НӔ ИСТОРИОН РАЙГУЫРӔН БӔСТӔ – НӔ ИУГӔНӔГ

Фылдӕр кӕны, Уӕрӕсейы Федерацийы Президент Владимир Путины сӕрмагонд ӕфсӕддон операцийы рӕстдзинад чи бамбӕрста ӕмӕ сӕ фарсхӕцынад равдисыны тыххӕй уынгтӕм чи рацыд, уыцы ныгуылӕйнаг бӕстӕты цӕрӕг адӕмы нымӕц. Ахӕм фарсхӕцынады акцитӕ фыццаг райдыдтой Уӕрӕсейӕн хӕларадон Сербийы, ныр сербӕгты фӕзмынын райдыдтой, Уӕрӕсемӕ фыдӕхзӕрдӕ хӕссӕг адӕмтӕ дӕр  англисӕгты йедтӕмӕ…

Уыдонӕн, ома, англисӕгтӕн, ӕвӕццӕгӕн, сӕ туджы ӕгӕр ахъардта уырыссаг адӕммӕ ӕнӕуынондзинад – нырма дӕр зӕрдыл уымӕн ӕрлӕууы уырыссаг туристы хабар: Англисы уӕвӕг уырыссаг турист сырддонмӕ бацыд. Иу афон, кӕфхъуындартӕ кӕм уыдысты, уыцы цадмӕ ныххауд чысыл сабичызг. Уырыссаг йӕхи нывзылдта цадмӕ. Сабийы тугдзых кӕфхъуындары дзыхӕй байста ӕмӕ йӕ бахаста йӕ мадмӕ. Англисӕгтӕ йӕ сӕ къухтыл систой ӕмӕ йӕ фырцинӕй хӕрдмӕ ӕппарынц: «Ды равдыстай, ӕцӕг англисагыл чи ӕмбӕлы, ахӕм хъӕбатырдзинад!», – хъӕр кӕнынц фӕйнӕрдыгӕй. «О, фӕлӕ ӕз уырыссаг дӕн», – дзуры сын уырыссаг турист. Дыккаг бон англисаг газеттӕй алкӕцыйы фыццаг фарсыл дӕр уыд уац ахӕм сӕргондимӕ: «Расыг уырыссаг турист адавта кӕфхъуындары сихор».

Фӕлӕ англисӕгтӕ сӕхи куыдфӕнды уӕлбикъон ма ӕнхъӕлой, уырыссаг удыхъӕды фарн афтӕ тыхджын у, ӕмӕ сын иууылдӕр райхалдзӕн сӕ цӕстыты баст.

Уӕззау, тынг уӕззау уавӕры бахауд Уӕрӕсе. Цӕмӕн? Украинаг фашизмы хурхыл бахӕцыны фаг хъару йӕм нӕ разынд ӕмӕ уый тыххӕй? Нӕ, уыцы фашисттӕ ӕмӕ нацисттӕ ахӕм ницӕйӕгтӕ разыной ӕмӕ сывӕллӕтты, зӕрӕдты аууон нымбӕхсдзысты, уый ӕнхъӕл кӕй нӕ уыд, уый тыххӕй. Æмӕ куыд фӕзӕгъынц, уӕззау уавӕры бахауӕгӕн мӕлдзыджы ӕххуыс дӕр ӕххуыс у, зӕгъгӕ, чысыл, фӕлӕ йе ‘нусон стратегион хӕларыл ӕнувыд Хуссар Ирыстон дӕр фӕстӕ нӕ лӕууы, нӕ республикӕйы къухдариуӕгад ӕмӕ адӕм  сӕ зӕрдиаг ӕххуысы хай кӕнынц, сӕ фарсхӕцынад ӕвдисынц алыварсонӕй дӕр. Нӕ республикӕйы Президент Бибылты Анатоли кусӕгон балцы уыд Донецкы Адӕмон Республикӕйы. Денис Пушилинимӕ официалон фембӕлды уӕлдай ма Бибылты Анатоли фембӕлд Украинӕйӕ денацификацийы фӕдыл сӕрмагонд ӕфсӕддон операцийы хайадисӕг бархионтӕ ӕмӕ ӕфсӕддон службӕгӕнджытимӕ, бацыд Мариупольмӕ дӕр. Бибылты Анатоли Уӕрӕсейы Федерацийы Паддзахадон Думӕйы депутат, «Хӕстон Æфсымӕрдзинад»-ы къухдариуӕггӕнӕг Дмитрий Саблинимӕ бацыд горӕты рынчындонмӕ ӕмӕ сын радта медицинон уагдонӕн ӕнӕмӕнгхъӕуӕг хостӕ.

Нӕ паддзахады сӕргълӕууӕг ныхас кодта рынчындоны дохтыртимӕ, цымыдис кодта, цӕмӕй сын у Хуссар Ирыстоны бон баххуыс кӕнын, уыдӕттӕм.

«Раст зӕгъгӕйӕ, мӕнӕн мӕхи бафӕндыд фенын, цы цӕуы ам, цӕмӕй бамбарон, ныртӕккӕ Мариуполы адӕм конкретонӕй цы хъуагдзинӕдтӕ ӕййафынц, уый. Бузныг мӕ хӕлар ӕмӕ нӕ республикӕйы хӕлар Дмитрий Саблинӕн, кӕцы мын баххуыс кодта Хуссар Ирыстонӕй фыццаг гуманитарон уӕзтӕ райсынӕн», – загъта Президент.

Мариуполы рынчындоны фӕстӕ Бибылты Анатоли бабӕрӕг  кодта, поселок Воладарскы рӕстӕгмӕ чи ӕрбынат кодта, уыцы лигъдӕтты.

Бибылты Анатолийӕн официалон кусӕгон фембӕлд уыд Донецкы Адӕмон Республикӕйы Сӕргълӕууӕг Денис Пушилинимӕ. Фембӕлды ма хайад райстой дыууӕ республикӕйы уӕлвӕткон уавӕрты министрадты сӕргълӕуджытӕ Цоциты Азӕмӕт ӕмӕ Алексей Кострубицкий.

Денис Пушилин банысан кодта Донбассы цӕрджытӕн Республикӕ Хуссар Ирыстоны ӕххуысы ахсджиаг нысаниуӕг.

– Цалынмӕ Донецкы Адӕмон Республи-кӕйы хӕдбардзинад Уӕрӕсейы Федераци нӕ банымадта, уӕдмӕ нӕ банымадта ӕфсымӕрон Республикӕ Хуссар Ирыстон. Æмӕ уый махӕн фадат радта, цӕмӕй рӕзӕм, размӕ цӕуӕм, уыцы нымӕцы экономикӕйы къабазы дӕр. Фӕлӕ мах экономикон моделтӕй кӕрӕдзийыл тынгдӕр бӕттынц ӕцӕг ӕфсымӕрон ахастытӕ, мах Анатоли Ильяйы фыртимӕ бӕтты ӕцӕг, зӕрдӕбын хӕлардзинад.

Уыцы рӕстӕджы дӕргъы махӕн, ӕцӕгӕй дӕр, фадат уыд, украинаг режимы аххосӕй сӕвзӕргӕ ӕндыгъддзинады цы вазыгджын уавӕрты бахаудыстӕм, уыцы уавӕрты хъарм ӕмӕ сыгъдӕгзӕрдӕ ахастытыл баууӕндынӕн. Фӕлӕ куыдфӕндыйӕ дӕр мах ардтам фадӕттӕ уыцы проблемон уавӕртӕ аскъуыддзаг кӕнынӕн, мах ардтам фадӕттӕ ӕфсымӕрон уӕхскыл нӕхи бакъул кӕнынӕн, размӕ цӕуынӕн, – загъта Донецкы Адӕмон Республикӕйы Сӕргълӕууӕг.

Уый ма банысан кодта, Хуссар Ирыстонӕй Донбасс бахъахъхъӕныны тохты хайад чи райста, уыцы бархионты ӕххуысӕн саргъгӕнӕн кӕй нӕй, уый дӕр:

– 2014 азӕй фӕстӕмӕ нӕ хӕлӕрттӕ ӕмӕ не ‘фсымӕртӕ нӕ фарсмӕ уыдысты уӕхски-уӕхск. Мах тынг хорз ӕмбарӕм тасдзинад ӕрмӕст Украинӕйы ‘рдыгӕй кӕй нӕ ис. Мах тынг хорз ӕмбарӕм, цы ‘рцыд 2008 азы ӕмӕ уымӕй размӕ дӕр.

Мах, ӕнӕдызӕрдыгӕй, ӕмбарӕм, ӕппӕт уыдӕттӕ здӕхт кӕй сты Уӕрӕсейы ныхмӕ. Æмӕ Уӕрӕсемӕ та махӕн нӕ ахаст иугъӕдон у, фӕивӕн ын нӕй – уый у, нӕ адӕмтӕ цӕмӕ тырнынц, уый: куыд гӕнӕн ис, уымӕй Уӕрӕсемӕ, нӕ иумӕйаг Райгуырӕн бӕстӕмӕ ӕввахсдӕр уӕвын.

Уыцы планы Анатоли Ильяйы фыртмӕ ис тынг раст фӕндондзинад, кӕцы ӕнцой кӕны ирон адӕмы фӕндон ӕмӕ тырнындзинадыл, – загъта Денис Пушилин.

Уый банысан кодта, ныфс ӕй кӕй ис, Донецкы Адӕмон Республикӕйы дӕр кӕй фӕуӕлахиз уыдзӕн историон рӕстдзинад.

Бибылты Анатоли йӕхи рады загъта, алы хатт дӕр стыр ӕхсызгондзинадимӕ кӕй ӕрцӕуы «зынаргъ ӕмӕ ӕфсымӕрон Донецкы Адӕмон Республикӕмӕ»:

– Фашизмы фарсхӕцӕг Украинӕйы къухдариуӕгады уагъдцӕуӕг архайдтыты фӕстиуӕгӕн сӕвзӕргӕ уавӕр тынг тӕссаг у ӕрмӕст Донбассӕн нӕ, тынг тӕссаг у Украинӕйӕн йӕхицӕн дӕр. Уымӕн ӕмӕ ӕмбӕрстгонд у, сӕ фӕстагӕтты уырыссаг дунемӕ ӕнӕуынон ахаст дарыныл чи хъомыл кӕны, уыдон тынг хорз ӕмбарынц, уыцы историйӕн кӕй уыдзӕн ӕвзӕр кӕрон. Фӕлӕ куыдфӕнды ма уа, уӕддӕр мӕн фидарӕй уырны, Донецкы Адӕмон Республикӕ ссӕрибар уыдзӕн. Сӕрмагонд ӕфсӕддон операци дӕр уымӕ здӕхт у, ӕмӕ Владимир Путины уынаффӕ у тынг раст, – загъта Президент.

Уый ма йӕ ныхасмӕ бафтыдта, Хуссар Ирыстон кӕй хӕцы Уӕрӕсейы Федерацийы Президенты ӕвварс, рапарахатгонд фашизм ӕмӕ нацизмӕн кӕрон скӕнынмӕ йӕ тырнындзинады тыххӕй.

– Æз алы хатт дӕр дзырдтон, иугӕр адӕм сӕ фидӕны хъысмӕт аскъуыддзаг кодтой, уӕд, уыцы тырнындзинадӕн бауромӕн нал ис, нӕдӕр снарядтӕй, нӕдӕр – артиллерийӕ. Фидарӕй мӕ уырны, Донецкы Адӕмон Республикӕ, абон цы уӕззау уавӕры ис, уымӕ ӕнӕ кӕсгӕйӕ, дидин кӕй ӕфтаудзӕн, кӕй рӕздзӕн.

Махӕн не ‘ппӕтӕн дӕр, куыд Уӕрӕсейы Федерацийы цӕрӕг ӕппӕт адӕмтӕн, Уӕрӕсе у нӕ историон Райгуырӕн бӕстӕ. Æмӕ уыцы историон Райгуырӕн бӕстӕ кӕрӕдзийыл бӕтты Хуссар Ирыстон ӕмӕ Донецкы Адӕмон Республикӕ ӕмӕ Луганскы Адӕмон Республикӕйы, ӕмӕ ӕнгом кӕны ӕнӕхъӕн Уырыссаг дунейы. Æмӕ уыцы планы нӕ тырнындзинад у ӕмхуызон, нӕ ахаст Уӕрӕсемӕ – ӕнӕфӕивгӕ, – банысан кодта Бибылты Анатоли.