16-æм майы РХИ-йы Хицауады рабадты хорзыл банымадтой «Куыстмызды минималон бæрцы тыххæй» закъонмæ ивындзинæдтæ бахæссын. Рабадт уагъд цыд паддзахады архайæг сæргълæууæг Бибылты Анатолийы сæдариуæгадæй.
РХИ-йы Æнæниздзинад хъахъхъæнын æмæ социалон рæзты министр Наниты Сосланы ныхæстæм гæсгæ «Куыстмызды минималон бæрцы тыххæй» республикæйы закъонмæ ивындзинæтæ бахæссыны тыххæй» закъоны проект бакуыст æрцыд сæйраг социалон-демографион къордтæм гæсгæ цæрджыты цæрыны минимум минималон куыстмызды бæр-цы онг скæныны нысанæн.
«Радон азæн куыстмызды минималон бæрц фидар цæуы афтæ, цæмæй уый къаддæр ма уа цæрыны минимумæй, кæцы иумиагæй республикæйы у 13 242 сомы, афтæ ма къаддæр ма хъуамæ уа ацы азы куыстмызды минималон бæрцæй», – загъта Наниты Сослан.
Министрты кабинет сфидар кодта «Пандеми КОВИД-19 уавæрты куысты тыххæй медицинон æмæ æндæр кусджытæн социалон æххуысы мадзæлтты тыххæй» Хицауады уынаффæйы проект, кæцы бацæттæ кодта Æнæниздзинад хъахъхъæныны министрад. «Проекты хынцыд цæуынц сæрмагонд социалон бафыстытæ пандемийы уавæрты коронавирусон инфекци парахат кæныны тæссагдзинады фæдыл æмбæстæгтæн æххуыс кæныны рæстæджы хайадисæг медицинон æмæ æндæр кусджытæ уæлдай ахсджиагдæр куыстытæ сæххæст кæныны фæдыл фактон æгъдауæй бакусгæ рæстæджы тыххæй», – загъта Наниты Сослан.
– Нæ куыст цыд фондз азы дæргъы æрмæст Хуссар Ирыстонæн нæ, фæлæ æппæт дунейы дæр иууыл уæззаудæр рæстæджы, – фехъусын кодта РХИ-йы Президент Бибылты Анатоли Хицауады рабадты. – Абон уадзæм нæ фæстаг рабадтытæй иу, цалынмæ хицауад отставкæйы нæ ацæуа, уæдмæ æмæ мæ фæнды бузныджы ныхæстæ зæгъын уæ бакæнгæ куысты тыххæй. Мах бахъуыд уæззау рæстæджы кусыны сæр, пандемийы рæстæджы фæндаг æхгæд куы уыд, уæд. Æмæ уый уыд раст уынаффæ, мæлæтæй аирвæзын кодтам сæдæгай адæймæгты. Мах æй тынг хорз æмбæрстам, адæм разы кæй нæ уыдзысты, фæлæ уый хыгъд бахъахъхъæд æрцыд сæдæгай адæймæгты цард, – загъта Бибылты Анатоли.
Уый банысан кодта, зæгъгæ, хицауады куыст здæхт уыд нæ адæмы социалон скондон хай фæхуыздæр кæнынмæ, Уæрæсейы æххуысы фæрцы куыстмыздтæ фæбæрæзонддæр кæнынмæ.
– Уæлдай тынгдæр мæ хъусдард аздахын фæнды республикæйы столицæмæ, тынг бирæ кæртытæ хæрзарæзт æрцыдысты, скуыстой лифттæ, хуыздæрырдæм фæивта горæты хуыз. Бузныг, Инвестицион программæйы реализацийыл чи архайдта, уыдонæн. 2017 азæй фæстæмæ Инвестпрограммæ 90 процентæй къаддæр æххæст никуы æрцыд. Æнæмæнгхъæуæг уыдысты бæрзонд организацион амæлттæ, контролькæнынад. Нæ къухты бафтыд бирæ саразын, пенситæ, иурæстæгон бафыстытæ, пособиты алы хуызтæ фæфылдæр кæнын, æххуыс цыд инвалидтæн æмæ афтæ дарддæр. Æппæт уыдæттæ нæ къухы æфтыдысты уæ фæрцы, – бафиппайдта Президент. Уый ма банысан кодта æппæт министрадты æмæ ведомствоты егъау куыст æмæ бузныджы ныхæстæ загъта алкæцы къухдариуæггæнæгæн дæр хицæнæй сæ куысты тыххæй.
Рабадты кæрон Бибылты Анатоли раарфæ кодта Бекъойты Геннадийæн:
– Ды кодтай нæ адæмæн æнæмæнгхъæуæг куыст. Нæ зонын, цахæм уынаффæтæ исдзæн ног хицауад. Фæлæ хъуыды кæнын, уыцы адæм, кæцытæ эффективонæй кусынц сæ бынæтты, уыдоны хъæуы æрбакæнын æххæсткæ-нынады органы дарддæры куыстмæ, – банысан кодта уый.
Comments are closed, but trackbacks and pingbacks are open.