Цалдæр азы размæ, Къостайыхъæуы Къостайы райгуырæн бон нысан кæныны рæстæджы мадзалы докладгæнджытæм лæмбынæг хъуыстон, фæлæ концерт куы райдыдта, уæд зонгæ сылгоймагимæ ныхас кодтон, æмæ музыкалон номыртимæ чи рацыд, уыдонмæ мæ хъус нал æрдардтон, фæлæ мын мæ хъусдард аздæхта иу диссаджы хъæлæс, иу сывæллон ирон зарæг афтæ хорз æххæст кодта, ахæм диссаджы хъæлæсæй зарыд, æмæ мæм афтæ каст, цыма Альбертино Лоретти зарыд. Адæм кæрæдзи фарстой, чи у, кæй лæппу у, зæгъгæ. Æввахс мæм цы сылгоймаг лæууыд, уый æз дæр афарстон, уыцы сывæллон чи у, уымæй. Уый мын загъта, зæгъгæ йæ Плитæй схуыдта мадзаламонæг. Уæдæй цасдæр азы рацыд æмæ бынтон æрæджы базонгæ дæн ацы диссаджы хъæлæсы хицауимæ. Уый у Плиты Мурат, кæцы зарæггæнæг не ссис, кæд ын ныр дæр хорз хъæлæс ис, уæддæр, фæлæ у курдиатджын музыкант.
Мурат райгуырд 1996 азы Цхинвалы. Нырма уал ахуырмæ бацыд Цхинвалы 2-æм астæуккаг скъоламæ, фæлæ дзы бирæ нæ ацахуыр кодта. Гимнази «Альбион»-мæ рахызт æмæ йæ æнтыстджынæй каст фæцис 2013 азы. Уыцы-иу рæстæджы ахуыр кодта Цхинвалы 2-æм музыкалон скъолайы аккордионыл цæгъдын. Музыкалон скъола фæуыны фæстæ курдиатджын лæппу йæ ахуыр адарддæр кодта Цхинвалы Æлборты Феликсы номыл музыкалон ахуыргæнæндоны.
Мурат зарын чысылæй райдыдта. Музыкалон скъо-лайы ахуыргæнгæйæ, бирæ конкурсты иста хайад, куыд республикон, афтæ Уæрæсейы уагъдцæуæг конкурсты дæр, æмæ-иу кæддæриддæр бацахста призон бынæттæ. У бирæнымæц конкурсты лауреат, йæ хорзæхты æмбырдгонды ис Гран-при, 20-æй фылдæр дипломтæ, бузныджы фыстæджытæ, грамотæтæ.
Цæвиттонæн дзы æрхæсдзынæн цалдæр хорзæхы. 2008 азы уалдзæджы Цхинвалы ауагъдæуыд, республикон конкурс «Юный джентльмен» æмæ «Мистер музыкант»-ы номинацийæ чысыл Мурат фыццаг бынат кæй бацахста, уый тыххæй хорзæхджын æрцыд дипломæй, Ивановойы Уæрæсейы Адæмты ассамблеяйы хъæппæрисæй ауагъдæуыд Национ спорт æмæ аивады сывæллæтты-æвзæнгты æхсæнадæмон фестиваль «Гармония жизни» Уæрæсейы адæмты ахастытæ сфидар кæныны нысанæн. Уыцы фестивалы 10-аздзыд Мурат дæр райста хайад. Концертмæкæсджыты зæрдæмæ афтæ тынг фæцыд сывæллоны зард, æмæ йын лæугæйæ, æмдзæгъд кодтой. Кæй зæгъын æй хъæуы, фæцыд жюрийы зæрдæмæ дæр æмæ йын лæвæрд æрцыд фыццаг къæпхæны диплом. Хайад райста Фыццаг Æхсæнадæмон музыкалон фестиваль «Бонвæрнон»-ы «О, Цхинвал, Богом создан ты!»-йы номинацийы æмæ та хорзæхджын æрцыд дипломæй. Сывæллæтты-æвзæнгты аивадон сфæлдыстады Фыццæгæм Æхсæнрегионалон фестиваль-конкурс «Звездочка Адыгеи»-йы «Эстрадное пение»-йы номинацийы хорз кæй азарыд, уый тыххæй йæ схорзæхджын кодтой фыццаг къæпхæны дипломæй. Уыцы фестивалы «Народные инструменты»-йы номинацийы та хорзæхджын æрцыд II къæпхæны дипломæй. Хайад райста Æртыккаг Æппæтуæрæсейаг фестиваль-конкурс «Хрустальные звездочки-2012»-йы «Испольнительское мастерство»-йы номинацийы æмæ та хорзæхджын æрцыд дыккаг къæпхæны лауреаты дипломæй, 2013 азы Æлборты Феликсы номыл Сывæллæтты-æвзæнгты Æхсæнадæмон фестивалы «Адæмон инструментты» номинацийы та рамбылдта Гран-при. Волгограды областы Куадзæны областон фестиваль «Играем с оркестром» æмæ взонг вокалистты фестивалы æнтыстджынæй хайад кæй райста, уый тыххæй йæ Волгограды Аивады æмæ культурæйы институты ректор схорзæхджын кодта бузныджы фыстæгæй. Хайад райста сывæллæтты-æвзæнгты фыццæгæм Æхсæнадæмон музыкалон фестиваль «Яблоко Нартов»-ы «Вокал академический (соло)»-йы номинацийы (кæстæр кары категорийы) æмæ хорзæхджын æрцыд фыццаг къæп-хæны лауреаты дипломæй æ.а.д.
Музыкант йæхæдæг куыд радзырдта, афтæмæй ныры фæсивæдæй бирæтæ тырнынц зарæггæнæг суæвынмæ, фæлæ Мураты фæндыд музыкант суæвын æмæ скъола каст куы фæцис, уæд ахуырмæ ацыд Санкт-Петербургмæ æмæ бацыд Римский-Корсаковы номыл консерваторийы адæмон инструментты факультетмæ. Консерваторийы ахуыр кæныны рæс-тæджы-иу хайад иста алыгъуызон æхсæннационалон фестивальты æмæ та-иу рамбылдта призон бынæттæ. Хайад иста Санкт-Петербурджы ирон диаспорæйы мадзæлтты, куыд музыкант, афтæ дæр-иу æй арæх фæхуыдтой сæ мадзæлттæм.
Консерватори каст фæцис 2018 азы. Уыцы аз æй акодтой Уæрæсейы æфсадмæ. Службæ кодта Цæгат-Ныгуылæйнаг æфсæддон окруджы Санкт-Петербурджы æфсæддон оркестры. Æфсæддон службæйы фæстæ дæр æй бæргæ урæдтой æфсæддон оркестры къухдариуæгад, фæлæ йæ йæ райгуырæн Ирыстон йæхимæ кæй лвæста, уый тыххæй æрцыд Цхинвалмæ æмæ кусын райдыдта Галаты Барисы номыл Хуссар Ирыстоны кафт æмæ зарды паддзахадон ансамбль «Симд»-ы фæндырдзæгъдæгæй, уыцы-иу рæстæджы кусы музыкалон скъолайы ахуыргæнæгæй дæр.
Муратыл кæд нырма 25 азы знон сæххæст, уæддæр ын бирæ æнтыстытæ ис музыкæ фыссыны фадыджы. Плийы фырт музыкæ фыссын райдыдта, консерваторийы куы ахуыр кодта, уæд. Æрæджы йын мыхуыры рацыд музыкалон уацмысты фыццаг æмбырдгонд. Æмбырдгонды ис 18 уацмысы фортепианойæн, дыууæ та – скрипкæимæ фортепианойæн.
Мурат кусы музыкалон уацмысты дыккаг æмбырдгондыл дæр. Йæхæдæг куыд загъта, афтæмæй ма æмбырдгондыл чысыл акусын хъæуы, æндæр уый дæр цæттæ у, æвæццæгæн, уый дæр тагъд рæстæджы бадæтдзæн мыхуырмæ æмæ фæхæццæ уыдзæн музыкæуарзджытæм.
Ис ахæм уырыссаг æмбисонд, зæгъгæ, науы куыд схонай, афтæ аленк кæндзæн. Муратыл дæр йæ мадыфсымæры ном сæвæрдтой, уый у зындгонд музыкант. Уый дæр фыссы музыкалон уацмыстæ, бирæ зарджытæ ис фыст уый музыкæйыл. Ныртæккæ уый кусы æмæ цæры Дзæуджыхъæуы.
Нæ уацы кæуыл дзурæм, уыцы Мураты хистæр æфсымæр дæр музыкалон ахуыргæнæндон фæцис каст, уымæн дæр стыр æнтыстытæ уыд музыкæйы фадыджы, фæлæ скъола фæуыны фæстæ равзæрста медицинæ, каст фæцис Санкт-Петербурджы медицинон институт æмæ дохтырæй кусы Питеры рынчындæттæй сæ иуы.
Йæ дыууæ фырты дæр сæ мад Мæдинæ иунæгæй фæхъомыл кодта, мад дæр сын уыд æмæ фыд дæр. Кæд ын стыр æххуыс кодтой йæ мад æмæ фыд, уæддæр сывæллоны сæйраг хъомылгæнæг ныййарæг вæййы, æмæ Мæдинæ йæ ныййарæджы хæс уæлдайджынтæй сæххæст кодта, сæ миддунейы сын хорз миниуджытæ ныффидар кодта æмæ йæ фырттæ, фыццаджы фыццаг, сты хæрзæгъдау, адæмуарзон, сты куыстуарзаг æмæ райгуырæн Ирыстоныл æнувыд.
Мурат, знон дæ райгуырæн бон уыд æмæ Ирыстоны зæдтæ æмæ дзуæрттæй арфæгонд у, дæ алы райгуырæн боныл дæр æмбæл амондджынæй æмæ стыр æнтыстытимæ.
ОСИАТЫ Индирæ
Comments are closed, but trackbacks and pingbacks are open.