст балæвæрдта горæттаг 58-аздзыд цæрæг, зæгъгæ мын Цхинвалы районы Куртайы хъæуы мæ хисæрмагонд хæдзарæй адавтой пластикæй арæзт рудзгуытæ. Фыдгæнджытæ разиан кодтой 100 мин сомы.
Милицийы Наркотикты ӕрзылд контроль кӕныны кусджытӕ баурӕдтой Знауыры районы Ожорайы хъæуы 26-аздзыд æмæ горæт Цхинвалы 23-аздзыд цӕрджыты. Дохтыртӕ куыд рабӕрӕг кодтой, афтӕмӕй ацы ӕмбӕстæгтæ спайда кодтой наркотикон буарад «марихуана»-йӕ. Фӕткхалджыты Цхинвалы тӕрхондон фӕивар кодта 8 мин æмæ 10 мин сомы. Уымæй уæлдай ма баурæдтой горæт Цхинвалы 30-аздзыд цæрæджы, кæцымæ сæ зæрдæ фехсайдта æнæзакъонæй наркотикон буарадæй спайда кæнынмæ. Фæткхалæг нæ бакуымдта медицинон басгæрстмæ æмæ йæ горæт Цхинвалы тæрхондон фæивар кодта 8 мин сомы.
17-æм октябры горæт Цхинвалы Хъайтарты уынгыл хуссаргæрон хъазгæйæ сывæллæттæ ссардтой гранатæхсæн мигæнæн. Сапертæ тæссаг предмет раластой полигонмæ æмæ йæ спырх кодтой.
18-ӕм октябры горӕты рынчындонмӕ бахаудтой ӕртӕ адӕймаджы, кӕцытӕ сыгъдхъӕстӕ фӕулӕфыдысты. Рынчынтӕй дыууæйæ разындысты æнæххæст кары сывæллæттæ. Уымæй уæлдай ма горæт Цхинвалы Дзабийы фырты уынгыл хæдзары сгуыпп кодта газ, кæцыйы фæстиуæгæн рынчындонмæ алыгъуызон цæфтимæ бахаудта 58-аздзыд бынæттон цæрæг.
Нæ горæты 7-аздзыд сывæллон Тæболты фырты уынгыл фæндагæй иу фарсæй иннæ фарсмæ хызт æнæмбæлон ран æмæ бахауд автомашинæйы бын, кæцыйы шофыр та разынд нæ горæты 72-аздзыд цæрæг. Сывæллон уæлæнгай цæфтимæ бахауд рынчындонмæ. Шофыр нæ бакуымдта медицинон басгæрстмæ æмæ нымад æрцыд нозтджыныл.
Знауыры районы Терегуаны хъæуы 33-аздзыд цæрæг нæ сарæхст йæ автомашинæ «Mitsubishi Pajero» скъæрын, фехæлдта фæндагон фæткойтæ æмæ Цхинвал-Знауыры фæндагыл цæугæйæ Фарны хъæуы ахауд фæндаджы фæсвæд æмæ афæлдæхт. Аварийы фæстиуæгæн шофыр уæззау цæфтимæ бахаудта рынчындонмæ.
Знауыры районы Убиаты хъæуы 52-аздзыд цæрæг нозтджынæй нæ сарæхст йæ автомашинæ «Nissan X-Trail» скъæрын æмæ Знауыры районы Аунеуы хъæуы ахауд фæндаджы фæсвæд æмæ афæлдæхт. Шофыр алыгъуызон цæфтимæ бахауд рынчындонмæ.
Comments are closed, but trackbacks and pingbacks are open.